Nongstoiñ, Naitung, 05: “Ka kam rep kam riang ka dei ka kam kaba uwei pa uwei u nongshong shnong, u long kynrad halor lade bad ka dei ruh ka kam kaba khraw tam ha ka jingim kaba man ka sngi, namar lada ym don ki nongrep wat ki sahep sorkar ruh ki hap ban shah thngan”, ong u babu Dominik Lyngkhoi uwei na ki nonghikai u ba la shah weng kam ha ka sorkar ha ki snem ba la dep.
Utei u babu u la ong ba naduh ba ka sorkar ka la weng noh ïa u bad ïa kiwei pat ki nonghikai, ki la ïakhun da ka mokotduma ban dawa ïa ka hok ka jong ki. Hynrei hadien katto katne snem ka sorkar ka la daiñ kuna pynban haduh sanphew hajar tyngka ïa baroh ki nonghikai kiba don ha ka thup kyrteng ryngkat bad u.
Utei u babu u la ong ruh ba naduh ba u la shah weng na ka kam hikai skul, u la sdang ban rep synsar, u la trei shitom bad minot thop ha ka rep ka riang bad u la rep shibun bah u phrisbin, u ri, ki jhur bad kiwei kiwei.
Dang ha kane ka sngi balang kaba dei ka sngi ïew Nongstoiñ u la kheit shibun bha u ri bad phrisbin bad u la wan rah sha ïew Nongstoiñ, da ka jingkyrmen ban ïaoh ka bai siew ba tda, hynrei haba leit die ha ki mahajon ka dor ka poi tang arphew tyngka shi kilo.
U la ong ruh ba ka long kaei kaei kaba lyngngoh namarba lada leit thied ki paitbah ki mahajon ki die ha ka dor arphew san shi pawa bad lada shi kilo u shong dor shispah tyngka, katba lada leit die u nongrep pat ki shim tang arphew tyngka shi kilo. U la ong ruh ba ka jingkhñiot beiñ jong ki majahon ïa ki nongrep, ka la paw tyngkreiñ ba kata ka hok u nongthied nongpet kam trei kam satia ha kane ka juk ba mynta.
U la ong ruh ba lada kan long kumne ban rep ban riang da kaba kyrmen ban ïaoh bai siew bai tda ha ïing hasem, kam don jingmut satia bad lada dei u jait mar rep ba long ban ai bam sñiang, ka la bha ban shu ai noh sha ki sñiang ban ïa kaba pynriewspah ïa kito ki riew shim kabu.
Ha kajuh ka por u la ong ba ki nongdie ïa ki mar ki mata, la ki dei ki mar rep ne kiwei pat ki mar, la kumno kumno lada ki thied arphew tyngka shi kilo lada ki die tang ha ka dor laiphew lane laiphew san tyngka shi kilo ruh ka la biang palat, hynrei ban thied arphew sa die shispah tyngka shi kilo te kam ïahap shuh.
