Ka sorkar u Bah EK Mawlong kam shu bamja khluit kum kane ka sorkar ban pynbeit pud: Bindo

Shillong, K’lyngkot 20: U Nongaibuit ba ha khliehduh jong ka United Democratic Party (UDP) u Bah Bindo M Lanong ha ka sngi thohdieng u la takraiñ tyngeh ïa ka jingleh ka sorkar MDA halor ka kam pynbeit pud bad ka Assam bad ong ba kane ka jingleh ka sorkar ka dei ka jingleh bam jakhluit suda. U la ong ba ha ka por ba u Bah EK Mawlong u la pyrshang ban pynbeit pud hynrei um shym la bam jakhluit kum kane ka sorkar kaba mynta.
Haba kren bad ki lad pathai khubor u la ong ba mynba u Bah EK Mawlong u long u Myntri Rangbah ka jylla bad u Prafulla Kumar Mahanta Myntri Rangbah ka jylla Assam kim shym la shu ïaid shakhmat ban pynbeit pud khlem da ïoh jingmynjur lang na ki paidbah baroh.
“Kane ka sorkar mynta pat kam sngap wat ïa ki trai jaka, ki khlieh nongsynshar ban rai ïa ka jingpynbeit pud bad phi ïohi hi ba dei na kane ka daw ba mih kane ka jingbym hun satia ïa ka jingïasoi MoU hapdeng ki ar Myntri Rangbah,” u la ong.
U la ong ruh ba ka sorkar kam dei ban shu kwah burom ban ong ba ka la jop ha ka jingpynbeit pud namar ki paidbah pat kim hun satia.
Shuh shuh u la ong ruh ba ka sorkar Assam wat haduh mynta ruh ka kynturpud beit sha ka khyndew jong ka jylla bad ong ruh ba ki shnong kiba ha ka thaiñ Mawhati kiba ha u 2013 ki dei kiba hap ha ka jylla hynrei mynta ki la shah kam ba ki dei jong ka jylla assam.
U la ong ruh ba na ka liang jong u u la tyrwa ha ka dorbar jong ka KHADC ba lada pynbeit pud dei ban pynshong nongrim ha ki lai tylli ki mawdong; kaba nyngkong dei ban pynbeit da kaba pynshong nongrim ha ki kot ki sla, ki map, kaba ar da kaba pynshong nongrim ïa ki briew kiba shong ba sah ha kito ki thaiñ bad kumjuh ruh ïa ki trai jaka, kaba lai ban ïakren hapdeng ki ar sorkar ba lada ki jaka kiba la bun ki nongshong shnong ki dei ki briew jong ka jylla Meghalaya ne Assam, ki dei ban pyrshang ban pynïoh ïa kita ki shnong sha Meghalaya ne ban leit sha Assam kat kum ka jingjied ki paidbah ne ban rai ruh da kaba pynshong nongrim ba ki briew jong ka jylla Meghalaya ne Assam kiba wan shnong shnong nyngkong ha kita ki thaiñ.