Ka Meghalaya kam dei tang ka ri ki lyoh hynrei ka jaka ba don ki riew don sap: Paul Lyngdoh

Shillong, Lber 14: U Myntri ka tnat Tourism bad Arts & Culture jong ka sorkar jylla u Bah Paul Lyngdoh ha ka sngi ba-ar u la ong ba ka jylla Meghalaya la ju tip kum ka ri ki lyoh hynrei u ong ba kane kam kut tang katta hynrei ka dei ruh ka jaka ba don ki riew donsap.
Haba kren kum u Kongsan ha ka sngi ba sdang duh jong ka Meghalaya International Film Festival ha U Soso Tham Auditiorium u Bah Paul u ong ba ka jingdon jong kane ka tamasa jong ki phlim kan long ka kabu ïa ki khun samla ban ïohi ïa ka kabu kaba ap na ka kam shna bad ak phlim kaba lah ruh ban dei ka lad kamai ha ki sngi kiban dang wan.
“Ka jylla jong ngi ka dei kaba la ju tip kum ka ri u lyoh hynrei ngi nud ruh ban ong ba ka dei ka jaka ki sap ki phong namar kiba bun bah ki khun samla bad ki nongshong shnong jong ngi ki dei kiba don ki sap ki buit kiba pher bad kiba phylla,” u la ong.
U la ong ruh ba kumba ki phlim kiba la pynmih na ki bynta ba kham sahthie jong ka ri India ki la lah ban ïoh haduh ka khusnam Oscar ka kdw ba wat ki phlim kiba mih na kane ka bynta ka ri ki lah ban kot sha kane ka kyrdan.
U Bah Paul ha kane ka sngi u la ong ruh ba na ka liang ka sorkar kan peit kyrpang ïa ka jingdawa ban buh noh ïa ki jaka pyni phlim Khasi khnang ba kan ïarap ïa ki nongpynmih phlim bad ki nongak ruh.
Haba ai jingkren ha kane ka sngi na ka liang u President ka Meghalaya Film Makers Association Bah Commander Shangpliang u la ong ba kane ka jingkyrshan ka sorkar ban pynlong ïa kane ka tamasa phlim kan long ka kabu ïa ka kam shna phlim ba kin kiew sha ki kyrdan ba kham shajrong shuh shuh.
U la ong ruh u dap da ka jingkyrmen kaba skhem ba na ka liang ka sorkar kan phai khmat sha kane ka kam da kaba ka wanrah noh ïa ka Film Policy bad kumjuh ban shna noh ïa ka jaka pyni phlim ban ïoh pyni ïa ki phlim Khasi.
“Ngi donkam ïa ka Policy bad ka cinema bad lada kine ki baing ka Film Industry ha ka jylla kn wan dur bah bad ynda ngi la poi sha kane ka kyrdan ym shuh tang ba ngi aikam ïa ki samla hynrei kan pynmih ruh ïa ka khajna sha ka pla tyngka ka sorkar jylla,” ong u Bah Commander.
Ha kane ka tamasa la wan shim bynta da ki nongshna phlim bad ki nongak bad pynmih phlim na Bollywood bad kiwei de ki karkhana shna phlim.
Lah ban kdew hangne ba kane ka tamasa kan neh kumba 5 sngi ha kaba yn pyni kumba 40 tylli eiei ki phlim kiba mih na ka jylla bad na kiwei de ki bynta ka ri bad ka pyrthei ruh.