Ka jylla ïoh um slap haduh 63 billion cubic liter ka lah ban pynlang tang 1 billion cubic liter

Shillong, Naiwieng 08 : U Myntri Rangbah ka Jylla u Conrad K Sangma mynta ka sngi Balang, ula ong ba ka Jylla Meghalaya ka dei ka jylla kaba jur slap bha bad ka ïoh um slap haduh 63 billion cubic liter ha ka shisnem, kaba dei ka jingïoh umslap ba heh bha hynrei ka Sorkar pat ka la lah ban pynlang tang 1 billion cubic liter na kane ka umslap.
“Ka Meghalaya ka dei kawei na ki jaka ba jur bha u slap ha pyrthei. Ngi ïoh haduh 63 billion cubic liter ka um man la u snem hynrei na kane, haduh 31 billion cubic liter ka tuid sha Bangladesh bad 31 billion cubic liter ka tuid sha Assam bad la lah ban pynlang tang 1 billion cubic liter” ula ong haba pyllait ia ka Meghalaya Water Smart Kid Campaign, ka kam ïalap ba la shim lyngba ka Jal Jeevan Mission (JJM) ban pynsngewthuh ïa ki khynnah halor ka jingkongsan ban pynlang ne tyngkai ïa ka um.
U Myntri Rangbah ula ong ba kum ka sienjam ha ka jingïaleh ban tyngkai bad pynlang ïa ka um, ka Sorkar Jylla ka la shim ïa kiba bun ki sienjam, kiba bun kyrdan da ki jingbei pisa ba wan nabar (Externally aided project (EAP) bad ka Ministry of Jal Shakti ka Sorkar India.
U pyntip ba haduh 1000 tylli ki top um la shna ha kylleng ki jaka ka Jylla khnang ban lah pynlang ïa ka um bad nang pynbun ïa ka um ha ka mei ramew lyngba ki project bapher bapher. “Ngi la pyrshang kat kaba lah ban tyngkai ïa ka um namar ka long kaba kongsan ban pynthikna ïa ka jingneh bad jingpynim pat ïa ki tyllong um” ula ong.
U Conrad u pyntip ba ka tnad Public Health Engineering (PHE) ka la ïoh bun bah ka song pisa na ka JJM bad EAP, kaba la jan kot ïa ka T.8000 klur. “Ngi don ka jingïaleh hakhmat jong ngi bad ki Ophisar ki la treikam khlem shongthait ban kynjoh ïa ka thong ha ka ban pynthikna ba baroh ki longïing ha Jylla kin ïoh ïa ka um” ula ong.
Ha kajuh ka por, u Myntri Rangbah u pyntip ba hapoh ka JJM, ka Jylla ka la ïoh ïa ka khusnam kum ka Jylla ba pyntreikam bha (best performer) ba la ai da ka Ministry ka Jal Shakti nalor ka jingïoh ïa ki song pisa. U pyntip ba ka Jylla ka la pyndep palat 4 lak ki longïing ha ka jingpynïoh umkor hapoh ïing bad hapoh u Lber 2024, ka thong ban pyndep ka long 6 lak ki longïing.
Ha kane ka jingïalang, u Myntri Rangbah ka Jylla bad u Myntri ka Tnad PHE Marcuise Marak, ki la aiti ruh ïa ka khusnam Water Guardian halor ka jingpyrshang ban ïada bad tyngkai ïa ki tyllong um.
ïa kane ka khusnam la ai sha ka shnong Lumshyiap bad ka Water Sanitation Community ka Ri Bhoi District, ka Shnong Darechikgre bad ka Water Sanitation Community ka West Garo Hills District lem bad ka shnong Dura Kantragre bad ka Water Sanitation Community ka West Garo Hills District.