Ka Sorkar ka dei ban pynshitom ïa kiba pyndonkam bakla ïa ka pisa MMMRF, dawa ka HYC

Shillong, Jylliew 27: Ka Hynñiewtrep Youth Council (HYC) ha ka sngi Thohdieng ka la dawa ban pynshitom pyrshah ïa ka jingkynnoh ba pyndonkam bakla ïa ka Meghalaya Minor Mineral Reclamation Fund (MMMRF).
Katkum ka jingong u President ka HYC u Bah Roy Kupar Synrem, katto katne ki jingdkoh bad ka jingpynïapher na ki guideline ba la pynbna naba la shem bad ka jingpyndonkam ïa ka Fund kaba mut ne thmu na ka bynta ka jingkam halor ka sawdong sawkun (environmental reclamation).
Ïa kane la pynpaw na ka jingshem hapoh ka RTI, ka application kaba la pan ha ka 28 tarik u Lber, 2025 bad ka 6 tarik Jymmang, bad ka ophis jong Conservator of Forest (HQ)-cum-Public Information Officer, O/o PCCF & HoFF, Meghalaya, Shillong, u la ong.
U Bah Synrem u la buh ruh ka jingkylli halor ka jingthied ïa ki kali Scorpio S11 BS 6.2 na ka bynta ka JHADC bad GHADC ha ka jinglut kaba long T. 38,34,996.
Ki jingtyrwa ban thied la aiti ha ka 29 tarik u Kyllalyngkot, 2025, hynrei ka jingïalang ka Executive Committee kaba la long ha ka 22 tarik u Kyllalyngkot, 2025, ka khlem ïa syllok ne mynjur ïa kine ki jingtyrwa.
Ha ka jingïalang ba nyngkong ka General Body kaba la long ha ka 7 tarik u Nohprah, 2022, ka la pdiang ïa kine ki jingtyrwa, da kaba kdew ïa ka paragraph 7(5)(h) jong ka guidelines, kaba pynpaw ïa ka jingai ïa kitei ki kali, ka jingpyndonkam ïa ki, bad ban pyndonkam ïa ki kali patrol ban lap bad ïada na ka kam tih marpoh khyndew beaiñ.
Ka HYC ka la kdew ruh ba ka pisa T. 17,09,288 la pynlut da ka MMMRFMA khlem da khot ïa ka tender ne ka notice inviting quotation ban thied ïa ki laptop, desktop, bad kiwei kiwei ki tiar electronic. Kane ka jingduna ka rukom treikam kaba shai bad ka competitive bidding process ka la wanrah ka jingsngewkhia halor ka jinglah ban don ka jingshah liang bad ka bamsap.
Ka HYC ka la pynpaw ba ïa ka Eco-Development Society (EDS) project na ka bynta ki kam jngohkai kiba la trei ha bad sawdong ka Nongkhyllem Wildlife Sanctuary, kaba la dei ban mynjur na ka bynta ka T. 20,09,01,750.
Ha kawei ka liang pat ki briew kiba ïoh ka bor ban soi ki la ai ka cheque na ka bynta T. 21,23,93,331 khlem da pynshai ïa ki jingshisha bad ki dor, ha kaba kane ka la lam sha ka jingsuba ba ka lah ban don ka jingpyndonkam ïa ki pisa.
Halor kine ki jingdkoh, ka HYC ïa u Myntri Rangbah ban shim kam da kaba tyngeh pyrshah ïa kito kiba donkti bad ban pynthikna ba ïa pisa la pynïaid bad pyndonkam ha ka rukom kaba dei, kaba ïaid beit bad kaba shit ba shai, ong u Bah Synrem ha ka kyrwoh khubor.
Ka HYC ka kyrpad ruh ïa ka High Court ka Meghalaya ban peit lem ïa kane ka kam bad ban ai ki jingbthah kiba donkam sha ka sorkar jylla halor ka jingpyndonkam ïa ki pisa, u la bynrap.