Katba dang im nga kwah beit ban jop, ong ka nongïalehkai ba la 95 snem

Tang hadien hynriew bnai ba ka jied ïa katei ka jingïalehkai ha u Kyllalyngkot 2022 hadien ba u ksiew jong ka ba dei ruh u coach, u Vikas Dagar u la phah ba kan ïalehkai shot-put. Tang ha itei i por ba khyndiat ka Devi ka la ïoh ban khur haduh lai tylli ki takma ha ka World Masters Championship kaba long ha Finlad ha u snem ba la dep.

0

New Delhi, Ïaiong 04 : Ka nongïalehkai ba la 95 snem ka rta, ka Bhagwani Devi ka la ong ba katba ka dang im kan ïai bteng ban ïalehkai watla ka la sdang kham dier ïa ka jingim ïalehkai jong ka.
Katei ka meirad ka la sdang ban rung sha katei ka lympung ïalehkai ha ka por ba ka la dap 94 snem ka rta, da kaba jied ïa ka jingïalehkai shot-put.
Shwa kane, katei ka meirad ka la mad ïa ki jingeh suda ha ka jingim hynrei dei tad ynda ka la rung sha ka lympung ïalehkai ba ka la sdang ïa ka jingim ba thymmai.
Ïa katei ka nongïalehkai kaba la kha ha ka shnong Khedka, Haryana, ha shwa ba kan dap 30 snem ka rta ka la duh noh ïa u khun bad u kurim jong ka. Ha katei ka por ka dang pun ïa uwei pat u khun. Ym tang katta, saw snem hadien kane pat sa ka khun heh jong ka ruh ka la khlad noh.
Kumta, hadien kane ka la rai ba kan ym shongkurim shuh hynrei ban trei minot noh ha lyngkha rep ban pyndap ïa ka iing ka sem. Ha u 2007 ka la hap ruh ban phah puid namar ka jingshitom. Dei tad ynda ka la rung sha ka lympung ïalehkai ba ka jingim ka la sdang ban kylla.
Tang hadien hynriew bnai ba ka jied ïa katei ka jingïalehkai ha u Kyllalyngkot 2022 hadien ba u ksiew jong ka ba dei ruh u coach, u Vikas Dagar u la phah ba kan ïalehkai shot-put. Tang ha itei i por ba khyndiat ka Devi ka la ïoh ban khur haduh lai tylli ki takma ha ka World Masters Championship kaba long ha Finlad ha u snem ba la dep.
Ka la khur takma ksiar ha ka thup 100mitar, bad kawei kawei ka takma rnong ha ka shot-put bad ka discuss throw ha ka thup ki nongïalehkai 90-94 snem. Hadien kane, la phriang ki khubor shaphang ka jingtbit jong ka bad kumta ki briew ki la sdang ban khot ïa ka, da ka ‘Sprinter Dadi’.
Mynta ha ka rta kaba 95 snem, ka rta ba bun kim lah shuh wat tang ban ïaid ruh, ka Devi pat ka dang ïakhun ban poi sha ka thong, kata ban wanrah shuh kham bun ki takma na bynta ka India.
Dang ha ka taiew ba la dep, katei ka meirad ka la khur lai tylli ki takma ksiar ha ka World Masters Athletics Indoor Championship 2023 kaba long ha Torun, Poland ha ka thup mareh kiba 65mitar, nangta ruh ha ka discuss throw bad ka shot-put.
“Ngan dang khur bun ki takma, katba nga dang im ngan ïai khur takma,” ka la ong ha kane ka sngi Ba-ar hadien ba ka la wanphai na Poland.
Ka la pynpaw ruh ba ka thong jong ka mynta ka long na bynta ka Asian Masters Championships kaban long ha u Naiwieng ha Phillipines. Kan ïakhun ha ka sien kaba nyngkong eh haka Asian Championship bad kumta ka pynpaw ruh ïa ka jingkyrmen ba kan khur takma ksiar nangtei ruh, ong u coach jong ka, u Vikas, ba dei ruh u nongïalehkai ha ka thup kiba don jingthut dkhot met.
U Vikas u la ïoh ruh ban khur takma ha ka jingïalehkai longjump bad ruh ha ka 100m na bynta ka India ha ki lympung barri.
“Hadien kane, kan sa leit ruh ban aireng ha ka World Masters Championship kaban long ha Sweden ha u snem ban wan bad ngi kyrmen ba kan lah ban ïalehkai bha da kaba tam ïa kawei ka ksiar bad ar tylli ki takma rnong ba ka ïoh ha Finland ha u snem ba la dep,” u la ong.
Haba kylli kumno nyngkong u poi pyrkhat ba ka meirad jong u ka lah ban shim bynta ha ki lympung ïakhun kiba heh jong ka pyrthei, u Vikas u la ong, “Ha ka por ba ka kawang ha ka sien kaba nyngkong nga ïohi bad nga tip hangta hi ba ka don ïa ka jingtbit.” U ïathuh ruh ba ka meirad jong u man ka por mynshwa ka ju phohsniew ban ïoh khur ïa ki takma ksiar.

Leave A Reply

Your email address will not be published.