10 tylli ki jingïakhun mynta ka sngi ha ka ‘District Level Inter School Subroto Mukherjee Cup’ 

Jowai, Jylliew 03: Ka lympung ïalehkai phutbol ki khynnah skul kaba la tip kum ka ‘District Level Inter School Subroto Mukherjee Cup Football Tournament 2025’ bala pynïaid da ka ophis u District Sports Officer West Jaiñtia Hills District, Jowai kaba la long mynta ka sngi 3 tarik u Jylliew haki ar tylli ki madan kata ha Kiang Nangbah Stadium, Dongmihsngi, Jowai bad ha Wahiajer Multi Sports Complex.

Haba phai sha ki jingïakhuh Under-17 (boys) ha Kiang Nangbah Stadium ka Mihmyntdu RC Eve School Mihmyntdu kala jop da 3-1 kol ïa ka Nongbareh Lyntiar Secondary Nongbareh. Ka Govt. U/P RMSA School Jowai kala jop da 2-0 kol ïa ka Che’s Star H/S School Jowai.

Ka St. Dominic H/S School Mawkyndeng kala jop da ka jingïashut Tie Breaker da 4-3 kol ïa ka Mukhla Raij H/S School Mukhla. Ka Achievers Secondary School Ummulong kala jop da 1-0 kol ïa ka Wahiajer Presbyterian Secondary School. Katba ka Syiem Jingsuk H/S School Amlarem kala jop da 2-0 kol ïa ka Krist Syiem Secondary School Namdong.

Ha ka jingïakhun Under-15 (boys) ha Wahiajer Multi Sports Complex ka Jaintia H/S School Jowai kala jop da 6-0 kol ïa ka Jowai District Presbyterian Secondary School, Ialong.

Ka Little Flower H/S School Jowai kala jop da 3-0 kol ïa ka Seinraij H/S School Jowai. Ka Marian Hills H/S School Jowai kala jop da 2-1 kol ïa ka All Saints Diocesan Secondary School Jowai. Ka Amlarem U/P School Amlarem kala jop da 9-1 kol ïa ka Jowai Public School. Katba ka Syiem Jingsuk H/S School Amlarem kala jop da ka jingïashut Tie Breaker 6-5 kol ïa ka Mihmyntdu Secondary School Mihmyntdu.

Lashai ka sngi 4 tarik u Jylliew kan bteng biang ka jingïakhuh haka kyrdan Under-15 (boys) bad ka Under-17 (boys).