Ka jingsam skhim khohreh shuwa ka elekshon

0

Kat shaba phai la sha ka mon ne sha ka diang ha kine ki sngi, ka thnem ka ïew sam skhim na ka liang jong ka sorkar bad kumjuh ruh na ki MLA. Nangta ka jingplie mawnongrim na ka liang jong ka sorkar kaba long la jan man ka sngi. Tang hapoh shi bnai u Myntri Rangbah u la plie lai tylli ki C&RD Block bad ki ban dang plie shuh ruh ki dang don. Ym tang katta ka jingplie mawnongrim ban tei ïa ki ophis Block ba thymmai ruh ka la ïaid la jan man ka taiew. Kane ka pyni ba ka sorkar ne ki MLA kadei kumba ong u Bah Prestone Tynsong ka jingpynbiej ba shisien san snem, namar ba la shu plie kyrkieh khyndiat bnai shuwa ka elekshon.
La ïohi ruh ba ka Party kaba ïalam ïa ka jingsynshar ha ka sorkar ka leh trai khlieh bad pynpawnam bha ïalade ha kane ka sorkar MDA. Mynta lada ïaid ha Sor ne Nongkyndong ruh, ki Signboard kiba heh baheh ki don tang ka dur jong u Conrad Sangma, Myntri Rangbah ka jylla. Ka dur jong u ryngkat ki jingthoh ba don ha ki skhim rep, ha ki skhim tymmen, ha ki skhim surok bad ha baroh ki skhim pynroi jong ka sorkar. Ym i dei shuh ba kadei ka sorkar synrop, la i kumba kadei ka sorkar jong ka NPP marwei.
Hynrei u paidbah mynta u la stad bad um da donkam ban ïohsngew ïa u lane ka MLA ba kin da put ronsing ïa ki kam ba ki leh lane wat ïa kito ki MLA kiba ju smat bha ai khubor manla ka sngi ba ki ai skhim ïa ki shnong, ïa ki skul, ïa ki kynhun bad kiwei ha kiwei ha ki shnong ki thaw. U paidbah u bishar bad u da tip shai ba ki MLA kim don eiei hi ruh nalade bad ka skhim kaba ki ai ka dei hi ka jong u paidbah. Uba ïaroh ïa ka jingtrei jong u MLA lane ka MLA dei tang uwei ne ar.
Ki buit khroh vote ïa ki paidbah ki paw pylleiñ dang shen haba u National President jong ka National Peoples Party Conrad Kongkal Sangma u pynlong ïa ka jingïalang pynrung dkhot ïa ki paidbah ka thaiñ Maweit hadien ba ladep buh ïa u mawnongrim ban siang rong noh ïa ka surok ha ka shnong Maweit ka bym pat ju ïohi surok rong mynno mynno ruh ha ka shnong jong ki.
Hadien ka jinghiar suki suki ka jingpang khlam COVID-19 hapoh kane ka jylla, ka jingtreikam bad ka dur ba shisha jong ka NPP ka la nang paw suki pa suki. Shwa u snem 2018, ka NPP ka la leit sha ki paidbah ban tyrwa ba kan weng ïa ka jingshah khang tih bad shalan dewiong ka jylla baroh kawei hynrei ki san lyiur ki la kut artat ka NPP kam shym la lah satia ban leh eiei wat tang khyndiat bad kane ka kam ka dang shu tyllun na kawei ka sngi sha kawei ka sngi kat haduh ba paw pyrthei pynban plak da ka jingshah kynnoh bamsap bad jan baroh ki kam la shu pynïaid ha ka kyrteng kita ki High Level. Ka Congress bad ka BJP ka ki ju kren pyrshah bha ïa ka bamsap ka bampoh hapoh ka Sorkar MDA haduh kine ki sngi watla ki MLA ka Congress bad ka BJP ki dei kiba ïatreilang hapoh kane ka Sorkar ba la ïalam da ka NPP.
Ka jingpyndonkam ki paidbah ka Social Media ha kine ki sngi ka long kaba shyrkhei haduh katta katta bad u paidbah hi u ïohi bad u bishar na ka sngi sha ka sngi aiu ki MLA kiba don hapoh ka Sorkar ki trei bad ki leh, la ka long ki trei bha lane ki shu trei thohmut thohmat tang ban shu pynbiej mit mit da kaba shu sam tin sop iing, sam shatri kup slap, sam shuki, sam khiew sha ki shnong ki thaw. Kine kim don jingphoida eiei ïa u paidbah namarba kine ki jingïarap kiba wan na ki MLA ki dei hi kiba la thied na ka MLA scheme.
Ka jingsahdien jong ka jylla haduh kine ki sngi ka la nang hiar arsut. Ki Sorkar ki leit bad ki wan hynrei ka jylla Meghalaya ka dang ïai sah dien hi kumjuh. Ki surok ki sah kumjuh, ym don Medical College, ym don Engineering College bad ym don eiei watla ka jylla Meghalaya ka la kynjoh sha ka rta kaba la san phew snem. Peit nuksa ïa ka jingkiew irat ka jylla Assam, ka long kaba ratbah haduh katta katta, lada synshar ka Congress lane ka BJP. Katba ha Meghalaya lada synshar ki seng riewlum lane ki seng heh nabar ka jylla ruh ym don kam pynroi eiei ruh em. Kiba phoida bad kiba myntoi dei tang kiba ïoh shong ha shuki katba u paidbah u nang ïai duk bad u im jynjar trah.
Ki jubanlak ba ki seng saiñpyrthei ki la khlei ha ki rynsan elekshon ki shu kylla mulot khlem da pyntreikam wat tang kawei ruh namarba ki jingkular ki long tang ban shu pynbiej kai ïa u paidbah.

Leave A Reply

Your email address will not be published.