Ka kam shi khoh, jingsiew tang shi-troh, pyrta ki ASHA ha ka Peace Rally ha South West KHD

Mawkyrwat, ‘Naiwieng 14: Kum ka dak ban bteng ïa ka jingïakhih bad ban pynpaw ruh ïa ka jingbym hun ïa ka jubab jong ka Myntri jong ka tnad ka koit ka khiah ka sorkar Meghalaya, ka Dr. Ampareen Lyngdoh halor ki mat jingdawa jong ki ASHA, ki nongtrei Accredited Social Health Activist (ASHA) hapoh ka South West Khasi Hills District ASHA Association ki la pynlong ïa ka jingïa-ïaid paidbah ba jai jai ha South West Khasi Hills District.
Ïa katei ka rally la sdang na lad ka ophis u Deputy Commissioner, South West Khasi Hills District bad la pynkut ha phyllaw jong ka Community Hall jong ka Shnong Mawkyrwat hapoh ka jingïalam jong ka kong T. Paliar, President ka South West Khasi Hills District ASHA Association ryngkat ka jingsynrang lang ki spah ngut ki ASHA bad ha kane ka jingïaid paidbah ki la ïa pyrta ruh, “Ka kam shi-khoh, jingsiew tang shi-troh”.
Haba kren ha ka jingïalang kaba la long ha Community Hall Mawkyrwat, kong Sonny Kharjana ka Adviser jong ki ASHA hapoh ka Meghalaya baroh kawei ka la ong ba ki nongtrei ASHA ki dei ki nongtrei kiba kongsam tam ban shakri ha ka koit ka khiah ïa kiba bun ki briew pynban na ka liang ka sorkar pat kam ithuh ïa ki jingtrei shitom jong ki bad ka ñiew beiñ da kaba ai ka jingtrei kaba khia katba ka jingsiew ka rit na kiba rit haba ïa nujor bad ki jingkular.
Shuh shuh ka kong Kharjana ka la ong ruh ba katkum ka jingkhang jong ka Myntri ka koit ka khiah ka la ong ba ki nongtrei ASHA ki dei tang ki nongtreimon sngewbha kiba lah ban trei tang 2 snem ha kaba katei ka nongïalam ki ASHA ka la buh jingkylli ruh ïa ka Myntri sorkar kumno ka lah ban long ba ki ASHA kin trei tang 2 snem katba ka katkum ka National Health Mission (NHM).
Namarkata, ha ka jingkren jong ka kum ka nongïalam ka la dawa na ka sorkar ba ka dei ban pynkiew noh ïa ka bai ong ki nongtrei ASHA hapoh ka Jylla na ka 2 hajar sha ka 5 hajar kumba la paw ba ka sorkar ka la kyntiew ïa ka bai-nong nalor kiwei de ki lad jingïarap ki ban ai jingmyntoi ïa ki nongtrei.
Kiwei de kiba la ai jingkren ki long ka kong Jubilin ka ASHA napoh Ranikor Block, u bah Polan Sohphoh, Chairman jong ka Ri Khaiñ Lyngdoh Sakwang, u bah Benjonson Lyngdoh, Secretary jong ka Seng Samla Shnong Mawlangwir, u bah F. Kharraswai, Myntri Shnong Nonglang, u bah Lambokstar Marweiñ, President ka HANM, South West Khasi Hills District, u bah Arbok Kharjahrin, President ka HYC Mawkyrwat Circle, u bah Iengskhem Syiemlieh na ka KSU Mawkyrwat Circle.
Ha kane ka sngi ïa ka jingïalang ba lyngkot ha kane ka sngi la pynïaid ka kong T. Paliar, President ka South West Khasi Hills District ASHA Association ryngkat ka jingwan ai jingkyrshan da ka HYC, HANM, KSU, Seng Samla Shnong, ki Rangbah Shnong bad kiwei de.