Ka jingpyntreikam ïa ka GST ka la wanrah ïa ka khuid ka suba haba lum ïa ki khajna: Bah Marpna

Shillong Naitung, 05: Ka CGST Shillong Commisionerate ka la rakhe ïa ka jingdap 7 snem jong ka jingpyntreikam ïa ka Goods and Services Tax ne GST Act ha ka jingïalang kaba la pynlong ha State Convention Centre, Shillong ha kaba kiba ki la wan ban ïashim bynta.
Ha ka prokram la donlang u Commissioner ka GST Shillong u H Soikhanthang, ka Commissioner jong ka Audit ka HM Anal, u Bah KK Marpna na ka State GST, u ADC ka GST Shillong u Pauzakham Ngaithe bad kiwei.
Haba ai jingkren u Bah KK Marpna ula ong ba ka 1 tarik u Naitung 2017 kadei ka sngi kaba sah jingkynmaw ha ka histori jong ka ri ha kaba ïadei bad ka jingshim ïa ka khajna bad ka jingsdang pyntreikam ïa ka GST ka la wanrah ïa ka jingkylla halor ka jingïoh lum ïa ka khajna hapoh ka ri bad ka la don ruh ka jingpynïaid ruh ïa baroh ki khajna jong ki sorkar jylla bad ka sorkar pdeng halor kane ka bynta.
Shuh shuh u la ong ba kane ka rukom pyntreikam ïa ka GST ka la wanrah ïa ka jingkhuid jingsuba ha kaba ïadei bad ka jinglum ïa ki khajna hapoh ka ri bad ha kine ki 7 snem kiba la leit ka tnat lum khajna jong ka jylla ka la ïatreilang bad ka Tnat jong ka sorkar pdeng kiba la ai ka jingkyrshan kaba radbah bad kumjuh ha kaban ïoh ïa ki jinghikai ki bapher bapher kaba la long ka jingmyntoi kaba khraw ïa ka ri.
Na ka liang ka ka HM Anal ka la ong ba ka GST ka la noh synniang borbah ban kyntiew ïa ka ïoh ka kot jong ka ri bad ïa ka jingkhuid jingsuba bad ka rukom treikam kaba ïaid beit ïaid ryntih ha ki kam.
“Mynta ka jingïohlum ïa ka GST hapoh ka ri ka long kumba T. 1.6 Lak Klur bad bun ki kam khaïi pateng kila rejistar hapoh jong ka GST bad ka jingbud ryntih jong ki nongsiew ïa ka khajna ka la kiew bha bad kane ka la urlong kadei lyngba ka jingïatreilang hapdeng ki nongkhaïi pateng, ki riewstad ha ka liang ka khajna bad ki nongshong shnong ka ri,” ong ka HM Anal.
Ka la ong ruh ba ka kamram jong ka tnat Audit ha ka GST, ka sorkar ka long kaba shimkhia bha ba kan don kano kano ka jinglait tuh ha ka jingïoh pdiang ïa ka khajna bad ka aiñ jong ka GST ka la kynthup lang ïa katto katne ki kyndon ban tehlakam ba kan ym don kano kano ka jinglait tuh jong ka khajna bad dei halor kane ka bynta ba ka tnad Audit ka don ïa ka bynta kaba khraw ban leh ha kane ka phang bad ka bynta.
Ka la ïathuh ruh ba ka kamram jong ka Audit ka long ban peit la kiba dei siew ïa ka khajna ki la dep siew thikna ne em ïa ka khajna katkum ka dor kaba la buh, ban peit ba kam dei ban don ka jingsiew duna ïa ka khajna.
Ha kane ka sngi la pynlong ruh ïa ka jingïakob ïatainia hapdeng ki samla pule ka jylla halor ka mat ‘GST a game changer for both Tax Payer and Revenue Department’.
Kine ki heh ki haiñ ki la sam ïa ki khusnam sha ki nongjop ha ka jingïakob ïatainia bad la ai jingithuh ruh ïa ki karkhana bad ïa ki riewshimet kiba ju siew thikna ïa ka khajna GST.