K a jingjah rngai jong ki shikurim ha ki thaiñ Sohra naduh ka 23 tarik u Jymmang bad lap ïa ka met iap jong u shynrang dang hynnin ka sngi 2 tarik Jylliew ka la long kawei na ki jingjia ba sngewsih ban jia ha kane ka jylla Meghalaya namar ym pat ju jia mynno mynno ruh kum kine ki jingjia. Ka jingpynshisha jong u SP ka East Khasi Hills ba ka dei ka jingshah pyniap jong u Raja Raghuvanshi hadien ba la lap ïa ka wait ba dang thymmai kaba la suba ba la pyndonkam beit tang halor kane ka jingthmu ka la buh ha ka jinglyngngoh kaba khraw. Nalor kata ka jingbym pat lap sa ïa ka Sonam ka kurim jong u Raja ka la nang buh ha ka jinglyngngoh kaba khraw namar lada jia ba ka ruh ka la shah pyniap ha ki riew thrang snam imat kitei ki briew ki la pyniap ïa ka sha kawei pat ka jaka namar lada dei ba shah pyniap lang hajuh la dei ban lap ïa baroh ar ki metiap. Ne lehse ym lah ban tip ïoh ki runar kiba leh ïa kane ka kam ki rahbor ïa ka bad ka dang lah ban dang im haduh mynta ruh.
Hooid na ka liang kiba ha ïing ha ka jingsngewsih kthang ïa kane ka jingjia ki la kynnoh ba ki bor sorkar ne ki bor pahara jongka jylla ki khlem shim khia ïa kane ka kam kane ka long ka bym lah ban pdiang. Ka daw ka long naduh ba kine ki arngut ki jahrngai ka la jia ka jingther slap kaba jur bha hapoh ka jylla ryngkat bad u lyoh khamtam ha thaiñ Sohra na kata ka daw ka buh ïa ki bor pulit ha ka jingeh ban wad ha kitei ki sngi namar ka jingther u lapbah nangta sa ka jingjur u lyoh ym lah ban ïohi satia sha ki trai riat trai ram. Dei tad hynnin ka sngi ba ka bneng ka la ailad ba ki pulit ki ïoh ban pyndonkam da ki Drone ba sa lap ïa ka met u shynrang bad sa pynthikna hadien da kiba haïing ba u dei u Raja.
Related Posts
Wat la baroh shi katta ka jingjah rngai kine ki shijur kam pat da ktah jur ïa ka kam jngoh kai pyrthei hynrei lada jia ba ka dei kaba shisha kumba la ïathuh da u SP bad kynnoh ruh da kiba haïing hasem ba ka dei ka jingshah pyniap khlem pep kan don beit ka jingktah ïa ka kam jngoh kai pyrthei ha kane ka jylla.
Mano ban tip ïoh lehse kiba leh ki dei kiba la plan bha ïa kane ka kam tang kumno ban pynjah burom bad pyntroiñ ïa ka kam jngoh kai ha Meghalaya namar kumba long mynta ka jylla Meghalaya ka la wan hakhmat eh ha ka kam jngohkai ha kane ka thaiñ shatei lam mihngi ka ri India namar ki briew ym tang ba ki sngewtynnad ïa ka mariang hynrei wat ïa ki paid nongshong shnong ruh ki dei kiba sngewthuh bad kiba kloi ban pdiang sngewbha ïa ki nongwan jngohkai sha kane ka jylla.
Ka por ka la dei ïa ka tnad tourim ban shim khia bha halor kane ka jingjia namar ïoh ka dei tang ka jingthmu jongno re ban pyntroiñ ïa kane ka kam jngoh kai ha kane ka jylla. Namar kumno kata ka wait kan dang long kaba thymmai bad kaba lah ban pyndonkam beit tang ha kane ka kam ka long shwa ka jingkylli kaba hakhmat eh. Ka la dei ka por ba ka tnad Tourism kan pyrkhat noh ban thung noh da ka kynhun bor pahara lajong ki ban ap pahara bad peitngor sha kito ki jaka jngohkai kiba paw nam bad wat ki bym da pawnam eh ruh. Namar kumba long mynta ka jingwan jngohkai ka la shu laitlan than hangne ha jylla teng teng ym don por, ki leit ki wan katba mon. Hynrei lada don ki bor pahara tang shu la dei ka por janmiet la dei ban khang noh ïaki jaka jngohkai khnang ban ym don kiba ïoh ban leh laitlan ne ki ban shim kabu ban leh ïa kino kino ki kam sniew. Lah dei ka por ban buh noh da ka por plie bad ka por khang ha man la ki jaka jngohkai bad lada buh da ki bor pahara ka pisa ba ïoh lum na ki nongwan jngohkai kan long kum ka tulop jongki keiñ. Kane kan ïarap ym tang ban shngaiñ kiba wan jngohkai sha kane ka jylla hynrei kan long ruh kawei na ki lad ban aikam aijam ïa ki khun samla hapoh ka jylla.