Pynliem ki thei U-17 ka Rangdajied United ïa ki thei ka Bright Future Mairang ha ka phutbol Social Welfare

Shillong, Jylliew 03 : Ki thei ïalehkai U-17 jong ka Rangdajied United FC ki la jop da ka said ïa ka Bright Future Pyndengumiong, Mairang ha ka jingïalehkai paralok ba pynlong da ka tnad Social Welfare jong ka sorkar jylla ha ka sngi Baar ha madan futsal Kynton Massar.

Ïa kane ka jingïalehkai kaba tip kum ka Chief Minister’s Welfare Programme U-17 Girls’ Football Match, la wan ban plie da u MLA ka Mawkynrew Bah Banteidor Lyngdoh kum u Kongsan ryngkat ka jingdonlang ka Deputy Director ka tnad Kong N Umdor bad kumjuh ka Assistanct Director Kong B Nengnong, Project Director SRCDA Dr.NP Laloo bad kumjuh u Planning Officer ka SRDCA bah Dylan Syiem bad kiwei kiwei.

Ïa ka Rangdajied United la ïalam da u Bah Shanbor Jyrwa katba ïa ka Bright Future pat la ïalam da u Bah Wanjop Wahlang bad Bah Daminot Lyngkhoi.

Hapdeng ka jingïalehkai kaba itynnad bha bad kaba mar ïa biang bor ka Rangdajied United ka la ïoh ban pynkhih jar ha ka kylla step lyngba ka penalty. Tad haduh ban da kut ka kylla step ym shym la don shuh kiba lah ban thep kol.

Ynda la poi ka kylla miet, baroh arliang ki la ïakhun tyngeh biang tangba tad haduh ban da kut ka por ïalehkai ym shym la don satia kiba lah ban pynkhih jar biang bad kumta ka Rangdajied ka la ïoh ban khur suk ïa ka jingjop da 1-0 kol.

Haba ïoh ban ïa kren bad ki coach jong ka Bright Future ki la ïathuh ba kane kadei ka sien ba nyngkong ïa ki khynnah jong ki ban ïalehkai ha madan artificial bad kumta ka eh bha ïa ki ban ïalehkai bha.

“Ha shnong ngi ïalehkai beit ha madan khyndew,” ong u Bah Wanjop. Nangta u ïathuh ruh ba ka jingpynmih jong ki ïa ka kynhun ïalehkai ki kynthei ha ka shnong kadei beit da ka mon sngewbha bad ka jinghikai ruh ka dei kaba ki leh da ka mon sngewbha khlem da khmih lynti ïa kano kano ka jingïoh nong.

Katba na ka liang u Coach ka Rangdajied pat u la ïathuh ba ka kynhun jong ki ka kynthup lut na kylleng ki bynta jong ka rilum Khasi Jaintia.

Ha kane ka sngi haba ïa kren pat bad u Bah Banteidor u la ïathuh ba ka jingpynlong ïa kane ka prokram ka long shi bynta ban ai ka jingithuh kaba kham kyrpang ïa ki khun kynthei. “Hynrei ha ka jylla kumba phi ïohi, ki khun kynthei ki long kumjuh bad ïoh lang mar kumjuh ka jingithuh kaba kyrpang.”

U Kongsan u la ong ruh ba lyngba kum kine ki prokram ba ka sorkar ka plie lad kan long ruh kum ka jingai mynsiem ïa ki samla kynthei ba kin pyntbit bad pynjanai shuh shuh ïalade ha ka sap ïalehkai ba ki don.