Ka thaiñ Shatei Lammihngi ka dei ka khyrdop jong ka India sha ka South-East Asia: President Kovind

0

Guwahati, Jymmang, 04: “Ka thaiñ Shatei Lammihngi ka dei ka khyrdop jong ka India sha ka South-East Asia bad kiwei kiwei ki ri,” ong u President ka India, u Ram Nath Kovind haba kren kum u Kongsan ha ka jingpynkut ïa ka North East Festival ba la pynlong da ka Ministry of Development of North East Region (DoNER) kum shi bynta ka Azadi ka Amrit Mahotsav ha Guwahati, Assam ha ka sngi Balang.
U President u la ong ba ka thaiñ Shatei Sammihngi ka don ïa u pud u dam bad kiwei kiwei ki ri uba jrong haduh 5,300 kilometre bad kumta ka thaiñ ka long kaba kongsan bha.
“Lyngba ka jingsdang ïa ka Look East Policy (LEP), ka rukom ïadei bad ki ri ba markhap jong ngi sha ka thaiñ Shatei Sammihngi ka la plié lad ïa ka jingpeit kyrpang ïa ki kam kiba ïadei bad ka ïoh ka kot ban ïoh jingmyntoi na ki lad kiba don na ka bynta ka jingkyntiew ïa kane ka ïoh ka kot ha kane ka thaiñ,” u la ong.
“Ha u snem 2014, la kyntiew ïa ka LEP sha ka Act East Policy (AEP) kaba la wanrah ïa ka jingkylla bad kaba la pynkylla ruh ïa ka bynta jong ka thaiñ Shatei Sammihngi,” bynrap u President.
U President u la ong ba u dap da ka jingkmen ban ïashim bynta ha kane ka prokram pynkut ïa ka North East Festival ba la pynlong kum shi bynta ka Azadi ka Amrit Mahotsav. U la ai jingïaroh ïa u Myntri Sorkar Pdeng ba dei khmih ïa ka tnat DoNER, ki Lat jong ki Jylla bad ki Myntri Rangbah jong baroh ki jylla ha ka thaiñ Shatei Sammihngi bad ruh ïa ki nongshong shnong jong ka thaiñ kiba la ïashim bynta ha kane ka tamasa.
U la ong ba u kmen ban ïohi ïa ka jingsngew “Hum Kisi Se Kam Nahi”!
U President u la ong haba ka ri ka rakhe ïa ka jingïakhih na ka bynta ka jinglaitluid, ki briew ki kynmaw ïa ka jingshlur bad ka jingieid ri jong ki nongïalam bad kito kiwei kiwei ki briew kiba la ïashim bynta ha kane ka jingïakhih hynrei ki bym paw kyrteng. U la ong ruh ba kane ka jingïakhih kan ym long ka jingïakhih paidbah khlem kine ki briew. “Ka dei ba ngin dap da ka jingsngew sarong ba ngi ïohi ïa kum kane ka jingïashim bynta ha man ki bynta jong ka ri. Baroh ki briew ka ri ki kwah ïa ka India ba kan lait na ka jingshah teh mraw ha ki mynder. Ïa kane la ïohi ruh ha ka thaiñ Shatei Sammihngi kaba la ïasnoh kti lang ha kane ka jingïakhih na ka bynta ka jinglaitluid,” la ong shuh shuh u President ka Ri.
“Haba ngi rakhe ïa ka jingdap 75 snem ka jingïoh jinglaitluid jong ka ri, haba ngi kynmaw ïa ki jingjia kiba ïadei bad ka jingïakhih, haba ngi pyrkhat shaphang ka jingim bad ka kam jong ki nongïalam ba khraw, ngi leh ïa kane ban sngewthuh hangno ngi don mynta haba ïanujor bad ki jingthmu jong ki. Ngi leh ïa kane khnang ban sngewthuh kham bha ïa ka jingthmu jong ki bad ban ïoh mynsiem na ki jingeh ba ki mad ban wanrah ïa ka lawei kaba kham bha,” ula ong.
U la ong ba haba ka ri ka la ïoh ïa ka jinglaitluid, ka thaiñ Shatei Sammihngi ka long kaba pher bha na kata kaba ngi ïohi mynta. “Ha kito ki por, ka thaiñ ka la mad shibun ki jingeh na ka jingphiah ïa ka ri namar ka la duh noh ïa ki jingïasoh bad ki jaka Pdeng jong ka leit ka wan, ki jaka pule bad ki jaka khaii kum ka Dhaka bad Kolkata. Kaba sah ka jingpynïasoh bad ka thaiñ Shatei Sammihngi ka dei ka jaka kaba rit bha ha West Bengal kaba la wanrah shibun ki jingeh ban kyrshan ïa ki kam ka roi ka par ha ka thaiñ. Hynrei, ngi la trei shitom ban pynbeit ïa ki jingeh. Ha kine ki 75 snem ba la dep, ka thaiñ Shatei Sammihngi ka la ïaid shaphrang ha katto katne ki kam,” la ong u President.
U President u la ong ba ka thaiñ ka don shibun ki jingkhlaiñ. Ka don ki lad ha ki kam jngoh kai, ka rep ka riang, ka jingthaiñ jaiñ bad ki kam ïalehkai.
U la ong ruh ba long kaba donkam mynta ban kyntiew ïa ki jylla ka thaiñ khnang kin ïaryngkat bor bad kiwei kiwei ki jylla kiba la kham kiew ha ki kam karkhana khnang ban plié shuh shuh ïa ki lad ïoh kam hangne.
“Ka Sorkar Pdeng ka la ïatrei lang bad ki jylla ban pynsuk shuh shuh ban trei ïa ki kam khaii bad ban pynbun shuh shuh ka jingbei tyngka ki kynhun shimet ha ka thaiñ,” la ong u President.
U President u la kren ruh shaphang ki jingeh kiba mih na ka jingkylla ka suinbneng bad u la ong ba ka dei ban don ka jinghusiar haba saiñdur ne pynkhreh ïa ki kam ha ki snem ban wan khnang ba kane kan ym ktah ïa ka mariang ha ka thaiñ Shatei Sammihngi.
U la ong ba kane ka thaiñ ka dei shi bynta jong ka Himalaya bad Indo-Burma bio-diversity hotspot – kiba long ar na ki 25 tylli kine ki jait hotspot ha ka pyrthei.
Kumta ki kam kiba ïadei bad ka roi ka par ha ka thaiñ ki dei ban phaikhmat sha ki rukom treikam kiba pyndonkam ïa ki jingdon jingem, ki bym ktah ïa ki khlaw ki btap hynrei kiba kyntiew ïa ki jingdon jingem ha ka rukom kaba lah ban ïaineh bad kaba lah ban kyrshan.

Leave A Reply

Your email address will not be published.