Ka VPP kan hap pynshai la ka kwah ïa ka Article 371 ne ïa ka 6th Scheduled, ong u Bah Pala

Shillong, K’ Lyngkot 11: U President ka MPCC u Bah Vincent H Pala u la kyntu ïa ka seng Voice of the People’s Party ba kadei ban pynshai la ka kwah ïa ka article 371 ne ïa ka 6th Scheduled, la ka kwah ban aiti noh sha ka sorkar ïa ka riti synshar khaddar ne ban peit hi da ki District Council.
Ïa kane u la ong halor ka jingkynnoh ba ka VPP ka kwah ban wanrah noh da ka article 371 ha ka jaka jong ka 6th Scheduled bad ka dei ruh ka seng kaba ïakhun ïa kane ka elekshon sha ka ADC. “Ka Article 371 ka ïapher na ka 6th Scheduled, ka article 371 ka bor ka shong ha ka sorkar jylla, ka bor jong ka 6th scheduled kadei kaba la pynkupbor ha ka ADC ban ïada ïa ka khyndew ka shyiap, ka riti dustur, ka synshar khaddar bad kadei beit hapoh ka jingpynïaid jong ka District Council, katba ka 371 pat ka bor ba kyrpang la ai ha ka sorkar jylla, kumta ki nongthep vote hapoh Khasi Jaiñtia kin hap ban ai ïa ka rai la ngi kwah ba ïa ki kam khyndew kam shyiap, ki riti dustur ngin aiti noh sha ka sorkar jylla ne kin sah bad ki Rangbah Shnong, ki shnong, ki Hima bad kumta ter ter, ngin hap ai ka rai, namar katkum ka jingwad bniah jong ka Congress ngi shem ba ka 6th Scheduled ka kham bha ka kham khlaiñ shibun ban ïa ka article 371.”
U la ïathuh ba wat hapoh Ladakh, Jamu and Kashmir bad ha Arunachal ki kwah ban pyntreikam da ka 6th Scheduled watba ki don ki jaka kiba la ïoh ïa ka article 371 ruh. “Kumta ki paidbah kin hap ban ai ka rai la ki kwah ïa ka 371 ne ïa ka 6th Scheduled bad lada ki paidbah ki jied ïa ka VPP kaba mut ba ka lah ban don ka jingshimrai kaba ki lah ban shim ngim tip hynrei ka Congress ka ïeng beit ha ka nongrim ba ka 6th Scheduled kan dei ban neh ban pynneh, ban ïada ïa ka riti dustur bad ngi dei ban shna bun ki aiñ ban pynbha bad lada ka Congress ka ïoh ban ïalam hapoh ka ADC ki bun ki rai ban sa shim ban ïada ïa ka khyndew ka shyiap bad ïa ki riti dustur,” ong u Bah Pala.
Haba kylli halor ki jingïalap jong ka VPP haba ïadei bad ka article 371, u nongïalam ka Congress u la ong ba ka VPP kadei ban pynshai sha ki paidbah la ki kwah ban pynneh pynsah ïa ki riti dustur ne ki kwah ban kynriah noh na ka 6th Scheduled sha ka article 371 khnang ba ki paidbah kin ai ka rai bad ka kamram jong ka VPP mynta ka long ba lada ki jop kin pynkylla ne kin pynneh pynsah.
“Ki nongïalam jong ki mynshwa ki la wanrah ïa kane ka bill 371 hapoh ka Ïingdorbar thaw aiñ ka jylla bad ki la leit ruh ban ïalap kylleng kylleng bad mynta ka kynti ruh kumjuh, kumta ki nongïalam jong ki, kidei ban long kiba shai kaei kaba ki kwah la ki kwah ïa ka article 371 ne ka 6th scheduled, kumta ngi donkam ban jied ïa ki nongïalam kiba nang kiba tbit bad ïa ka party kaba la don ki briew kiba la biang bad kiba la dep ban pyni ïa ki kam ym ban shu jied kulmar ïa kiba dang thymmai,” ong u Bah Pala.
U la ong ba ki paidbah ki la ai ïa ka NPP ar samoi ban treikam hapoh ka sorkar hynrei la ïohi bun ki jingbym biang, shaei ka ïoh ka kot ka jylla, shaei ka suk ka saiñ jong ka jylla, shaei ki samla ka jylla ki long mynta, balei jyllei ka kam dih bad khaïi drok, kumta hap pyrkhat bha haba jied ïano ïano.
“Kumba ka long mynta ka Congress ka don ki briew kiba stad, kiba la shemphang, kiba la tbit, kiba rim ruh ki don bad kiba thymmai ruh ki don kiba la shah hikai,” u la ong da kaba bynrap ruh ba ka jingbym lah ban pyntreikam bha ïa ka 6th Scheduled ka dei namar ka bamsap naba bun kiba ïaleh elekshon da ka jingthmu ban kamai, kumta donkam ban jied ïa ki briew kiba ïohi jngai bad kiba don ka jingtbit bad kumjuh ruh ïa ka party kaba lah ban leh ïa kiei kiei kiba myntoi ïa ka jaitbynriew.