Hiar ka kyrtong MP ka NPP sha rulum Jaiñtia ban ban pan jingkyrshan na ki paidbah

Jowai, Rymphang 08: Ka Dr. Mazel Ampareen Lyngdoh kaba dei ruh ka myntri sorkar ka ban ïakhun ïa ka Election Member of Parliament (MP) naka 1-Shillong Parliament Constituency naka seng National People’s Party (NPP) mynta ka sngi kala wan hiar sha Jaiñtia ha ki ar tylli ki Constituency ha 1-Nartiang bad ha 2-Jowai Constituency.
Kane ka myntri kala leit hiar nyngkong ha shnong Wahiajer haka jingïalang bala pynlong ha Wahiajer Community Hall, ha ka jingsynran lang naduh u Symbud Myntri Rangbha ma Sniawbhalang Dhar, u MLA ka Jowai ma Wailadmiki Shylla uba dei ruh u State Working President, ka kong Santa Mary Shylla (MLA), u CEM ka JHADC ma Thombor Shiwat, ki MDC, ki Waheh Shnong, ki President, Secretary bad ki Leader ka Party naka 1-Nartiang Block.
Ïa ka jingïalang la pynïaid da u ma Hamkom Khyriem President ka 1-Nartiang Block uba la pdiang sngewbha ïa baroh ki nongwan sha kane ka jingïalang ba nyngkong jong ka Dr. Ampareen da ka jingkyrmen skhem lyngba kane ka jingïalang ka Party kan dang ïoh bor ban trei shitom met bad mynsiem ha kine ki sngi ban wan na ka bynta ka jingpynkhreh ïaka Election MP.
Ka kyrtong MP ka Dr. Ampareen Lyngdoh haka jingkren kala pynpaw ka jingsngewnguh lyngba ka jingïaid lynti jong ka haka kam seng saiñ hima sima kaba la sdang naka ïing ka sem kata naduh u kpa jong ka bad ka long ka ïing kaba dang bteng haduh kine ki sngi ban ai jingshakri ïa ki paidbah naduh ka snem 1972.
Kala ong ha kane ka jingïakhun mynta ka kynti kan hap ban leit mih sha baroh ki 36 tylli ki Constituency, kala pynsngew ba ka jingmih jong ka shakhmat ban ïakhun ïa kane ka election MP ka dei lyngba ka jingai mynsiem jong u ma Sniawbhalang Dhar (MLA) ba shim ïa kane ka rai.
Kala ong ba ka jingmih jong ka sha kane ka jingïakhun kan ym kheiñ shuh ïa ka jinglong MLA, ka jinglong myntri bad ka hap mih naduh 5 baje mynstep bad lada lap ka miet kan hap thiah ha shiteng lynti da ka kali tang na ka bynta ka burom ba khraw jong ka party bad ïoh ka jingsynshar hok.
Kala pynsngew kumba long mynta ki District Council hapoh ka jylla kiba duh bor haduh katta katta, tang na ka daw ka jingbym treikam jong ki MP ban pynsngew sha ka sorkar kmie halor ki skim bapher bapher bad kala kular ban trei shitom katba lah ynda kan wan ha ka jingjop.
Ha ka juh ka por ka ai jingïaroh ruh ïa ka kong Santa Mary Shylla MLA kawei na ki longkmie ba nyngkong ban long kum ka MLA na Jaiñtia, da kaba ong ba ka dei ruh “ka sur jong ki bym don sur” bad ha ka jingïakhun MLA jong ka kala lah ban pynliem ïa ki riew rangbah (Gian) haka kam saiñ hima sima.
Kala ong kiba bun ki paidbah ki phah ïa ki MP kiba khlem da puson bha ïa ki kam ba ki trei bad kim juh kren eiei ïa ki skim jingïarap kiba wan na ka sorkar kmie kum ki tyndong Gas, ki lad jingkoit jingkhiah ban ïoh jingsumar na ki hospital, ki skim ïing ba duk, ki Scholarship bad kiwei de nalor ka jingslem ban ïoh ïa ka ILP namar ïa kine lah ban ïakreh hapoh ka ïing Parliament ka Ri.
Shuh shuh kala pynïasriem lada ka rukom treikam u/ne MP ka long kaba dkoh, ka long kum kato ka mobile kaba khlem Network kaba lah ban wanrah shibuh ki jingjynjar.
Ha ka juh ka por ka pan ka jingkyrshan ba pura na ki paidbah ha kane ka kynti khnang ba kan lah ban shakri khambha kum ka MP naka 1-Shillong Constituency, kala kular shen ka sa wan biang hapoh kane ka Constituency haka ka shnong Mookyndur WJHD ban plie paidbah ïa ka jaka sumar (AYUSH) kaba kot 10 klur tyngka.
U ma Sniawbhalang Dhar ha ka jingkren ula kyntu jur ïaki nongïalam ne ki Leader ka 1-Nartiang ban kin treishitom daka jingïatylli naka bynta kane ka jingïakhun MP bad ban pynjop don burom ïa ka kong Ampareen.
Ula pyntip ruh shen ki sa lum ïa ka jingïalang naka bynta ki kynhun bapher bapher naduh ki nongïalam shnong, ki nongïalam jong ki seng kynthei, samla, ki kynhun treimon sngewbha, ki nongïalam ñiam nalor kiwei de ban ïakren bha ïa kane ka kam naka bynta ka kyrtong MP jong ka seng NPP.
Ha ka por janmiet ka kong Ampareen kala leit hiar sha ha Jowai ha ka jingïalang ba la pynlong ha Ladthadlaboh Indoor Hall ban pynlong ïa kane ka juh ka jingïalap Election.