Ka NPP ka la bat lypa ïa ka 1- Nartiang Constituency ha u 2023 : Sniawbha

Shillong,Naiwieng 11 : Palat 25 hajar ngut ki paidbah jongka 1-Nartiang Constituency ki la ïa poi sha ka jingïalang pynskhem nongkitkam jongka 1-Nartiang National Peoples Party (NPP) LA Constituency Block Committee ba la long ha ïewpynsing Wahiajer, ong ki nongialam ka NPP na ka jingkheiñ ba ki la ïoh lum. Da kane ka jingwan tuid ki paidbah la pynthikna ba kane ka Constituency kan dei biang ka jingjop ïa ka NPP ha u 2023 lyngba u MLA jongka u ma Sniawbhalang Dhar.
Kane ka jingwan tuid ki paidbah kiba tang napoh ka Constituency ka la pynsnmgew skhem ïa u ma Sniawbha ban ïoh biang ïa ka jingjop ba don burom bad dei kane ruh kaba la pynlong ïa u ban ong “ Ka NPP ka la bat lypa ïa ka 1-Nartiang Constituency ha u 2023”..
La pynsngew ruh da kiba bun na ka nongkren ha kane ka sngi ba kim pat ju sakhi kum kane ka jingïalang Election kaba heh haduh katne bad dei ruh ka sien kaba nyngkong jong kane ka snem ba ki paidbah kin wan da ki phew hajar ban ai jingkyrshan ban pyndap lut ïa katei ka jaka ba pynlong jingïalang naduh ki bynta jong ka ïawpynsiñ bad shaduh ki bynta ka surok kiba la hap ba khang ïa u surok ha ka por ka jingïalang.
U ma Sniawbhalang Dhar haba ai jingkren ha kane ka sngi ula pynsngew ïa ki kam pynroi kiba la wanrah hapoh ka West Jaiñtia kiba ïadei naduh ka jingpynbha ïa ki surok, ki lynti syngkieng kiba la dep pyntrei, shuh shuh ki dang don ruh kiba dang pyntrei bad kumjuh ïa kiba la dep ban mang pisa (Sanction).
Kumjuh ruh ula pynsngew ïa ki kam pynroi ba u la wanrah hapoh ka Nartiang Constituency ha kine ki saw snem tam kiba la kot sha ka palat 590 klur tyngka. Kum ka nuksa ïa ka Stadium hapoh ka shnong Wahiajer kaba long katkum ka International Standard kaba duna ïa ka 40 klur tyngka, ïa kane yn sa plie noh ha u bnai March jong ka snem 2023. Ula pynbna paidbah ïa ka C&RD Block ba thymmai ha shnong Namdong yn sa plie noh ha kane ka 21 tarik mynta u bnai.
Ha kaba ïa dei bad ka skim JJM ula ong ba dei ka Constituency jong u kaba la ïoh nyngkong ban Sanction pisa ïa baroh ki shnong kiba don haduh 72 tylli ha ka jinglut kaba ym duna ne tam ïa ka 220 klur.
Kum u nongmihkhmat jong ka Constituency naduh u snem 2018 haduh kane ka kynti ula dep ban ai jingïarap haduh 27 hajar ngut ki nongthep vote hapoh ka Constituency kaba kynthup lang ïa ki bym dei ki nongkyrshan jongu ruh. U la ong “Lada ngi nang khlaiñ shuh shuh ngin ïai treishitom met bad mynsiem ha kane ka kynti ban wan bad ha ka juh ka por ngin pdiang sngewbha ïa kino kino kiba wan ban pynïasoh sha ka party jong ka NPP. Nga pdiang sngewbha ïa phi baroh kiba la wan pynïasoh thymmai sha ka party la ki dei na ka Congress ne na kiwei ki party ruh namar kane ka dang ai mynsiem ïa nga ban nang trei shuh shuh na ka bynta jongphi”
Ula pynsngew ba kane ka sorkar MDA ha ka jingïaid lynti jong ka ha ki 4 snem 10 bnai ka sorkar kala shah kynnoh ha kiba bun ki liang namar ka jingtrei shitom jong ka, u ong lada ki paidbah ki kwah ïa ka sorkar ka bym shah kynnoh kata ka dei tang ka sorkar kaba thiah sngi.
