Shillong, Naitung 08:San ngut ki Samla kiba la suba ba ki ïadonkti ha ka jingïasoh ïadat hajan DHS ophis Laitumkhrah bad thang ïa ki kali ha Thanad Laitumkhrah ha ka miet sngi Palei 6 tarik mynta u bnai, ki la shah kem ha ki Pulit jong ka Laitumkhrah Police Station. Kine ki san ngut ki kynthup ar ngut na kawei ka kynhun bad lai ngut na kawei pat ka kynhun.
Katkum ka khubor na ki Pulit la ïathuh ba kine ki samla ki la shah kem ha ka por ba ki la leit mih hajir ha Thanad Laitumkhrah bad ki Pulit ki la kem halor ka jingïoh sabut ba ki ïadonkti bad ka jingjia ha katei ka miet, ha kaba kumba 4 tylli ki kali Pulit ki la shah wiang ding ha phyllaw jong ka Thanad.
Hadien la kem ïa ki lai ngut ki Pulit ki la rah sha Shillong Civil Hospital ban leh ïa ka Medical Check-Up bad ha ka por janmiet la rah ïa ki sha Kashari ban tian bishar.
Na ka liang jong ki Pulit ki la panbor na ka Kashari ban set ïa ki khnang ban ïoh ban tohkit.
Lah ban kdew hangne ha ka miet jong ka 6 bad 7 tariik mynta u bnai, ka la mih ka jingïashoh ïadat hapdeng ki ar kynhun hakhmat ka ophis DHS, Laitumkhrah.
Hapdeng ka jingïashoh ïadat ki Pulit CRPF kiba don ha ka kamram pahara ki la pyrshang ban tem ïa ka jingïakynad, hynrei don hapdeng kine kiba pynkulmar ki la thmu ruh wat ban knieh ïa ki tiar siat jong ki CRPF. Ki CRP ruh ki la poi sha ka jingïashoh lang khnang ban ïada ïalade, la ong u SP ka East Khasi Hills, u Bah S. Nongtnger.
Ki ar kynhun ki la leit mih sha Thanad Laitumkhrah ban mudui ejahar, pynban la kynnoh da kine ki samla ba ki Pulit kim shym treh ban pdiang ka jingujor bad dei kane kaba la pynlong ïa kine ki samla ban bitar bad kynnoh ba ki Pulit ki ïashah shiliang.
Kane ka jingbitar ka la poi shaduh ka jingshah wiang ding jong ki kali Pulit bad kawei ka kali Tourist kiba la set ha phyllaw jong ka Thanad.
Ha ka sngi kaba bud ka MLA jong ka East Shillong Constituency, ka Dr. Ampareen Lyngdoh, da kaba kyntait ba ka dei ka jingïakynad pher jaitbynriew, ka la hukum ïa ki Pulit ban pynlong ka jingtohkit kaba bniah ban lap ïa ka daw kaba lam sha u pud jong ka jingïashoh ïadat hapdeng ki ar kynhun.
Na ka liang u SP ka East Khasi Hills ruh u Bah S.Nongtnger u la ong ba ka jingïashoh ïadat ka dei namar ka jingïashongshit khawiang bad u la ong ruh ba ki Pulit kin sa khot hajir ïa baroh ki kynhun kiba donkti ha kane ka jingjia.
Ki Pulit ki la register case halor ka jingshah thang jong kali ha phyllaw bad ithuh ruh ïa ki briew kiba donkti ha kane ka jingjia.
