6 hajar klur kyntiew ka Sorkar Pdeng ïa ka bhah na ka PM-DevINE sha ka NE, ïathuh u Secretary NEC

Shillong, Rymphang, 8: U Secretary jong ka North Eastern Council (NEC) u K. Moses Chalai ha ka sngi Palei u la ong ba ka jingïoh bhah na ka bynta ki jylla ka thaiñ Shatei Lammihngi kam da long eh kumba la khmihlynti.
“Hynrei ngi la ïohi ba ki Jylla ki la sdang ban khih ban ksar. Lymda ki ïaid stet, ngi ruh ngin ym lah ban ïaid stet,” ong u Chalai ha ka jingïakren bad ki lad pathai khubor haba jubab ïa ka jingkylli halor ka jingujor ba ka NEC ha ki khyndiat snem kam shym la lah ban wanrah ïa ki projek ba thymmai na ka daw ka jingkyrduh pisa.
“Ha ki khyndiat sngi ban sa wan, ïa kane yn sa kham pynbha. Ïa mynta ka DoNER ka ju mang pisa tang kumba T. 3,000 hajar klur hynrei mynta u snem lyngba ka Prime Minister’s Development Initiative for North East Region (PM-DevINE) Scheme, la kyntiew sha ka T. 6,000 klur,” u la ong bad bynrap, “kaei kaba mut ban ong ka long ba ka Sorkar India ka la sngewthuh ba ngi lah ban leh bha hynrei ki don pat ki jyrwit jyrwat hangne hangtai bad nga kyrmen ba ngin sa jam sha kawei pat ka bynta ha kaba ka mang tyngka kan kham bun bad ka NEC ruh ka donkam kham bun (ka pisa),” u la ong.
U Secretary ka NEC u la kyntait ban kynthoh halor ka jingtreikam jong ki Jylla ka thaiñ Shatei Lammihngi da kaba ong, “ngan ym jer kyrteng hynrei baroh ki jylla kim long kumjuh hynrei ha ka jinglehbha ki don bad ka bhah pisa kaba thymmai kam wan lyngba ka State Treasury (lane) ka Tnat Pla Tyngka jong ka Sorkar, ka wan beit beit sha ki nongpyntrei. Mynta ka shong ha ka tnat badei peit bad ki nongpyntreikam kumno ki lah ban pyndep kham kloi ïa ka kam. Kam long kaba dei ïa nga ban jer kyrteng hynrei don napdeng jong ki, kiba leh bha.”
Haba kren shaphang ka Meghalaya, u Challai u la ong, “ban shu kren salonsar, ha Meghalaya, ki tnat treikam kim long kumjuh, katto katne ki tnat treikam ki ai jubab kloi, katto katne teng teng i kumba ki suki shaba palat. Namarkata, hapoh ka jylla baroh ki tnat treikam kim long kumjuh. Nga sngewthuh ïa ka rukom pynïaid jong ka Sorkar Meghalaya ka la kham bha bad ka lah ban leh bha ha ki sngi ki ban dang wan.”
U Financial Adviser ka NEC u Gaigongdin Panmei, u la ong ba ka daw kaba kongsan ba ka thaiñ Shatei Lammihngi ka mad ka dei ka jingbym lah ban pynlut. Katkum ka jingong jong u, ka Sorkar India kan ai kham bun ka pisa lada ki jylla ki lah ban pynlut pisa kham bun.
“Watla lada phi don ïa ka pisa hynrei phim tip kumno ban pynlut bad pynlut bha bad pynlut ha ka por, kane ka dei ka daw kaba kongsan,” ula ong bad bynrap, “ka jingdon ka mang tyngka ka shong ha ka jinglah ban pynlut ïa ka pisa. Ngi ju shong pyrkhat kam manla u bnai Risaw bad ban bishar ïa ki rukom pynlut pisa kynthup ïa ki jylla bad da kaba pynshong nongrim halor ka jingpynlut pisa kaba ïadei bad ki kam ba la trei, ïa ka mang tyngka la pynthymai manla u snem,” u la ong.
Ha kawei pat ka liang, u Secretary ka NEC u la kubur ba ka jingïoh jaka ka dei kawei ka jingeh ynda la wanrah ban pyntreikam ïa ki projek hapoh kane ka thaiñ. U la ong ba kine ki projek ki kynthup ïa ka surok ha kaba ka Sorkar kam ju lah ban weng ïa ka jingeh ha kaba ïadei bad ka jingpan jaka.
“Nga ruh nga dei u riewlum hynrei ngim lah ban don ïa kajuh ka jinglong, ki riewlum ki dei ban nang ban tip. Ka dei ka mat kaba khia. Ki don ki jingteh pyrkhing, ki don ki jingïada bad lada donkam ngi lah ban ïapynbiang tarajur, bad nga mut ban ong, lada nga kwah ïa ka surok hynrei ngam ai jaka, kata kan ym lah ban long daleilei ruh em,” la ong u Chalai.