Ka Sorkar MDA ka dei ban thaw ki lad kumno ban kyntiew ïa ka kam ri dohkha ha Meghalaya

Nongstoiñ, Ïaiong, 1: Ki paidbah ka jylla Meghalaya haduh mynta ki dang hap ban shaniah ïa ki jylla kiba na shabar ban pyn poi ïa ki dohkha na ka bynta ki jingdonkam ba man la ka sngi. Ka daw kaba pynlong ïa ka jylla ba ka hap ban ap ïa ki dohkha kiba la wanrah na shabar, ka dei namar ba ka sorkar kam pat thaw satia ïa ki polisi ba kyrpang na ka bynta ban ai jingïarap da ka skhim, ba kynthup ïa ka ram bad ka subsidy sha kito ki paidbah nong ri dohkha na ka bynta ba kin shna ïa ki pung jong ki.
La ju lap ruh ba man la u snem ka sorkar ka ju pynlut da ki klur tyngka ban ai skhim sha ki paidbah nong ri dohkha ban roi ha ka kam jong ki. Ki nongshong shnong kiba la don ïa ki pung kiba la shna na ki skhim ba ki la ïoh na ka Fishery Department, kumba long haduh mynta hi ki la kylla long pynban tang ki jaka pynïakop khwai ha kaba ka jingmyntoi ka long tang ïa kito kiba smat ban leit khwai ïa thong bad na ka bynta ki trai pung.
Ym lah ban len ba ka sorkar ha shuwa ban ai ïa ka skhim sha ki nongshong shnong ba kin shna pung dohkha, ka khlem da bishar bniah bad kam shym la buh ruh ïa ki kyndon ba kumno ki nong ïoh skhim ki dei ban pyndonkam. Nalorkata, la lap ba baroh ka sorkar kam ju ai kino kino ki jinghikai kiba biang ïa ki nongïoh skhim, kumno ba kin shna ïa ki pung, katno ka jingjylliew, kiei ki jait jingbam kiba dei ban bsa ha ka ban pynheh pynsan bad ba ki dohkha kin roi sted khang ban kyntiew ïa ka ïoh ka kot jong ki nong ri.
Haba phai pat sha ka jingdon jong ki pung ri dohkha ha West Khasi Hills haduh mynta, la lap ba lada baroh ki trai jong ki pung ba ki la shna lyngba ka skhim ba ki ïoh na ka sorkar bad ruh ki trai jong ki pung ba ki shu shna hi ki la ïoh ïa ka jinghikai pyntbit kumno ban sumar ïa ki dohkha ha ki pung jong ki, tang ki paidbah ka West Khasi Hills kim lah shuh ban pyndonkam, hynrei ki hap ban shalan ruh wat shabar ka jylla.
Ha kajuh ka por la lap ba ha man kawei pa kawei ka shnong hapoh ka District, ki pung ri dohkha ki don beit bad kaba duna eh ka long lai haduh saw tylli bad ki don pat ki shnong kiba don da ki phew tylli ki pung.
Kumta, lada uwei u nongri dohkha u lah ban pynmih tang kumba ar phew kilo ha ka shi taïew bad lada ki don san hajar tylli ki pung, ka jingpynmih dohkha kan ym duna shuh ïa ka shiphew metric ton.
Kumta na ka liang ka sorkar ka la dei ban shna noh ïa kino kino ki polisi kiba biang na ka bynta ban kyntiew ïa ka jingpynmih dohkha bad ba ka jingpynlut pisa ha kaba ai jingïarap ïa ki paidbah ban shna pung dohkha, khnang ba kan ym bijai ei kumba ka long ha ki snem ba la leit baroh.