Ka por ka donkam ban pynneh ia ki tyllong um

0

Ka jylla ka ker tawiar da ki khlaw ki btap ba rben bad ba jyrngam bad lyngba jong ki, ju kyrsoi pat ki umpohliew kiba da bang bad shngiam pat haba dih ia ki. Ka jingkyrsoi jong ki umpohliew, ym tang ba ka lah ban pyndap ia ka jingdonkam jonng u briew, pynban kaba tam ka da kyrsoi shisha haduh katta katta kaba lah pat ban ring nur pat ia ki ban tan sha ki lyngkha naka bynta ban ioh pat ban rep ban riang.
Haba baroh ki saw aiom jong ka snem, lait noh tang ha ka aiom pyrem, haba ka bneng ka sdang ban ring tyrkhong bad ap ia ka jingwan ka aiom lyiur,ba ki umpohliew ki rit bad ki rngat, hynrei ki iai long pat kiba la pynkhreh ba kin shim iala ka kamram ban pyndap ia ka jingdonkam ka jong u khun bynriew.
Pynban ha ka juk ia beh ia ka spah ka jingbeh than eh ia ka jingsuk pyrthei ka pynlong ia ka mynsiem u khun bynriew ba un khynra hi war ia kiba bun ki tyllong um, ha kaba sdang eh, u pynjot ia ki khlaw ki btab, u dain u khrai ia ki dieng ki siej, u da dusmon da tyngeh ia ki kynbat dawai, haba um sngew iohnong na ka khlaw, u hiar sha ki jaka ba kham them haba ka um ka lang, hangne u pyndonkam da ki kor ki bor ba khlain ban sam lyngba ia ka khyndew, namar ka jingkwah rhah palat ka jong u ia ka um kaba un bam, hynrei ia kaba tam u da pynkylla dur pat ia ka sha ka lad ban kamai ja kamai dohkha, da kaba die pat ia kaum.
Ym tang katta, ka mynsiem bam duh byn don ka jingpyrkhat ia ka lawei ka iai rung ha ka mynsiem u bynriew, da kaba u da thang dusom ia ka khlaw ki btap ia ki dieng siej, kiba da kylla, katta ka um kaba jiar na ki, ki sdang ban ring tyrkhong bad ruh ha ka juh ka por ba kin jah rngai noh.
Haba phai sha ki tyllong um ba kyrsoi ha ki wahduid bad ki wah bah, u bynriew u sdang ban pynjot da kaba tih maw tih syiap, u da khynra naphang ia ki jaka ba don ki tyllong um, da kaba u da pynduh pyndam ia ki, namar na kum kane ka jaka, u da sngewkmen palat ka mynsiem namar ba u ioh ia ka kabu ban kamai spah kamai phew.
Kumta, katba nang mih ki sngi, kiba bun ki tyllong um ba kyrsoi ha kane ka jylla ki sdang ban duh jait, ha kaba ka umpohliew bah ba iai kyrsoi ha ki saw aiom jong ka por, mynta ki la sdang ba kin jah, hynrei shu sah shisha satang ki dienjat jong ka jingtuid ka um, kaba da kylla ki long pynban kum ki ummat jingtim ia ka jingleh hanga mei palat ka jong u khun bynriew.
Da kumta ka jingrakhe ia ka sngi ba kyrpang ka um ha ka pyrthei ha ka taiew ba la dep, ka donkam ba kan sei mardor ia ka kynja khubor ban sdang ban pynkyndit bynriew ia u paidbah, ba ka por ka la dei shisha ban sdang ha kaban tyngkai lut ia man la ki tyllong um kiba don ha kane ka jylla, ha kaba man la ki shnong ki thaw, ki dong ki kyntoit ban shim khia naka bynta ban pynneh ia ki tyllong um kiba kyrsoi na ki. Lymda kloi lan ban shim khia katba dang biang ka por, ka por kan sa poi ba kan sa khie ka kynja kyrduh um kaba shyrkhei, katno tam lei lei ha kum kane ka aiom pyrem, kaba ka bneng ka rang tyrkhong bha, ba sdang pat ka kdew kti ne thnum namar balei, ka daw baroh ka long namar ka jingbym shim ia don lem ia katta ka mynsiemban ia bah khlieh.
Shuh shuh ka por ka la dei ruh ba ka sorkar ba kan khang noh shi syndon ia ka jingsdang ban bteng ban sam um pathar shapoh ka khyndew, namar ba kane kam ktah tang ia ka jingpynrngat ia ki tyllong um, pynban ka jingma ka long ia ka jingpei thliew ka sla khyndew, kaba tang shu khie pat u jumai lah ban lam pynban sha ka jingma, namar ba ka khyndew ka la long lypa kaba la tor.
Lymda kloi ba teh lakam ia kane ka jingpynjot ia ki tyllong um, sa shsien dei biang u paidbah hi uban mad ia ka jingeh, ha kaba un shem bad iohi ia ka um ha baroh sawdong ba ker ia u, hynrei wat tang shi jaw ruh pat un nym ioh pat ban dih ia ka, namar ba ka um kaba kyrsoi,kadei kaba long bih naka jingleh dusmon jongno re.

Leave A Reply

Your email address will not be published.