Ka sorkar ka la pyntreikam ïa ka PMS ha baroh kawei ka jylla ban tehlakam ïa ka jngkiew dor

Shillong, Nailur 13 : Haba shimkhia ïa ka jingdawa jong ka kam, ka Tnad Food & Civil Supplies & Consumers Affairs, ka la shim ïa ki katto katne ki lad ki lynti ban tehlakam ïa ki dor ki mur jong ki mar ki mata bad pynthikna ïa ka jingdon jong ki mar na ka bynta ki nongshong shnong baroh. Ka bynta ba kongsan bala shim halor kane ka kam, ka dei ka jingpyntreikam ïa ka Price Monitoring System (PMS).
“Ka PMS kala don ha manla ki district, ka lum bad pynphriang ïa ki dor die lang bad dor khutia jong ki 22 tylli ki marbam mardih ban ïada ïa ka jingmyntoi ki nongthied nongpet bad ban pynthikna ba kine ki marbam kin dang long kiba lah ban thied da ki paidbah” ong ka kyrwoh na ka Tnad bala pyllait hynne ka sngi Thohdieng.
Ka la ong ba ha ka jingpyrshang ban pynbha ïa ka jingai jingkheiñ ïa ki dor ki mur jong ki mar ki mata ba manla ka sngi, ka Sorkar India kala pynbun ïa ka jingdon ki mar ba lah ban buddien kaba long na ka 22 sha ka 38 tylli, kaba la treikam naduh ka 1 tarik Nailar, 2024.
Kane ka jingpynïar ka kynthup ïa 16 jait ki marbam bala bynrap lang, kaba pynïahap lang bad kito ki mar bala buh thup hapoh ka Consumer Food Price Index (CFPI) jong ka Consumer Prince Index (CPI) ka Ministry of Statistic & Programme Implementation.
“Ka Shillong, Tura, Jowai, Sohra, Mairang, Nongpoh, Khliehriat, Nongstoin, Mawkyrwat, bad Williamnagar kila rung ha ka Price Monitoring System (PMS) applicaton, ban pynthikna ba ki dor jong ki mar ki mata kim dei ban palat ïa ka dor bala buh ha ka ri India baroh kawei” ong ka tnad.
“Ban ïada shuh shuh ïa ki jingmyntoi jong ki nongthied nongpet, ka Tnad ka la pynkhlaiñ ïa ka ki rukom peit bniah da kaba pynkha ïa ar tylli ki kyrdan jong ki Price Monitoring Committee kiba kynthup ia ka State Level Price Monitoring Committee bad ka District/Sub Divisional Vigilance & Monitoring Committee. ïa kine ki komiti la buh ba kin peit bniah ïa ki dor ki mur ki mar ki mata, ka kit ka bah bad ka jingleit jurip man ka por ban khanglad ïa ka jingbuhrieh mar, jingdie black bad ka jingpynkiew dor beaiñ ïa ki marbam” kala ong.
Ka Tnad ka la buh ruh ia ka Price Monitoring System (PMS) Dashboard, kaba buh ïa ka dor jong ki marbam ba kongsan man ka sngi ha kylleng ki District bad ki Sub Division. Kane ka MIS Dashboard ka dei ka atiar kaba kongsan ban pynlah ha ka ban shim ïa ki rai ba kongsan da ki heh jong ka tnad. ïa ka Retail Price MIS jong ki dor marbam jong ka jylla Meghalaya lah ban ïoh na ka website jong ka tnad https://megfcsca.gov.in.
Nalor kane, ka kyrwoh ka la ong, ka kamram ba hakhmat eh jong ka tnad Food & Civil Supply ka long ban pynthikna ba ki mar ba kongsan kin dang long kiba lah ban thied da ki paidbah ka Meghalaya.
“Ka Tnad ka shimkhia ban khanglad ïa ka jingbuhrieh ïa ki mar, ka jingdie tuh, bad ka jingpynkiew dor thok, bad ban pynthikna ïa ka jingdon jong ki mar ba kongsan ha ki ïew paidbah. Kum u Myntri uba sngewkhia, nga pynthikna ïa ki paidbah ka Jylla Meghalaya ba ngin dang bteng ban trei shitom ha ka ban pyntreikam hok ïa ki aiñ bad ki polisi, ban pynthikna ïa ka bha ka miat jong baroh ki nongshong shnong,” la bynrap.
Ha kawei pat ka liang, ka tnad ka la ong ba ki don bun ki daw kiba la pynlong ïa ka jingkylla ki dor jong ki marbam mar dih ha Jylla , khamtam ha ki marbam ba kongsan ki mar kum u khaw, ki shana bad ki jhur.
Ka jingbym thikna bad jingwan slem u slap lyiur bala mad ha kylleng ki bynta jong ka Ri, kala lam sha ka jingtyrkhong, kaba ktah ïa ka jingpynmih ïa ki khaw bad jhur. Ha kiwei ki thaiñ ka Ri, ka jingther u slap kala lam sha ka jingshlei um ba shyrkhei bad pynjulor lut ïa ki jingthung jingtep bad nang pynduna shuh shuh ïa ka jingkhaïi.
Nalor kata, da ka jingbun briew jong ka India kaba palat ïa ka shi billion, ka jingpynbiang bunsien ka hap ïaksaid ban lah pynbiang ïa ka jingdawa, kaba ïalam sha ka jingkiew dor. Ka jinglong jong ki jaka ha Jylla bad ka suiñ bneng kila nang tynrong ïa ka jingbym lah pynbiang tarajur ïa ka jingpynbiang marbam bad ka jingdawa. Ka jingheh ka dor bai bylla bad ka bai kali kala nang pynkhia shuh shuh ïa ka jinglong jingman.
Ka jaka lum jong ka Meghalaya ka nang pynkiew ïa ka jinglut jingsep ha ka leit ka wan, kaba hadien ka poi sha ki nongthied nongpet. Ka jingshaniah jong ka jylla ha ka jingwanrah ïa ki katto katne ki mar na shabar ruh ka la pynsniew ïa ka jinglong jingman, namar ka jingkylla ka ïew ka hat sha kiwei ki jaka, kala ktah ïa ka dor hangne.