Shillong, Nohprah 14: Ka 72nd Plenary jong ka North Eastern Council (NEC) Secretariat kan sa long ha ka 20 bad 21 tarik mynta u bnai hapoh Agartala, jylla Tripura.
Kane ka jingïalang ne plenary ha ka 21 tarik une u bnai kan long ha Pragna Bhaban ïa kaba yn pynïaid da u Amit Shah, Myntri ka Sorkar Pdeng ba Khmih ïa ka tnat Kam Pohïing bad u Chairman jong ka NEC.
Ha kane ka jingïalang u Jyotiraditya M. Scindia, Minister of DoNER bad Vice Chairman jong ka NEC, ha ryngkatlang bad Dr. Sukanta Majumdar, Minister of State for DoNER, kin ïashim bynta lang. Ki Lat bad ki Myntri Rangbah na baroh ki 7 tylli ki jylla kane ka thaiñ shatei Lammihngi kin ïadonlang ha ryngkat bad ki 2 ngut ki dkhot ka NEC.
Katba ha ka 20 tarik une u bnai, ïa ka Pre-Plenary technical session yn pynlong ha Hotel Polo Tower, ban pynïaid da u Dr. Sukanta Majumdar, da ka jingïashim bynta jong ki Secretary jong kiba bun ki Union Ministry, nangta ki Chief Secretary jong ki jylla kane ka thaiñ shatei lammihngi bad ki senior officer na ki tnat Planning.
