Shillong, Rymphang 08 : U MLA ka BJP na Pynthorumkhrah, Bah AL Hek ha ka sngi Palei u la kubur ba ka jingpynslem jong ka party ban pynbna ïa ki kyrtong kiban aireng ha kane ka elekshon MP kaban sa long shen ha ka Ri, kan ktah jur khamtam eh ha kane ka jylla.
Haba kren bad ki lad pathai khubor, u Bah Hek ba dei ruh u Myntri ka tnad Veterinary ka sorkar jylla u la pynpaw ba kiwei ki party ha ka jylla ki la dep ban pynbna ïa ki kyrtong ban aireng ha kane ka elekshon MP la ka long na Shillong ne Tura Parliamentary seat.
“Nga kubur ba ka jingpynslem ban pynbna ïa ki kyrtong kiban aireng ha kane ka elekshon la ka long na Shillong ne Tura, kan ktah jur ia ka party. Hynrei ngim lah pat ban leh ei ei namar ka rai ba khatduh kadei na ki nongïalam na High Command na Delhi,” u la ong
U Bah Hek u la ïathuh ba kane ka jingpynslem pynbna ïa ki kyrtong kam dei satia tang ha Meghalaya hynrei ka long salonsar ha baroh kawei ka Ri bad kumta ki la hap ban shu hun lang ïa kata. Shuh shuh u la ïathuh ruh ba ki nongïalam ka party ha Delhi kim pat khot satia ïa ka jingïalang bad kumta na ka liang ki nongïalam ka party ha Meghalaya ruh kim pat lah ban tip ïano ka High Command ka mynjur ban ai tiket.
Watla katta ruh u ong ba halor ki kyrtong kiban aireng na Meghalaya dei tang u President ka party hi uban tip kham bha namar dei ma u ba peit ha ka jingpynkhreh ïa ka elekshon bad ruh ïa ki kyrtong kiban aireng ha kane ka elekshon MP.
