Shillong, Jymmang 04: Ka Ïingkashari Meghalaya High Court hynne ka sngi balang kala hukum ïa ka Tnad Power ban pyndep noh ïa ka jingpyndait Streetlight bad tba jingshai ha manla ki jaka khongdong ka sor Shillong hapoh ka saw bnai.
Haba pynwai ïa ka PIL bala mudui da u Bah Wankitbok Pohshna, ka Ïingkashari ba arngut ki Nongbishar bala khlieh da u Cjief Justice Sanjib Banerjee bad Justice W Diengdoh, kala ong “Namar ka jingïohi ba bun ki kam ki dei kiba la dep, dei ban pynkloi noh ïa ka jingpynmeh bording ha ki streetlight bad la aipor saw bnai ïa ka nongshah mudui ba kan pyndep ïa kam”.
Ha ka jingshong bishar, ka Tnad Power kala pyntip ba haduh 226 tylli ki streetlight napdeng ki 323 tylli ki dei kiba la meh bording ha ka ward no 1 haduh 4 ha ki thaiñ Laitumkhrah.
Ka Tnad kala pyntip ruh ba ka la phah ban wan pynpoi ïa ki streetlight ba dang sah bad la khmih lynti ba kine ki tiar kin sa lah ban treikam noh hapoh ka arbnai.
Kala pynshai ruh ba kam shym la pyndait satia ïa ki streetlight ha ki jaka ba thymmai bad namar ka jingbym don nong sumar la slem, kala pynlong ïa kiba bun ki streetlight ban nym treikam shuh.
Ka Ïingkashari kala bthah ïa ka nongshah mudui ba kan buh ha ka jingmut jingpyrkhat ïa ka jingkyrpad jong u nongmudui ba dei ban shimkhia shuwa ïa ki jaka ba long khongdong hashuwa ban pyndait streetlight sha kiwei kiwei ki jaka.
“Naba ba kane ka kam ba ujor ka dei kaba la shimkhia da ka Tnad bad ruh ba ka Tnad kala buh ïa ka por ban pyn dep ïa ka kam, ym idonkam shuh ban nang pynsahteng ïa kane ka mukotduma” kala ong.
Ka Ïingkashari kala ong ba lada jia ba ka kam kam dei hapoh kine ki san bnai, u nongmudui ne kino kino ki riew shimet ki lah ban wanrah ïa ka jingtip sha ka Ïingkashari.
