Da ka kam ñiah Trok ha Amazon, bsa ka Kong Joycy Lyngdoh ïa ka ïing ka sem

Shillong, Risaw, 07: Ka Kong Joycy Lyngdoh kaba la 35 snem ka rta na ka jylla Meghalaya ka la ïoh ïa ka nam kum ka draibar trok kynthei banyngkong eh ba ïa treilang bad ka company Amazon bad ka la pynkheiñ ïa ka jingong ba ki kynthei kim lah ban trei ïa ka kam kaba ki shynrang ki trei.
Hadien ba ka kong Joycy ka la trei ïa kane ka kam ka la lah ban ai mynsiem ïa kiba bun pat kiwei ki draibar kynthei. Hadien hynriew snem ba ka Kong Joycy ka la ñiah kali ka la kwah ban pynkylla noh ïa ka jingthrang ñiah kali jong ka sha ka lad kamai ja kpoh bad khlem da mutdur shuh ban pyrshang ban trei da kiwei kiwei pat.
Ka Kong Joycy ka bsa hi marwei ïa ka ïng ka sem, kata, ïa ki lai ngut ki shipara kynthei bad ïa la ka kmie ba kha. Hadien ba la pyndep ïa ka jingpule, ka Kong Joycy ka la trei ha kiba bun ki kompeni ha Guwahati kynthup ïa ka kompeni shna nar bad ka la trei ruh kum ka Manager ha kawei ka dukan. Hadien kata ka la pyrshang ban ñiah kali da kaba phah hikai ha ki paralok jong ka bad ynda ka lah nang bha ka la sdang nyngkong eh da kaba niah School Bus. Ka la pynneh ïa ka kam niah kali ha kiba bun ki kompeni hapoh ka nongbah. Kata ka jingthrang jong ka ka la plie kabu ïa ka ban pynïasoh bad ka kynhun niah trok jong ka Amazon ha kaba ka la trei kumba shi snem mynta. Ka Kong Joycy ka la sngewthuh stet bha ïa ka jinglong jingman ha ka rukom treikam ka kompeni bad ka la lah ban pynpoi tiar kham kloi ha ki ïng briew ha sor Guwahati.
“Ka Amazon India ka la kyntiew bha ïa ka imlang sahlang jong nga. Nga ju sngewtynnad eh ban don ha surok ban niah kali na kawei ka jaka sha kawei pat bad ïoh ban kynduh ïa ki briew bapher bapher. Kane ka lad ka la pynurlong ïa ka jing thrang jong nga bad ka la ai ruh ïa nga ka lad ban ïeng ha la ki kjat. Nga kwah ban ai jingmut ïa ki para kynthei ba kwah ban kamai ja kpoh na ka kam ñiah kali haba phi thrang ka lad kan plie na bynta jong phi. Phin kynduh jingeh shibun, tangba haba don ka mon, ka don ruh ka lad” ong ka Kong Joycy.
Ka Amazon ka la ïateh lok bad kumba 500 ngut ki nongñiah trok ha India kiba pynpoi biang por bad pynpoi suk ïa ki tiar jong ki nongthied. Ka kompeni ka ai ruh ïa ki Health bad Accident Insurance na ka bynta ki draibar jong ka. Shuh shuh ka la pyntreikam ïa ki tiar teknology ban pynsuk bad pynshngaiñ ïa ki draibar jong ka ha kaba ki kit tiar kylleng kylleng khlem da don jingwit.
U Director jong ka Middle Mile Operations, Amazon India u Venkatesh Tiwari, u la ong, ‘ki draibar trok jong ngi ki long ki nong pyntyllun bad pynshad ïa ki jingtreikam jong ka konpeni bad ka kompeni bad ki draibar ki la ïatreilang ban pynlong ïa ki program ban ai jinghikai kumno ban husiar haba ñiah ïa ki kali bad ruh ban ai ïa ka jingstad ha kaba ïadei bad ka tip lad tip lynti ha ka por ba leit rah ïa ki tiar. Ka Kong Joycy ka la ïashim bynta ha kine ki prokram bad ka la long kum ka nuksa ba khraw na bynta kiba kwah ban wad kam ha ki laiñ Logistics. Ki briew kum ka Kong Joycy ki long kum kita ki nonglam lynti ban pynurlong ïa ka Atmanirbhar Bharat bad kyntiew ïa ka.” Mynta ki kynthei ki long khlieh ha kiba bun ki tnat kum ka Amazon Fresh, ka AWS Public Sector bad kiwei kiwei.