Balei wan Meghalaya u Prime Minister ar sien shi bnai?

- Babu Kular Khongjirem

0

Ki paidbah ka Meghalaya ki la iphylla shibun eh haba u Prime Minister Narendri Modi bad u Home Minister u Amit Shah ki leh myn leh kitkhia ba ki ieit ïa ka Meghalaya da kaba wan khah khah sha Shillong khlem poi pyrkhat satia. Tang hapoh shi bnai ki la wan haduh ar sien kynthih. Lada don kiba smat ban pyrkhat bha, kin sa lap hi ïa ka dawbah balei ki leh kumne. Kim da salia shuh wat ban don tang da ki kynta ruh tang ban pynpaw ba ki don lang ha Shillong.
Ha ka por ba u wan kanbas elekshon, ki paidbah kim da sngew pher than. Hynrei ba kin wan khnang ban sakhi ïa ka jingsmai ka sorkar MDA jong u Conrad Sangma, kata te, kaba don ka jingmut shalyndet bad ruh kham sha jngai shuh shuh.
Kumno kat u Prime Minister bad u Home Minister kin da wan khnang tang hapoh shikynta eiei khlem da don ki daw kiba lah ban pynmyntoi ïa u bad ïa ka party BJP nalor ba ka BJP ka jop tang ar seat bad ïoh Minister ruh tang uwei.
Ka dawbah ba kongsan hi kaba u Modi bad Amit Shah ki wan khnang ban sakhi ïa ka jingsmai ka sorkar MDA-II jong u Conrad Sangma ka long ban rah bad pynpaw pyrthei ïa ka khubor sha baroh kawei ka ri India ba ka Meghalaya ruh kum kawei na ki Christian State ba kham paw eh ha North East ki la ngeit bad kohnguh ban ai ka jingshaniah kaba pura ïa ka party BJP da kaba riehtngen ha ka party NPP.
Ka pyrthei baroh kawei kan tip shai kdar mynta ba lait noh sa tang ki Muslim, ki Christian mynta ki la don lang bad ai ka jingshaniah ïa ka party BJP. Kane ka buitpoh ka long kaba ma bad ba shyrkhei shibun ïa ki briew kiba shong basah ha Meghalaya khamtam eh ki Khasi-Jaiñtia jong ngi.
Ki Tribal States jong ka North East baroh naduh ka Jylla Nagaland,Manipur, Tripura bad Meghalaya ki la ngop lut mynta ha ka jingpynïaid ka sorkar BJP na Delhi.
U Modi bad ka party BJP mynta ki la lah shisha ban pyni bad ban pynngeit hakhmat ka ri India baroh ba ka Uniform Civil Code (UCC), ka CAA, ka jingthaw thymmai ïa ka Riti Synshar jong ka ri India (Constitution of India) na ka bynta ka jingmyntoi ka BJP bad RSS ym don jingeh shuh namarba ka la jop lut ïa ki riewlum ka North East India baroh kawei.
Mynta ka la pawshai kdar ba ka NPP ka dei shisha kawei na ki party kiba ïajan bad ïa sngewthuh jingmut lang shisha bad ka Party BJP.
U Modi u shaniah ba wat lada kam jop ka BJP ha Meghalaya ruh hynrei shisien ba la jop ka NPP kum ka paralok ha ka sorkar NDA ha Delhi bad kawei na ki nongkyrshan ba radbah ka NEDA ha North East, kata hi ka la biang ïa u bad ïa ka BJP.
Nangne shakhmat lei,ki kam jong ki, kin kham shyrkhei shuh shuh ban ïa kaba ki la leh ha kine ki san snem ba ladep. Lada jia eiei ïa ka ri bad ka jaitbynriew jong ngi, ym donkam shuh ban ïa ud ne tei pop da kumwei pat. Ka pop jong ngi kan sa lap ïa ngi shisien ha kawei ka sngi.

Leave A Reply

Your email address will not be published.