Khliehriat, Naitung, 05: Ka Khasi Students Union East Jaiñtia Hills District Unit, lyngba ka jingthoh ba la phah sha u Deputy Commissioner ka East Jaiñtia Hills ka la ai jingmut ïa u ha kaba ïadei bad ki jait jingpule ki ban pynrung hapoh ka ITI Institute khnang ba kan long ka jingmyntoi ïa ki samla khamtam ïa kito ki samla ki ba la iehnoh shiteng ïa ka jingpule bad hashwa kane ka seng ka la dep dawa ba dei ban don noh da kawei ka shlem ai jinghikai ne ka ITI hapoh ka district.
Na ka liang ka seng ka la ai jingmut ban pynrung ïa ki jait jingpule bad ki jingai jinghikai ba kynthup ka Stenography, plumber, welder, fitter, friut and vegetables procedding, wireman, electrician, mechanic( motor vehicle), draughtsman civil, information & communication technology, system maintainance, general carpenter operator, advance machine tools, eletronics mechanics, digital photographer multimedia animation & special effects, driver cum mechanic(LMV), solar technician electrical, baker& confectioner, masonry.
Kum shibynta ban ïarap ia ki samla wad kam bad ruh ban kyntiew ïa ki sap ki phong jong ki samla, ka Khasi Students Union East Jaiñtia Hills District Unit, ka la dawa na u Deputy Commissioner ka East Jaiñtia Hills District ban pynioh noh da ka Industrial Training Institute lane ka Vocational Training Centre ha Khliehriat, halor kane ka jingdawa ka seng myn ha ka 9 tarik jong u bnai jylliew 2023 ka la leit ban buh da ka jingthoh hakhmat u Deputy Commissioner.
U General Secretary jong ka Khasi Students Union East Jaiñtia Hills District, u bah K.S.Suchiang, u la pynpaw lyngba ki pathai khubor bad ong “Mynta la bun tylli ki snem ngi la ioh ïa ka district la jong bad sngew khia ruh ban ong ba ka dei kawei na ki district kaba dang sah dien, kane ka jingdawa jong ngi ïa kane ka Vocational Training Centre lane ka Industrial Training Institute ka dei namar ba ka seng ka la lap ba bun ki samla jong ka district khamtam ki samla kiba la pyndep ïa ki jingpule jong ki ha ki kyrdan bapher bapher bad don ruh ki samla kiba ymlah shuh ban bteng ïa ka jingpule jong ki, te ka jingdawa jong ngi ban don kane ka centre hapoh ka district ka long kaba donkam haduh katta katta, namar ngi tip ba ka sorkar hi kam lah ban ai kam ïa baroh ki samla wad kam, ngi sngewthuh ba da ka jing don kane ka centre kan ïarap shibun ïa ki samla wad kam, ngi tip ba ki samla ki don ruh la ki sap ki phong bapher bapher bad lyngba kine ki Centre kan ïarap ban kyntiew ïa ki samla don sap”.
“Haba kylli na u Deputy Commissioner halor kane ka ITI, u ong ba ka la don ha ka ophis ba rim jong u DC, te halor kane u la ong ruh ba ka KSU ka lah ban ai jingmut ban jied ïa ki jait jingpule (Course), kiba hap ban pyn rung ha katei ka ITI, lada ngi ioh ïa kane ka ITI ka ban ai jinghikai ïa ki samla ha ki jinghikai bapher bapher, te na kane ki lah ruh ban ieng hala ki jong ki kjat ban seng ïa ki kam ki jam, nga ai nuksa ba shibun ki samla kiba pyrshang ban wad kam sha ki karkhana pynmih dewbilat kiba don hapoh ka district, ki tang shu aplai kam hangtei, ka mih pynban ka jubab ba ki samla kim pat don jingtbit (skill) ha ka kam, hynrei ngi don ka jingkyrmen ba lada kane ka ITI Centre ka don ia ka ophis hapoh ka district ki samla kin sa iohlad ban pyntbit ialade bad lashai la shisngi bad kan long kaba suk ïa ki ha ka wad kam wad jam, ym tang ha kita ki jingtrei ha ki karkhana hynrei kin ioh lad ruh ban seng ïa ki kam la jong kum ki karkhana kiba rit kum ki workshop bad kiwei kiwei ki lad” la bynrap u bah Suchiang.
Halor kane ka jingdawa, ki dkhot jong ka seng na East Jaiñtia Hills District ba kynthup ruh u President, u bah Streamly Suchen, Asst General Secretary, u bah Pynshaikupar Dkhar, u Finance Secretary, u bah Shaniahskem Dkhar, u Asstt Finance, u bah Cherity Suja, u Education Secretary, u bah Emmon Chyrmang ki la ïoh ruh ban ïa phylliew jingmut bad u Deputy Commis-sioner, u Abhilash Banarwal, IAS halor shibun kiei kiei kiban ïarap ban kyntiew ïa ki samla jong ka district bad ruh ban wanrah ïa ka bha ka miat hapoh ka district.
