Dei ban leh tyngeh ka Sorkar ïa ka Dhar Company lada dei shisha ba trei torti ïa ka surok: Hek

Shillong, Naiwieng 08: U Nongïalam ka seng BJP u Bah AL Hek ula ong, ba lada lap ïa ki sabut ba ka don ka jingbamsap bad pyntrei torti ïa ka surok da ka Dhar Company, ka Sorkar Pdeng bad ka Sorkar Jylla kan hap ban leh da kaba tyngeh pyrshah ïa kane ka company halor ka jingkynnoh shna torti ïa ka surok NH-206.
Dang shen ka Joint Action Committee jong ka War Jaintia kala byrngem ban leit ujor sha ïing bishar High Court pyrshah ïa ka Dhar Company kaba shna ïa ka National Highway (NH-206) ha ka jinglut jingsep kaba kot haduh T.43 klur tam, hynrei kane ka surok tang hadien 2 bnai ka la la jot rathai noh.
Ka surok NH-206 ka dei kaba sdang na Jowai marjan ka surok NH-106 bad ka ïaid lyngba sha Dawki bad kut pat ha Mylliem. Ka dei ruh shibynta jong ka surok Shillong-Sylhet.
U Bah AL Hek ula ong, “ba lada lah ban pynshisha lyngba ki sabut kiba biang ïa ka jingdonkti ha ki kam bamsap, ka sorkar pdeng bad ka sorkar jylla ka dei ban leh da kaba tyngeh pyrshah ïa katei ka kompani”
Haba kylli la kan poi ruh shaduh u pud ban ‘Blacklist’ ïa katei ka kompani, u Bah Hek ula ong ba lada lah ban pynshisha ba ki donkti ha ka kam bamsap kumta kan sa wan hi.
Haba kylli la dang donkam shuh ïa ka sabut haba la pynpaw ha ka RTI, u Bah Hek ula ong, “Ngam pat ïohi ïa kata ka kaiphod jong ka RTI, pyni shwa ïa nga, nangta ngan sa ngeit ïa phi”
U Bah Hek ula ong ruh ba ym lah ban pdiang ïa kum katei ka rukom treikam jong kompani bad ka sorkar kan sa shim ïa la ka rai.