Shillong, Naitung, 08: Ka Balang Catholic jong ka Jylla Niam Jowai ha ka sngi Saitjaiñ ka la ïoh ïa u Bishop ba thymmai da u Phadar Ferdinand Dkhar uba long ruh u Diocesan Administrator jong ka Jylla Niam Jowai.
U Archbishop jong ka Jylla Niam Bah Shillong u Most Rev. Victor Lyngdoh u la pynbna paidbah lyngba u kyrwoh sha ki Riewniam bad sha ki Paidriewngeit jong ka Balang tang shu ïoh jingtip na u Apostolic Nuncio sha India u Most Rev. Leopoldi Gerelli ba u Pope Francis u la thung Bishop ïa u Fr. Ferdinand ha ka por shiteng sngi katkum ka por na Rome kaba mut ha India ka long ha ka por 3:30 nohphai sngi.
Ïa u Fr. Ferdinand Dkhar la kha ha ka Shnong Longkaluh, ha ka 27 tarik Rympang 1962.
U Fr Ferdinand u la sdang ïa ka jingpule ban long Lyngdoh ha St Paul’s Seminary, Upper Shillong, Meghalaya bad u la bteng ïa ka jingpule Philosophy ha Christ King College Shillong bad ïa ka Theology na Oriens Theological College, Mawlai.
La kynthang Lyngdoh Sohblei ïa u ha ka 23 tarik Kylllynglyngkot 1994.
Hadien ba ladep pynkyntang Lyngdoh Sohblei, u Fr. Ferdinand u la shah jied ban trei kum u Dean of Studies ha St Paul’s Seminary ha u snem 1994 bad 1995. Hadien kane la pynkynriah sha Namdong ban sharai kum u Assistant Parish Priest ha u snem 1995-2000.
Hadien kane la pynkynriah sha Parish Ummulong kum u Assistant Parish Priest ha u 2000-2002 bad ha u 2002 pat u la shimti kum u Parish Priest jong kane hi ka Parish haduh u 2007.
Ha u 2007 la pynkynriah biang ïa u sha Namdong Parish kum u Parish Priest bad kum u Principal jong ka Skul kaba u la trei haduh u 2009.
Ha u 2009 u la shimti kum u Procurator jong ka Jylla Niam Jowai haduh u snem 2021.
Hadien ba u Pope Francis u la pynkynriah noh ïa u Bishop Victor Lyngdoh kum u Bishop jong ka Jylla Niam Jowai ban shimti pat kum u Archbishop jong ka Jylla Niam Bah Shillong, la thung ïa u Fr. Ferdinand kum u Diocesan Administrator jong ka Jylla Niam Jowai naduh u 2021 haduh mynta.
Kum ban shu pyntip, ïa ka Jylla Niam Jowai la sdang ha u snem 2006 bad u Bishop Vincent Kympat u la long u nongsharai mynsiem ba nyngkong haduh u snem 2011 tad haduh ka jingkhlad ba kyndit jong u. Hadien kata, ha u snem 2014 la sharai shipor ïa ka Jylla Niam Jowai da u Archbishop ba la shongthait jong ka Jylla Niambah Guwahati u Most Rev. Thomas Menaparampil kum u Apostolic Administrator bad hadien kane la shimti ïa ka kam sharai mynsiem da u Bishop Victor kum u Bishop bapura ha u snem 2016 tad haduh ba un da shah thung ha Pope Francis kum u Archbishop jong ka Jylla Niam Bah Shillong ha ka 28 tarik, Nohprah, 2020.
Katkum ka khubor na ka Conference of Catholic Bishops of India (CBCI) lyngba u Deputy Secretary General u Rev. (Dr.) Stephen Alathara, la pyntip ba ka Jylla Niam Jowai ka don 1,20,275 ngut ki riewngeit Katholik, 23 tylli ki Parish, 30 ngut ki Lyngdoh Sohblei, 41 ngut ki riewniam shynrang na ki jingïasyllok bapher bapher bad 83 ngut ki Riewniam Sister bad 313 tylli ki skul pule.
