Ka MRSSA ka aiñ jylla ba lah ban pynkylla, ka ILP yn hap ap jingmynjur na ka Sorkar Pdeng: Bah Paul

Shillong, Jylliew 27: U Nongaiktien ka sorkar MDA bad u Myntri ka sorkar u Bah Paul Lyngdoh ha ka sngi Thohdieng u la banjur ba ka Meghalaya Residents, Safety and Security Act (MRSSA) kadei kaba la pynbha hapoh ka rukom treikam ka Inner Line Permit (ILP) system.
“Ka MRSSA kam dei kaba la bujli ne kaba ïasoh sha ka ILP hynrei ka MRSSA ka dei ka aiñ jong ka jylla ha kaba ka sorkar bad kumjuh ka Ïingdorbar Thaw Aiñ ka jylla ka la don bun tylli ki jingïatai bad kadei ha kawei ka jingmut kaba la kham pynbha halor ka ILP namar la dep ban shna bad thaw da ki nongthaw aiñ kane ka spah snem mynta,” ïathuh u Bah Lyngdoh sha ki lad pathai khubor.
Ïa kane u la pynpaw halor ka jingkren ba dang shen ba la wanrah da ka liang pyrshah ka opposition Voice of the People Party (VPP) ba ka MRSSA kam lah ban bujli ïa ka ILP.
U Bah Lyngdoh kdew ruh ba ka ILP, kaba la mih na ka Eastern Bengal Frontier Act ba la shna da ki nongsynshar syiem (Colonial Rulers); hynrei ka MRSSA ka shah ïa ka Ïing Dorbar Thaw aiñ ba kan wanrah ki jingpynkylla na ka por sha ka por katkum ka jingdonkam. Kane ka jinglong jynsur ka ïarap ïa ka sorkar jylla ban pynbha halor kane ka aiñ khlem da ap ïa ka jingai jingmynjur ka sorkar pdeng.
U Myntri u la pynpaw ruh ban don ïa ka aiñ ka jylla kum ka MRSSA ka ailad laitluid ïa ka sorkar jylla ban pynbha ha kano kano ka por. U la ïeh ruh ha jingstad ki nongjied ban sngewthuh ïa kane ka jingkongsan ban don ïa ka aiñ ka jylla kaba lah ban pynkylla katkum ki jingdonkam ka jylla.