Lada ki Harijan kim hun ïa ka rai ka sorkar ym lah ban leh ei ei ruh : Prestone

Shillong, Jymmang 04 : U Symbud Myntri Rangbah ka jylla, Bah Prestone Tynsong ha ka sngi Balang u la ong ba ka sorkar kam lah satia ban leh ei ei lada jia ba ka jingïakren bad ka Harijan Panchayat Committee (HPC) ha ki sngi ban wan kam poi shaei shaei ruh na ka bynta ban pynkynriah noh ïa ki na ka jaka ba ki sah mynta.
“Lada jia ba ka jingïakren kam poi shaei shaei bad lada kim hun ngam lah ban ong kumno kumno ruh, hynrei ka jingïakhun pat kan ïai bteng,” u la ong haba kren bad ki lad pathai khubor.
Katkum ka jingïathuh jong u, wat na ka liang ka sorkar ruh kim lah satia ban pdiang halor ki kyndon kiba bun ba ka HPC ka buh hakhmat ka sorkar ban pyntreikam ha shwa ba yn pynkynriah noh ïa kitei ki 342 ngut na Them-metor sha kawei pat ka jaka ba la pynkhreh da ka sorkar.
“Kam mut ba ki kyndon ba ki buh ka sorkar kan pdiang 100 na ka 100. Ngi la dep ban pynshai ba kitei ki kyndon ba ki buh kadei ka bym lah long,” la bynrap biang u Bah Prestone.
La ïathuh ruh namar ka Iing Bishar ka ailad ïa ki ban ïa pynbeit shabar shabar jong ka, kumta ka sorkar ka la khot ïa ka HPC ban ïa kren bad sngewthuh jingmut khnang ban dup lah pynkynriah noh ïa ki da kaba suk bad ma ki ruh kin mih da kaba suk ba saiñ.
U la ong ruh ba ki la dep ban ïa kren haba ïadei bad ka jaka ban buh ïa ki bad kane ka jingïakren kan bteng biang hadien ba ka tnad Urban Affairs ka la dep ban pynkhreh bad pynbit pynbiang ïa ka Blueprint. “Shen ngin sa phah sha ki ïa kaei kaba ka sorkar ka pynkhreh bad hadien kata pat ngin sa khot biang ïa ka jingïalang.”
Kawei pat ka bynta kaba u Symbud Myntri Rangbah u pynpaw ka long ba lada jia ba kim hun ïa kaei kaba ka sorkar ka la tyrwa ha ki, kim donlad hynrei ban bteng ïa ka kam shakhmat khamtam haba katei ka ishu ka don ha ka High Court.