Ka Sorkar Pdeng kam sngap satia ïa jingkyrpad ki BJP Meghalaya : Dr. WR Kharlukhi

0

Shillong, Naiwieng 11 : U President jong ka National People’s Party (NPP) Meghalaya, u Dr. WR Kharlukhi u la ogn ba ki isynei ïa ki nongïalam jong ka BJP ha ka jylla namar ka sorkar pdeng kam sngap satia ïa ki jingkyrpad jong ki ban pyntreikam ïa ka Inner Line Permit ha ka jylla.
“Nga isynei ïa ki nongïalam ka BJP hangne namar ka sorkar pdeng kam pynsngew satia ïa ka jingkyrpad jong ki,” ong u Dr. Kharlukhi.
Shuh shuh u la ong ba kitei ki nongïalam BJP ki la kam ba ki kwah ïa ka ILP hynrei ki nongïalam jong ki na ka sorkar pdeng kim pynsngew satia ïa ki,” u la bynrap biang.
Kumban shu kdew hangne, ar ngut ki MLA jong ka BJP, kata u Bah Sanbor Shullai bad u Bah AL Hek ki dei na ki 60 ngut ki MLA kiba la don bynta lang ban mynjur ïa ka Resolution ILP ha u snem 2019.
Utei u MP ka Rajya Sabha u la ong ruh ba ka rai mynta ka shong ha ka sorkar pdeng ban rai halor kane. “Ngi la pyrshang lut bad ngi la dep ong ïa ka sorkar jylla bad dep ruh ban mynjur ïa ka Resolution halor ka ILP hynrei ma ki, kiba don ha ka bor ha Delhi, kumta ka shong ha ki nongïalam jong ki nangtei,” u la ong.
Haba kren halor ka jingkren ba la thoh da u Myntri ka tnad Law, u Kiren Rijiju ba ka Meghalaya kan ïoh bun ki MLA BJP khnang ba ki ishu kum ka ILP kan ïoh bor, u Dr. Kharlukhi u la ong, “Lada ka sorkar pdeng ka pdiang kumba phi ong, te kaei pat kaba khang ïa ki ban ai ïa ka ILP ha Meghalaya.”
Utei u President ka NPP Meghalaya u la kynnoh ruh ïa ka Congress namar ka khlem ai ïa ka ILP ïa ka Meghalaya ha ka por ba ka don ha ka bor ha ka sorkar pdeng.
“Kane kadei ka jingdawa kaba la slem bha jong ka jylla naduh ka por ba nga dang leit skul ha ki snem 1980 hynrei ka Congress kam shym la sngap ïa kaneka jingdawa,” u la bynrap biang. Kumta u ong ba dei na kane ka daw ba la thaw ïa ka NPP ban pyntikna ba ki paidbah ka thaiñ shatei lam-mihngi jong ka ri kin ym donkam shuh ban leit khrong hynrei ban dawa i aka hok jong ki hi.

Leave A Reply

Your email address will not be published.