Ka NLU kan long kum ka skul wad bniah ïa ki riti ki dustur jong ki riewlum ha NE : Conrad

Shillong, Naitung, 08: U Myntri Rangbah ka Jylla u Conrad K. Sangma, ha ka sngi Saitjaiñ u la plie paidbah ïa ka National Law University (NLU) ha Temporary Campus kaba don ha Mayurbhanj Complex, Shillong.
Ha ka jingplie ïa kane ka skul pule aiñ la sakhi lang da u Chief Justice jong ka Ingbishar Meghalaya High Court u Sanjib Banerjee, u Myntri ka tnat Pule Puthi u Rakkam A. Sangma, u Vice Chancellor jong ka University, u Prof Indrajit Dube bad kiwei kiwei.
U Myntri Rangbah haba kren ha kane ka sngi, u la ong ba ka long kaba donkam ban buh jingthoh bad ban pynlong aiñ ïa ki riti ki dustur jong ki riewlum. U la pynpaw ruh ïa ka jingangnud jong u ba ka NLU kan long ka Center of Excellence na ka bynta ban wad bniah halor shaphang ki jingpynlong aiñ ïa ki riti ki dustur jong kane ka thaiñ Shatei Lammihngi ka ri India.
U Sangma u la pynkynmaw ba ka jingdon jong ka NLU kan wanrah ïa ka jingkylla ha ka jingpule ïa ka aiñ bad ka jingwad bniah ha Meghalaya. U la ïathuh ruh ba ki jingeh kiba ïadei bad ka rukom pyntreikam ïa ka aiñ hapoh ka jylla ba la palat san phew snem na ka daw ka jingbym don ki shlem pule kiba paka ban ai jinghikai, bad ban tip shaphang ka aiñ. U la ong ba ka jingdon jong ka NLU kan pynthikna ba kane ka shlem pule kan ai jingmyntoi shikatdei eh ïa ki samla pule aiñ bad kiwei kiwei de ki lad jingshakri.
U la pynpaw ka jingkyrmen ba ka NLU kan long ka shlem pule kaba wanrah ïa ki lad jingtip kiba thymmai, bad ban wad bniah. U la ïathuh ba ki jingpule ha kane ka skulbah ki long halor ka Business Administration, ka Policy Research, bad ka Data Sciences kiba la kynthup lang bad ka Aiñ, ka ban ïarap ïa ki samla pule ban dup lah ban ïakhun pyrshah ïa ki jingeh ki ban sa wan.
Ha kajuh ka por, u Myntri Rangbah u la ong ba ka por ka ladei ban pynrung ïa ka Smart Technology ha ka pule puthi namarba kane kan pynïasoh bad ka saiñ jingtip shabar ka pyrthei ka ban ïarap ïa ki samla pule ba kin ïoh jingtip shuh shuh halor ka phang pule ka jong ki.
Ka Sorkar ka la bei pisa T. 25 crore ban shna ïa ki jingdonkam jong kane skulbah ha ka Temporary Campus, ha kaba T. 19 klur ladep ban pyndonkam.
U Chief Justice jong ka Ingbishar Meghalaya High Court u Sanjib Bannerjee haba kren ha kane ka sngi u la ong, ba ka jingplie ïa ka National Law University (NLU), kan pynmyntoi ïa ki samla pule ban tip shaphang ki aiñ bad ki riti ki dustur jong ki riewlum ha kane ka thaiñ.
U la ong ruh ka NLU ka la buh hakhmat ïa ka thong ban ka jingpule shaphang ka aiñ da kaba pynrung ïa ki laiñ pule kum ka Data Science bad ka Artificial Intelligence ha ki lynnong pule.
U Myntri ka tnat Pule Puthi, u Rakkam A. Sangma u la ong ba ka jingdon National Law University (NLU) kan pynkylla dur ïa ka lawei pule jong ka jylla. U la ong ruh ki samla pule kin ïoh ïa ki tiar jinghikai bad ki saiñ jingtip ki ban pynproh ïa ki jabieng khnang ba kin dup lah ba noh synñiang sha u sup u thiar jong ka pule ka puthi shaphang ka aiñ ha ka Jylla.
Haba pynpaw ba ka bynta kaba kongsan jong ka Kashari ka long ban pynïoh ïa ka hok sha ki paidbah, u Rakkam, u la ong, “ka NLU kan sa pynkhreh ban pynmih ïa ki Muktiar kiba tbit ki ban long ki nongïasaid na ka bynta ki paidbah, ki ban pynïoh ïa ka hok bad ban ïada ruh ïa ka hok jong ki paidbah.”
“Da kaba ai jinghikai shaphang ka aiñ bad ka jingngam jylliew ban sngewthuh ïa ka aiñ, ka NLU kan sa pynkup bor ïa ki samla pule ban long ki nongpynkylla dur ïa ka imlang ka sahlang,” u la ong.