Ka mon jong ki paidbah kan dei kaba ba kongsan ban ïapynbeit pud: Renikton

Shillong, Naiwieng, 17: Ka Regional Committee na ka bynta ka West Khasi Hills District kan sa ai jingmut ïa ka Sorkar Jylla ba ka donkam ban pynkohnguh ïa ka Sorkar Assam ban kham jynsur mynsiem khyndiat ba ki shnong kiba kham bun paid da ki briew kiba bym dei ki Khasi bad ki bym dei ki Garo ha Langpih Sector kin hap sha ka jylla Meghalaya.
Ha ka jingïakren bad ki lad pathai khubor ha ka sngi Palei, u Bah Renikton uba long ruh u Chairman jong ka Regional Committee u la ïathuh ba yn sa buh ïa ka tarik na ka bynta ban leit sorjamin ïa ka Langpih Sector ha ka taiew ban sa wan.
“Ynda la pyndep ïa ka jingsorjamin, ngin sa don sa kawei pat ka jingïalang bad ki kynhun bapher bapher bad kin sa don ruh ki jingai jingmut ba kongsan sha ka Sorkar Jylla ha kaba ïadei bad ki shnong kiba hap hapoh ka Langpih Sector, u la ong.
Haba kylli, u Bah Tongkhar u la ïathuh ba ka Langpih sector ka dei kaba jwat na ka daw ka jingïakhleh jaitbynriew na ka daw ba ki Nepali ki shnong ki sah ha ki shnong ba la ker tawiar da ki shnong ba la shong la sah da ki Khasi bad ki Garo.
“Dei na kane ka daw ba ngi donkam ban leit jurip bniah khnang ban sngewthuh bad ngin sa pyrshang ban ïasyllok bad ka Assam lada ki lah ban mynjur ba baroh ki shnong ba la buhai da ki Nepali bad kiba la ker tawiar da ki shnong ba sah ki Khasi bad ki Garo kin hap shapoh u pud u sam jong ka jylla Meghalaya. Ngin sa pyrshang katba lah ban leh ïa kata,” u la bynrap.
Ha kawei pat ka liang, u Bah Renikton uba long ruh u Myntri ka Sorkar Jylla u la ong ba ka mon jong ki paidbah kan long kaba kongsan tam ban ïa pynbeit ïa u pud u sam ba la sahteng ha ka shnong kiba don hapdeng ka jingïakajia pud. U la pynkynmaw ba ka jingïapynbeit pud ha ka wat kaba nyngkong, la shim beit ïa ka sur bad ka mon ojng u paidbah khnang ban pynkut noh ïa ka jingïakajia pud hapdeng kine ki ar tylli ki jylla.
“Namarkata, ngi khmihlynti ba ki paidbah ki dei ban shim lang ïa kajuh ka rai kum kawei ka shnong bad lada long leilei kaba lai baroh kawei ka thaiñ yn ïa pynbeit syndon ha kajuh ka por. Hynrei, lada ka don ka jingbym hun, lada katto katne ki kynhun jong ki paidbah ki kwah ban don ha Meghalaya bad katto katne pat ki kwah ban leit sha Assam, kata hi kan pynkyllaiñ bha ban ïa pynbeit ïa kane ka jingeh,” u la ong.
Katkum ka jingong jong u Bah Renikton, ha ka jingleit sorjamin da ka Regional Committee na ka jylla Meghalaya bad Assam yn sngap shwa tang ïa ka mon jong ki paidbah.