Ka pule puthi, ki jaka sumar, ka ïoh kam; ki mat u Bah Anthony pyrshah ïa u Bah Prestone

Nga mih na ka NPP ba ngam ïahap ïa ki rukom treikam u MLA

0

Shillong, Risaw 07: U Bah Anthony Kongwang uwei na ki nongkyrshan ba radbah jong u Bah Prestone Tynsong ha ki ilekshon ba la dep uba la rai ruh mynta ka kynti ban ïakhun pyrshah ïa u u la ong ba dei ak jingbym ïahap bad ki mat bad ki nongrim treikam jong u MLA bad ka NPP hi ba u la shim ïa kane ka rai bad ban pynïasoh noh pat sha ka United Democratic Party(UDP).
Haba ïakren kyrpang tang bad u Mawphor u Bah Anthony Kongwang u la ong ba kane ka sien jam ba u la rai ban rung sha ka UDP bad ban pan tiket ban ïakhun ïa ka ilekshon ka long ban wanrah ïa ka synshar khadar kaba khuid ba suba ha ka thaiñ na bynta ka jingmyntoi jong ki paid nongshong shnong jong ka constituency hi baroh kawei.
“Ka synshar khadar kaba khuid na bynta ki nongshong shnong khlem da peit shiliang khmat ka dei ka thong kaba nga angud ha khmat eh” ong u Bah Anthony.
U la ong ka jingbym don ki jaka pule kiba biang ha ka thaiñ ka long ka jingeh kaba ki longïing ki mad na bynta ban pynnang pynstad ïa la ki khun ki kti jong ki “pyrkhat kat ka thaiñ Riwar kaba da kiba bun tylli ki shnong ki la don hynrei kawei ka Secondary School ban pynïaid da ka sorkar kam don ynnai ïakren halor ki kolej lei” u la ong.
U la ong ruh ba ban wanrah ïa ka kolej sorkar ha ka thaiñ ka dei kawei na ki jingangnud kiba na ka liang jong u u buh ha khmat eh. “Pyrkhat ïa kito ki samla kiba wan na ki long ïing kiba duk bun bah na ki kiba hap sahngeh shiteng por ha ka jingpule jong ki, ba phin tip ka dropout rate ruh ka heh bha ha ka thaiñ jong ngi dei na kane ka dazw keiñ ba nga ong ba donkam ban wanrah ïa ka Government Collge ha Pynursla” u la ong
Shuh shuh u la ïathuh ruh ba u buh ha khmat ïa ka ïohkam ïoh jam ki samla namar kumba long mynta ka jingkyrduh kam ki samla kiba la nang la stad ruh ka jur bah ha ka ka thaiñ namar ym don satia ka jingbtin lynti ïa ki ban seng kam lajong bad ong ruh ba ki samla kiba la nang la stad ki hap shaniah beit tang ha ban wad da kam sorkar palat ïa kata kim don da kiwei pat ki lynti.
“Lada phi peit ka thaiñ Riwar Mihngi ka dei ka thaiñ ba riewspah bha ha ka jingdon jingem ka mariang hynrei ym ju don mano mano ban btin lynti ïa ki ban seng kam lajong la haba dei bad ki kam jngohkai pyrthei ne kiwei pat ruh ki lad kamai. Ki soh sha ka thaiñ ki kynrei bha hynrei ym ju don ba btin lynti kumno ban thaw kam kum ban seng ïa ki Food Processing Unit, namar ha ka jingshisha lada don kum kane ka jait kam ym dei tang kiba seng ïa kane ka kam kin ïoh kamai hynrei wat ki nongrep ruh kin bha kamai lang”, u la ong.
U la ong ba ka jingbym lah ki samla ban thaw kam hi ka dei beit ka jingbym ïoh bai seng jong ki, “namar kata don kam ïa ki Financial Institution ba kin ïarap ïa kane ka bynta bad ban btin lynti ruh ïa ki lad ki ka sorkar ka ai na bynta ki samla hynrei kumba long mynta kum kane ruh kam don” u la bynrap.
U la ong ruh ba ka jingdon ka thaiñ ha ki khappud ka India bad Bangladesh ka dei ka lad kamai kaba biang bha lada don ki ïew khappud da kaba ong ruh, “lada u paidbah u pynkhamti ïa ka lyngkor ngan pyrshang ban pynïoh ïa ka iew khappud na bynta ka jingmyntoi jong ka thaiñ hi baroh kawei”.
Shuh shuh u la ïathuh ba na ka liang jong u Bah Anthony u la ong ba ki jaka sumar ha ka thaiñ donkam ban pynjanai ïa ka jingshakri jong ki ym tang ban pynheh ïa ki building hynrei ban pynthikna ba dei ban biang ki doktor, ki dawai bad ki lad jingsumar.
“Lada biang ka jaka sumar ym tang ba kin ïoh sumar tang ha Pynursla hynrei wat ka dheng kali ha sor ruh kan duna da katto katne namar mynta phi donkam tang ban leh X-ray ne ka test barit eh ruh phin hap wan beit sha Shillong” u la ong.
U la ong ruh ba ka jingmih hi jong u ban pan tiket ban ïakhun pyrshah ïa u Bah Prestone ym namar ba don daw eiei bad u hynrei namar ka dei ka jingdonkam ka thaiñ ban wanrah ka jingkylla ha ka synshar khadar.
“Don kiba kynnoh ba ka jingmih jong nga sha khmat ka dei namar ba phahu Bah Prestone bad don ruh kiba ong ba ngam ïoh kam kontrak bad kiba laiphew rukom kiba pyrshang ban ïalam bakla hynrei nga kwah ban kren da kaba shai ba kine baroh ki dei tang ki khubor lamler hynrei ka jingmih jong nga sha khmat ka dei beit da ka mynsiem ba sngur ban shakri ïa ka thaiñ bad nga kwah ba ki nongshong shnong jong ka thaiñ ruh kin tip shai ïa kane” pynshai u Bah Anthony
Haba jubab halor ka tiket UDP na Pynursla, u Bah Anthony u la ong wat la ka party kam pat rai ïa ka tiket hynrei u ngeit skhem ba ka party kan ibit ban pynïakhun ïa u kum u kyrtong jong ka.
Haba ïadei pat bad ka jingjied jong u ïa ka party u la ong ba ka dei namar ki paidbah hi baroh ki la kwah ba un leit sha kane ka party “na ka liang jong nga lei ha ka por ba nga mih na ka NPP ngam mut shuh ban dang don bynta ha ka saiñ hima hynrei dei u paidbah hi uba khot ïa nga namar ki kwah ba ngan mih shakhmat ban aireng na ka UDP” u la ong.

Leave A Reply

Your email address will not be published.