Hapoh ka jingïalam ka Congress ha ki por ba la leit ïa ki surok ban maramot ki don tang 606 kilometer katba ha kane ka sokar ba mynta ba la lamkhmat da ka NPP wat hapdeng jong ka khlam Covid-19 kala dep ban pyntrei haduh 1880 kilometer, ka jingpyntrei pat ïa ki surok ha ka por ka Congress ka long tang 1600 tam kilo miter tam naduh 2014-2018 katba kane ka sorkar ba mynta ka pyntrei haduh 3200 kilometer ki surok thymmai.
Ha u snem 2014-2018 ka jingpynlut ka sorkar ka long 8700 klur katba kane ka sorkar kala pyllut haduh 14000 hajar klur, kaba mut ‘haba bun ki jingpyllut ki kam pynroi ruh ki bun’ u ong ba ka sorkar ka bym treikam kam don Balance Sheet katba ka sorkar kaba treikam ka don shibun ka Balance Sheet.
‘Tang kane ka sorkar kala la wanrah jingmyntoi ïa ki nongrep lyngba ka jingpyllait ïa ka pisa kaba la tip kum ka FOCUS, Kane ka sorkar kala pynkiew ïa ki Self Help Groups na 4 hajar tam sha ka 45 hajar ki Self Help Groups. Ha kaba ïadei bad ka jingïoh ïarap ki paidbah ha ka pang ka shitom lyngba ka MHIS la pynkiew noh sha ka 5 lak tam tyngka. Hynrei kiba pyrshah ïa kane ka sorkar ki don manla ka sngi katba kiba pynïasoh sha ka NPP ki don manla ka kynta, ong u ma Sniawbha.
Ula ong ba ka jingkren u bah Bajop Pyngrope ka long kaba dei ba ha kane ka Election 2023 ka NPP kan jop haduh 16 seat na Garo Hills bad 20 na Khasi bad Jaiñtia Hills, ula pyntip ruh ba ka NPP kala dep pynkhreh ïa ki 58 seat bad kine ki kyrtong baroh ki dei kiba poi ha ka Grade-A baroh kaba mut kiba don hapdeng ka jingiakhun ban jop.
Kum u nongmihkhmat ka 1-Nartiang Constituency lada u wan biang ha ka jingjop un sa long u nongsam Minister bad kane long ka jingmyntoi kaba khraw ba ka Constituency kaba long kum ka jingïoh nong kumba thied jaiñ na ïew (buy one get 3 free) namar haduh 4, 5 ngut ki MLA ki long na ka juh ka longïing.
Ula kyntu ïa ki paidbah ban wanrah shuh shuh ïa ki nongkyrshan sha ka seng NPP na ka 1-Nartiang ha kane ka Election 2023 khnang ba kan kynjoh sha ka 30 hajar tam namar kane ka Constituency ka don 45 hajar bad kiba wan thep vote kin don beit hapoh 87 percent manla ka Election.
Da kaba pynkut ka jingkren u kyntu ban wanrah ïa ka roi ka par ha ki liang baroh dei ban don ‘ka jingïatylli kaba long ka bor, ka jingïaishah ka long jingjop bad ka jingiohi jngai kaba wanrah ka jingphuh jingphieng’.
Ki nongkren ha kane ka sngi kila pynpaw ka jingsngewkmen ba ka jingwan ki paidbah kan ai mynsiem ia ka party ban nang trei shitom kiwei de kiba ai jingkren ki long u Waheh Shnong ka Namdong-B ma Damian War, u Briwon Pohshna na Ummulong, u CEM ka JHADC ma Thombor Shiwat, MDC ma Jesse Suiam, bah Bajop Pyngrope nongaiktien ka NPYF, MLA ka Jowai uba dei ruh u President ka NPP West Jaintia Hills ma Wailadmiki Shylla uba la pynskhem ia ki nongkitkam ka Nartiang Block Committee, u MLA ka Mawhati uba dei ruh u myntri sorkar ma Dasakhiat Lamare, ma Ngaitlang Dhar katba ïa ka jingïalang la pynïaid da u ma Hamkom Khynriam President NPP Nartiang.
La pynphuh pynphieng shuh shuh ïa kane ka jingïalang da ka jingshad pliang na ka Wahiajer, na Ummulong, jingrwai na Mynsngat,. jingshad i hep rit bad jingrwai na ki nongshong iew Namdong-Khanduli.