Ka aïom Khristmas ka la poi bad ha baroh kane kadei ka aïom jong ka jingkyrmen. Ka Khristmas kadei ka jinglehkmen kaba khraw tam ha ka pyrthei, ha kaba baroh ki bynriew ki tip lut ïa ka jingkordor kane ka sngi kaba bun ruh ki pynlong ïa ka kum ka aïom. Na ka bynta kiba bun ka Khristmas kadei ka por jong ka jingkyrmen bad ka jinglehkmen ha ki ïing ki sem ha ki Balang bad ha ki shnong ki thaw ruh kumjuh.
Balei la ong ba ka Khristmas kadei ka aïom jong ka jingkyrmen, ka daw ka long ba ïa ka Khristmas la rakhe kum ka sngi kha jong U Jisu Khrist, u Nongpynim jong ka pyrthei uba long ka jingkyrmen na ka bynta kiba duh jingkyrmen, uba long ka jingsuk na ka bynta kiba im ha ka jingjynjar. Ki jingïathuh halor ka Khristmas ki ïathuh ba ïa U Jisu la kha ha ka jinglong duk bad ka jinglong rangli bad dei namar kane ka daw ba ki mih ha kine ki sngi ki jingleh isynei na ka bynta ki briew kiba duk kiba rangli. Bun ki kynhun ba ki Seng bad ki riewshimet ruh, ki buh kyrmen ïa ka aïom Khristmas kum ka aïom ban leh ei ei ne ban ïarap ïa ki briew kiba duk. Ki briew ha la ka jong ka jong ka jingsngewthuh ki rakhe ïa ka Khristmas ban leh eiei na ka bynta ki briew kiba duk kum ka jingpyndon burom ïa U Jisu Khrist.
Wat lada ka Khristmas ha ka jingshisha la ñiew kyntang tang da ki Khristan, namar kadei ka sngi ha kaba la kha ïa U Nongseng ïa ka Balang Khristan, pynban namar ka jingïar jong ka jingmut bad ka jingkordor jong ka, ka pyrthei baroh kawei ka tip ïa kane ka sngi, wat ki bym long Khristan. Dei namar kane ka daw ba ha ki aïom Khristmas, ki mih kita ki jingleit ïew Khristmas ne kita ki ki mih ki jingai sngewbha Khristmas, ki jingai khublei Khristmas bad kumta ter ter. Ym tharai ba kiba leh ïa kine ki long tang ki Khristan, hynrei kin don ruh kiwei ki bym dei na ka niam Khristan kiban leh ïa kane.
Kawei na ki jingïakren ha kine ki sngi ba mynta ka long kata ka jingbym sngewthuh shuh jong ki paidriewngeit ne kum ki Khristan ïa ka jingmut jong ka. Kane kadei ka jingshisha, namar ka jingkha ïa U Jisu Khrist sha ka pyrthei kam dei na ka bynta ban pynlong kam tamasa hynrei ban pynim ïa u para briew. Kumta ka jingmut ba shisha jong ka Khristmas ka long ban pdiang ïa ka jingwan long briew jong U Jisu Khrist ha ki dohnud jong ki briew. Hynrei lehse kan long kaba bakla pat ban khang ïa ki briew ba kin ïathied ïa ki jain kiba thymmai ne ban ïathied ïa ki jingbam na ka bynta ka Khristmas. Ka daw ka long ka Khristmas kadei ka por ha kaba ki khun ki kti jong kano kano ka ïing ka sem ki la kut ïa ki skul bad ïoh ïa ki result na ki jingïaleh eksamin jong ki.Ki kmie ki kpa kum ka dak ka jingkmen namar ba ki khun ki la kiew sha kawei pat ka klas ki pynthied jain thymmai ba kin phong ha ki jingïaseng Khristmas nangta ki thied jingbam ruh ban ïoh ïa dihsha bad leh kmen ha ka por Khristmas. Kadei ruh ka por kaba wanrah lang ïa baroh shi ïing shi sem hadien ki shuti khamtam ïa kito kiba pule ne ba trei sha jngai. Haba ïakynduh kumne teng teng donkam ka jingïabam sngewbha kum ka dak ka jingsngewnguh ïa U Blei.
Nangta na ka bynta kito kiba ïarap ban thied jain thied nep na ka bynta kiba duk, hap ban thied namar lada ym thied yn ïoh naei?. Kumta ym lah ban ong ba kano kano ka jingthied riam ne ka jingthied bam ha ka por Khristmas kadei kaba bakla. Hynrei da ka jingthied kumne pat ka long ka jingïarap na ka bynta kiba kwah ban ïoh eiei ne ïoh ban kamai ïa ka ïing ka sem ha ka por Khristmas, kum ki briew ba die ïa u dieng Khristmas, kiba die ïa ki jingbam tang ha ka por Khristmas bad kumta ter ter.
Hynrei kaei kaba kham donkam eh, kadei ka mynsiem, ha kano ka rukom ngi pynlut pat na ka bynta kane ka por leh kmen. Hato ngi pynlut khambun na ka bynta ki rong phong jong kane ka pyrthei, ne ki ngi pynlut khambun na ka bynta ka kam jong U Blei. Kadei ha ka jingsngew thuh shimet shimet, namar haba la sngewthuh ïa ka jingkyrkhu U Blei, lada pynlut na ka bynta ka jingbha, kam long satia kaba bakla.
