Ka shnong Majai ka kad khaïi mawshun, ka surok kaba sniew na Umwai sha Ichamati

0

Shillong, Risaw, 06: Watla ka shnong Majai kaba don ha khappud bad ka ri Bangladesh dei kawei na ki kad khaïi mawshun kaba heh tam naduh ba la plie ha u snem 2004 hynrei ka jingjot jong ka surok naduh ka shnong Umwai ter ter shaduh ka shnong Pyntha Umdan (Ichamati) ka la pynlyngngoh ïa ki paidbah nongshong shnong ïa ka jingbym phai khmat jong ka Sorkar Jylla ban shna pynbha ïa ka surok kaba pynïasoh ïa kiba bun tylli ki shnong ha kane ka thaiñ Riwar kaba jur bha ïa ka jingpynmih u mawshun.
Ka jingjot rathai jong ka surok ka la pyndiaw mynsiem haduh katta katta ïa ki paidbah bad khamtam ïa ki kali kit marbam kiba ju sahkut wat haduh ban sah miet ha surok na ka daw ka jingjur shaba palat ka jingjot ka surok kaba wanrah pat ïa ka dheng kali na ka jingïaid jong ki trok kit mawshun kiba khaii sha Bangladesh.
Ha ka sngi Saitjaiñ jong ka taiew ba ladep, ki nongïalam jong ka Khasi Students Union (KSU) South Khasi Hills District Unit lem bad ki nongïalam jong ka shnong Majai Umdud ki la hiar jurip ïa ka jinglong jingman jong ka surok shwa ba kin leit tied ïa ka jingkhang jong ka Sorkar Jylla.
“Ka surok ka dei kaba ngi ïoh ha ki snem 1971 hynrei haduh mynta ka Sorkar Jylla kam shym la phai khmat ban peit lem ïa ka jingsniew bad ka jingjot rathai jong kane ka surok kaba la pynsyrtok haduh katta katta ïa ki paidbah kiba shong basah ha ki shnong ka thaiñ Riwar kiba don ha khappud,” ong u Acting Sordar jong ka shnong Majai, Hima Sohra u Bah Star Marbaniang.
U la ïathuh ruh naduh ba la sdang ka jingkhaii mawshun ha u snem 2004, ka surok ka la nang sniew ar shah naduh ka shnong Majai ter te shaduh ka shnong Pyntha Umdan (Ichamati).
U Acting Sordar u la kyrpad ïa ka Sorkar ba ka dei ban pynkhreh noh kham kloi ïa ka Detailed Project Report (DPR) na ka bynta ban siang rong noh ïa kane ka surok kaba la pynsyrtok haduh katta katta ïa ka leit ka wan jong ki paidbah kiba im ba sah ha ki hynñiew ne phra nongshong shnong.
“Ki la don ki khep ba wat ki kali kit marbam ruh ki hap thiah miet ha surok namarba bun shaba palat ki trok kiba sakut ha lynti bad kaba wanrah ïa ka jingdheng kali kaba jur ha shilynter ka surok na ka daw ba ka surok ka la sniew shaba palat,” ula ong.
Shuh shuh u la ïathuh ba naduh u snem 2010, ka la don ka jingmang pisa ban siang rong noh ïa ka surok naduh Wah Japuh ter ter shaduh ka shnong Majai hynrei kane ka kam ka la urlong satia naba ka jingtrei ka shu long tang shipor haba wat ïa ka jingkieng kaba la shna ruh ym shym la tei pyndep satia.
Ki la don ki khep ba ki nongïalam shong ki la leit pynsngew ïa kane ka jingeh ha u MLA ba la khladnoh jong ka Shella Constituency u Dr. Donkupar Roy hynrei kane ka jingpynsngew kam shym la urlong satia tad haduh kine ki sngi.
Katkum ka jingïathuh jong jong ki nongïalam shnong, ka surok ka don hapdeng ka jingpynkhreh jong ka tnat PWD, Sohra Division na ka bynta ban siang rong naduh Pyntha Umdan shaduh Majai Umdud ter ter shaduh Tharia Sohbar.
U General Secretary ka KSU South Khasi Hills District Unit u Bah Edmund Khongsya u la ong ba ka seng ka la lap ba ïa kane ka surok la sdang ban pruid dak naduh ki snem 1971,1972 ter ter.
“Hynrei ngi kwah ban buh jingkylli ïa ka Sorkar Jylla da ka jingsngewkhia ba balei haduh ki snem 1971,1972 ka Sorkar kam shym la shim khia haduh mynta ban shna pynbha ïa kane ka surok nalor ba ka jingkieng ruh ka la don ka dak orpait,” u la ong.
“Ngi tip ba ka shnong Majai ka dei ka kad khaïi kaba la sdang naduh u snem 2004 hynrei kaba lyngngoh balei pat ka Sorkar ka lum tang ïa ka khajna katba kam shna pynbha pat ïa ka surok,” la buh jingkylli une u nongïalam ka Seng.
“Lada ka tnad PWD kam lah ban shimkhia ne kam lah ban pynbha kan jin da la bha ban pan jingïarap pisa na ka Sorkar Pdeng ban shna ïa kane ka surok lyngba ka skhim PMGSY,” u la ong.
Ka Seng ka la kyntu ïa ka tnat PWD ba kan leh noh marmar shwa ban wan iuh kjat biang sa shisien ka aiom lyiur ha u snem u ban sa wan bad ban maramot noh mardor ïa ka jingkieng kaba la jan khyllem.
“Ki briew kiba shong shuki ha Secretariat ki dei ban phaikhmat lem sha kane ka thaiñ naba kim dei ban shu lum tang ïa ka khajna. Ngin ym shongthait bad ngin sa nang ïai buddien ïa kane ka kam,” ong shuh shuh u Bah Khongsya.

Leave A Reply

Your email address will not be published.