Nongstoiñ, Naiwieng 03: Ka jingshna ïa ka surok rong kaba shi kilomitar shiteng na Mawphanlur shaduh kliar lum Mawthdaraishan kaba la sdang naduh u snem 2023, ka la long ka jingmyntoi kaba khraw ïa ki nongshong shnong kiba don ha katei ka thaiñ.
Ka jingdon jong katei ka surok rong haduh kliar lum Mawthadraishan, ka la khring shuh shuh ïa shibun bah ki nongwan jngohkai na kylleng ki shnong hapoh ka jylla bad na shabar ka jylla ruh kumjuh bad ka la long ka jingmyntoi kaba khraw ïa ki nongshong shnong.
Katei ka surok ka pynïasoh bad ka surok kaba mih na Nongshilong kaba ïaid lyngba ka shnong Domkseh haduh u lum Mawthadraishan kaba dei ka jaka ba ki nongshang kai suwari ki sngew tynnad eh ban leit shangkai pyngad.
Ha kine ki snem ba la dep la dep shna ïa ka lynti ïaid kjat kaba sdang naduh ka jaka sah jong ki nongleit shangkai ha Mawphanlur haduh ban da poi ha lum Mawthadraishan. Ka jingshna ïa katei ka lynti ïaid kjat ruh ka la ai jingmyntoi shibun ïa kiba kwah ban ïaid kjat bad ha shi lynter jongkatei ka lynti ïaid kjat ki don ruh ki jaka shongkai kiba la shna itynnad bha.
Hynrei, na ka jingbym biang jong ki jingker ki masi ki blang ki ïoh lad ban leit rung ba leit rung ha ki por ba slap, kumta ka la pynjaboh bad pynjakhlia hynrei jin lada ki don ki jingker ba biang kitei ki jaka shongkai ki long kiba biang bha bad kiba pyngngad.
