Shillong, Nohprah 14: Hynne ka sngi Palei u Myntri khynnah ka sorkar jylla ba bat ïa ka tnat ïalehkai, u Bah Shaliar Warjri u la pynbna ba ka sorkar ka la mang 23 klur ban pynlut na ka bynta ka Meghalaya games ka ban sa long ha Tura naduh ka 15 tarik ha duh ka 20 tarik u Kyllalyngkot, snem 2024.
Ha ba ïakren bad ki ladpathai khubor, na ka liang u bah Shakliar Warjriu la pynpaw ba ka Sports department ka la nang pynkhreh shait shait ha ka ban pynlong ïa ka Meghalaya games 2024, katkum ka jingïohi jong u haba leit jngoh dalade ïa ki jaka ban sa pynlong ïa ki jingïalehkai bapher bapher.
U bah Warjri u la wanrah ruh ba ka jingthmu kaba kongsan ha ka ban pynlong ïa kane ka Meghalaya games ka long ban plie lad ïa ki khynnah ki ba don sap ha ki jingïalehkai sports bad ruh ban btin lynti ha kaba dei, bad lyngba kane ka rynsan ki khynnah ki lah ban pynpaw pyrthei ïala ka jong ka sap kaba maki ki don.
Nalor kane, u la pynpaw ruh ba ka jylla ka kyrmen ba lyngba ka Meghalaya Games ka jylla kan sa ïoh ban sei ïa ki khynnah kiba don sap ha ka sports bad ruh ban dang ïoh kyntiew shuh shuh ïa ki haba ki mihkhmat ïa ka jylla sha ki rynsan bapher bapher wat ban ïoh mihkhmat ruh ïa ka Ri.
Ha ka ba ïadei bad ka jing pynkhreh ïa kane ka lympung, u la ïathuh ba kam shym la don kano kano ka jingtei kaba thymmai ban pynlong ïa ki jingïaleh kai, hynrei na bynta kane la pynkhreh ban pynlong ha kylleng ki skul, ki college bad ki jaka ïalehkai ki ba la don ha Tura.
U la ong ruh ba ka jing mang ka sorkar jylla ban pynlud haduh 23 klur na ka bynta ka Meghalaya games ka dei na ka bynta ban peit bñiah ba ki nong wanïashim bynta kin ioh ïa ki jing don kam jong ki ki ba kynthup na duh ka bam ka ba biang, ka leit ka wan bad kiwei kiwei pat ki jing don kam.
Nalor ki jait jingïalehkai kiba don ha ka thup jong ka Olympic Games, ka sorkar ka la shonng pyrkhat ruh ban kynthup ïa ki jait jingïalehkai tynrai (Traditional Games).
