Ka VPP kaba la ïoh bun paid ka dei ban wanrah jingkylla halor ki jingdonkam ki paidbah : Badwar

Shillong, Ïaïong 27: U Nongïalam ka Congress na Meghalaya u Bah Manuel Badwar u la ong ba ka Voice of the People Party (VPP), kaba la ïoh ka jingbun paid ha Khasi Hills Autonomous District Council (KHADC), ka lah ban wanrah ka jingkylla kaba shisha haba ïadei bad ka jingdonkam jong ki paidbah.
Haba kynthoh ïa kane dangshen, u Badwar u la ong ba kane ka seng kaba bun paid marwei ka lah ban ïalam ïa ka jingtreikam kaba ïaid beit ha KHADC bad ka jinglah ban pynbeit ïa ki kam khlem da ïapeiñ na ka daw jong ka saiñ pyrthei ba ïa khleh khaw lang.
Ka VPP ka la jop 17 seat ha une u snem ha ka elekshon sha KHADC, bad ka la ïoh bun paid hapoh ka ïing kaba don 29 ngut ki dkhot. Katba ka seng Congress ka la shah pynrem kput ha ka elekshon ba la dep naba ki paidbah ki la ai ka rai da kaba pynjop bun ngut ki MDC ïa ka VPP.
U Badwar u la banjur halor ka jingdonkam ba kane ka executive committee (EC) bathymmai ba kan tohkit bad ban pynbeit ïa ki kam jong ka jinglait tuh ka khajna na ki khyrdop lum khajna bad ki check gate, bad kiwei kiwei bad ban pynphai biang ïa kine ki khajna na ka bynta ka roi ka san jong ka district council bad ban kyntiew ïa ka jaitbynriew Khasi.
U la pynpaw ruh ïa ka kam jong ka district council ha ka ban pynïaid ïa ki primary education, da kaba kyntu ruh ïa ka EC ban sdang ïa ki rai kiba thymmai. U la banjur ruh halor ka jingdonkam ban ïada ïa ki nongrep na ka jingshah ban beiñ da ki middlemen, ban pynthikna ïa ka dor ka mur bad na ka bynta ki jingmyntoi ki nongrep halor ki jingtrei shitom jong ki.
U Badwar u la ong ba ka EC ba la ïalam da ka VPP ka dei ban bat skhem ïa kane ka lad kaba ka la ïoh na ki paidbah.
“Ki dei ban plie lad ïa ki samla kaba lah ba kin leh, ha kaba ka district council ka lah ban ïatreilang bad ki financial institution, da kaba ïakren bad ki jaka kynshew pisa ban pynlait ïa ki ram na ki subsidy, ban khmih ïa ki detail project report bad ban pyndon ki jingai jinghikai khnang ban pynsuk ïa ki samla kiba sengkam la jong,” u la bynrap.