Ka PDF kan ym ailad ïano ïano ban ïalam bakla ïa ka jinglong kyrpang ka jaidbynriew: Egenstar Kurkalang

0

Shillong, Nailur, 30: Ka Peoples Democtic Front (PDF) Youth Wing ha ka sngi Thohdieng ka la kynthoh tyngeh ïa ka jingkren jong u heh nongïalam jong ka Rashtriya Swayamsevak Sangh (RSS) u Dr. Mohan Bhagawat ba baroh ki nongshong shnong kiba shong basah hapoh ka ri India ki dei ki Hindu ha ka jingwan iuhkjat jong u dang shen ha kane ka jylla Meghalaya.
“Ngi hangne kum ka jaidbynriew ngi don la ka jong ka lariti bad ka rukom im, ngi don la ka jong ka synshar trai ri trai muluk, ngi don ka synshar ka khadar, ka rukom ïaid rukom ieng, ka kheiñ khur kheiñ jait, ka hiar pateng bad ka ïoh pateng bad haduh ka kam ïakit ïabah ïa ka imlang ka sahlang,” ong u Working President ka PDF Youth Wing u Bah Egenstar Kurkalang ha ka jingïakren bad ki lad pathai khubor.
“Ngi don la ka jong ka riti ka dustur bad ym don ba wan hikai ïa ngi kum ka jaidbynriew la phi ong u dohlieh ne u dohiong shaphang kata ka tip kur ka tip kha, ka tip briew tip blei, ka trei ka ktah bad ban kamai ïa ka hok. Kane kam dei kaba ngi shim pateng nangno nangno hynrei ka dei kaba wan hi na ka jingpyrsad mynsiem jong u Blei Nongbuh Nongthaw ïa ka jaidbynrew jong ngi,” u la ong.
“Sa kawei pat ban shai kdar, ki khun ki ksiew jong u Hynñiewtrep ngi dang long nong India pura lehse dang ha u Nohprah, 1948 ba ki Khlieh Nongynshar jong ngi lyngba ka Federation of Khasi States (FKS) kiba ïasoi ïa ka Insturmnet of Accession (IoA) bad ki kyndon ki jingkular na ka Sorkar India hapoh ka jingïalam jong u Jawaharlal Nehru kum u Myntri Rangbahduh ban ai ïa ka jingïada ïa ngi, ban ym tuklar halor ka khyndew ka shyiap, ki khlaw ki btap bad ïa ki marpoh khyndew, halor ka synshar ka khadar, ka riti ka dustur bad ka imlang ka sahlang,” u la ong.
“Wat u Chairman jong ka Drafting Commitee ka Riti Synshar jong ngi u Dr. BR Ambedkar u da ai ka jingkynthoh halor kane,” u la ong haba kdew katkum ka jingkynthoh jong u Dr. Ambedkar.
“Ban wan kam trai ïa kane ka snap ba paka jong ngi ngim ym lah ban pdiang. Kum ka jaidbynriew ngi don la ka jong ka saiñpyrkhat. Kum ka seng saiñpyrthei kaba ieng na ka bynta ka hok ban ïada ïa ka jinglong kyrpang jong ka jaidbynriew ngin ym shah bad ngin ym ailad ïano ïano ban ïalam bakla ïa ka jinglong kyrpang jong ka jaidbynriew,” u la bynrap.
“Ka jingïatreilang ka lah ban long badno badno hynrei kam mut ban die tad ïa ka jinglong kyrpang lajong da ka jingwan kam trai jong ki jaidbynriew heh paid ban ïalam bakla ïa ka jaidbynreiw jong ngi,” la kynthoh une u Working President ka PDF Youth Wing.
“Ngi kyntu ïa ki samla pule kiba la nang la stad ba kin trei shitom ban wad bniah khnang ban rah shajrong ïa ka nam ka burom jong ka jaidbynriew da kaba lum bad ban pynshai ïa ka lariti bad ïa ka snap jong ngi kum ka jaidbynriew khnang ba lashai lashisngi yn ym don ba lah ban ïalam bakla ïa ka jaidbynriew,” u la ong.
“Ha,oid, ki jingpyrkhang ban shim kabu da kiwei pat ki jaidbynreiw ki don. Lada ngi phai ha ri India ki Schedule Caste bad ki Schedule Tribe ki dei ki jaibdynriew kiba shah ñiewbeiñ sha dewbah India. Hangne ha rilum jong ngi, ïa ngi ki riewlum ka don ka jingpyrshang jong ki khrawjait na kiwei kiwei ki bynta ka ri India ban bsut lyngba ka khaii ka pateng bad ka Benami system bad ban knieh bad ïalam bakla ïa ka hok long trrai jong ngi ka jaidbynriew. Hynrei PDF kaba ieng na ka bynta ka jaibdynriew ngin ym ailad ïa kiba thmu ban iuhroit,” la ong shuh shuh u Bah Kurkalang.

Leave A Reply

Your email address will not be published.