Nongstoiñ, Ïaiong 1: Ki don shibun bah ki shnong ha ki thaiñ khappud kiba dang hap ban ïaid da ka kjat haba ki leit ki wan namar ka jingbym pat don surok kali. Ha kine ki khyndiat sngi u nongthoh khubor u ïoh ban ïakren bad ki katto katne ki rangbah na ki katto katne tylli ki shnong kum na Mawkhap, Sohramlep, Nongmawleiñ bad kiwei, ha kaba ki la pynpaw ïa ka jingsngewkhia halor ka jingbym don ïa ki surok kali, kaba la buh jingeh haduh katta katta ha ka kit ka bah bad ka leit ka wan.
U bah L.J Nongteiñ uwei na ki riew rangbah na ka shnong Nongmawleiñ, u la ong ba ha kine ki snem ba la dep, katei ka shnong ka la ïoh ïa ka surok kaba la pyntrei lyngba ka skhim MNREGS naduh Ïewnongma haduh ha shnong. Hynrei, katei ka surok ka neh tang katto katne bnai, namar ka dei ka surok khyndew bad mynta lei lei wat ki Mahindra pickup ruh shem shitom haduh katta katta ban ïaid ha ka por lyiur.
U la ong ruh ba mynta u snem namar ba duna slap ki don teng teng kiba ïaid, hynrei bunsien ki sahkut ha shiteng lynti da ki bun sngi. Nalor kata u bah Nongteiñ u la ong ruh ba la jan baroh ki shnong ha katei ka thaiñ ki im da ka rep kwai, tympew, ki soh ba laiphew jait, ki pai. Hynrei na ka daw jong ka jingbym don ka surok kaba biang, bun ki mar rep ki shu sep ei.
U la ong ba ha kine ki sngi ki soh phan ki shu hap ha madan namar ki la ih bha bad ban bam ruh ym lah bam, namar ha kawei ka dieng ki soh da ki spah tylli bad ban leit kit da u briew shaduh ki jaka ba lait kali ruh tang ka bai kit ym mih shuh, namar ba wat lada uba khlaiñ kit katno katno ruh ban kit tang saw tylli ruh um lah.
Ha kaba ïadei bad katei ka surok, u bah Nongteiñ u la kyntu ïa ka sorkar jylla ba kan thaw ki lad ki lynti ban mang pisa na ka bynta ban phah maramot ïa katei ka surok ba la pyntrei lyngba ka skhim MNREGS. Namar lada ym lah ban siang rong ruh lada mang pisa tang ban siang maw ruh ka la long ka jingmyntoi kaba khraw ïa ki paidbah.
Ha kajuh ka por u la ong ba hajan jong ka shnong Nongmawleiñ, ka don kawei ka jaka kaba u don u mawsiang u ba heh kat u lum bah bad ka jingïar jong utei u mawsiang ka la jan ïa ryngkat bad kawei ka madan phutbol kaba heh. U la ïathuh ruh ba ha jrong utei u mawsiang, man la u snem da ki spah ngut ki briew na ka jylla Assam ki wan kiew bad ki wan jngo hkai.
U la ong ba lada ka don ka surok kaba biang, ka jingdon jong katei ka jaka kan long ka jingkyrkhu kaba khraw ïa ka thaiñ, khamtam eh lada ka sorkar lyngba ka tnad jngohkai kan shimkhia ban pynitynnad shuh shuh ïa katei ka jaka, kan khring ïa shibun ki nongwn jngohkai khamtam ha ki aïom synrai ba ka suiñ bneng ka la khuid. U la kyntu ïa ki bor sorkar ba kin shimkhia lem bad phaikhmat sha katei ka thaiñ khnang ba kan long ka jingmyntoi ïa ki paidbah.
