Ka SIR kan wanrah ka jingkylla kaba khraw bha ha ka jaka puta, khyndew ka shyiap: HYC

Shillong, K’ Lyngkot 23: Ka seng Hynñiewtrep Youth Council (HYC) ka la pynpaw ka jingnud ban ïaleh bad ka sorkar jylla ha kaba ïadei bad ka jingpynïaid shakhmat ïa ka Special Intensive Revision (SIR) haba ïadei bad ka jingpynbiang ïa ka kam ban jied ïa ki nongmihkhmat paidbah ha ka elekshon ha ka thaiñ Garo Hills, da kaba ong ba kum kane ka jingleh kan pynpaw bad wanrah ka jingkylla kaba khraw bha ha ka khyndew ka shyiap ka jaka puta ha kane ka thaiñ.
U President ka HYC u Bah Roykupar Synrem u la ong ba kane kane ka kam ka la kylla long kaba kyrkieh bha haba ïadei bad ki jingmih ki jingsngewkhia halor ka jingkynnoh ba la don bun ki briew kiba sah beaiñ ha kine ki jaka ba long rithor, kyrpang hadien ba ka la don ka jingjia shah pynïap jong u nongïalam sengbhalang u Dilseng A Sangma ha ka thaiñ Rajabala.
U Bah Roykupar Synrem u la buh ka jingkylli ïa ki nongïalam ka jylla ba balei ki la pulom ban wanrah ka jingpyntreikam ïa ka Inner Line Permit, wat hapdeng ki jingkyrpad kiba bunsien, bad ka jingpynpaw ka jingma halor ka jingïai sam ïa ki kot ki sla kiba thok.
U la kynnoh ba ka jingrung tuh ka dang ïai jia wat ha ki jaka ba la ker sainar shiah ha ki thaiñ khappud, da ka jingdon ki kynhun kiba khlem kot khlem sla ba la ïoh jingtip ba ki la ïaid lyngba ka Meghalaya ha ka por mynmiet ha shwa ba kin leit sha kiwei pat ki jylla hapoh ka ri.
U Nongïalam ka HYC u Bah Roykupar Synrem u la pynrem jur ïa ka jingtlot ki jaka ba pyntreikam ïa ka aiñ na ka bynta ban shim kyrteng ïa ki poi wir lyngba ka migrant registration law, da kaba ong ba watla ki kyndon aiñ ki don, hynrei ka jingduna ka jingshim khia bad jingmon jong ka saiñ pyrthei ne ka sorkar ka la pynlong ïa ki aiñ ba kim khlaiñ bor hapoh ki jaka ba ki pyntreikam.