K ane ka juk ka dei ka juk kaba ki briew ki ïabeh ïa ka por haba ki leit jingleit bad kumta bunsien kiba leit jingleit na ka bynta ka kam bad ka kamai kajih ki ju leit beit da ki liengsuiñ. Kumba long mynta wat la ngi la don ka Shillong Airport ne ka Kad Liengsuiñ Shillong kaba ha Umroi, hynrei ki liengsuiñ ki dang duna bha kiba her na katei ka kad liengsuiñ bad ha ka Sngi U Blei lei lei ym ju don liengsuiñ ba her na katei ka kadliengsuiñ kumta ki briew ki dang hap ban hiar beit sha Guwahati ban leit kiew liengsuiñ ban leit sha kino kino ki bynta jongka ri ne wat shabar ri ruh.
Na ka liang ka sorkar MDA kaba ïohi ba kane ka ktah ym tang ïa ka por jong ki nongleit jingleit namar ki hap ban leit da ki kali naduh nangne shaduh Guwahati hynrei ka ktah ruh wat ia ka jingïoh lum khajna ka jylla . Kumta ka la don ka jingpynkhreh jongka sorkar mynta ban pynheh noh kloi ïa ka kad liengsuiñ khnang ba ki liengsuiñ kiba kham heh ban ïa kine kiba her mynta kiba kit tang 30 ngut tam ei ei ki nongleit nongwan kin lah ban hiar bad her na kane ka kad liengsuiñ.
Ka sorkar mynta ka dang ap ïa ka kaiphod na ka Consultant kompani kaba la thung da ka Airport Authority of India (AAI) ban bishar bniah la ki liengsuiñ kiba kham heh ki lah ne em ban hiar ha kane ka Kad Liengsuiñ Shillong ha Umroi. Lada ki lah ban hiar ka mut ka sorkar bad ka AAI kin hap ban pynjlan shuh shuh ïa ka Runway sa kumba katto katne spah meter khnang ba kine ki liengsuiñ ba heh ruh kin lah ban hiar bad ban her ruh khlem kano kano ka jingthut.
ïa kane ka kaiphod ka sorkar kan sa ïoh shen ha u bnai ban wan bad tang shu ïoh la sngewthuh ba lada biang lut nadong shadong ka sorkar kan sa sdang noh ïa ka kam kata hadien ba la ioh ia ka Detail Project Report (DPR) na katei ka consultant company khnang ban tip haduh katno ka sorkar kan hap ban pynlut na ka bynta ban pynheh ïa kane ka kadliengsuiñ.
Lada kane ka kad liengsuiñ ka treikam pura ka jingïoh kam ïoh jam ki khun samla ruh kan kiew namar ym dei eh tang ban trei ha kane ka kadliengsuiñ hynrei ki lah ban seng ïa ki dukan ban die jingbam, sha bad ja, coffee, ki tiar ki tar tynrai ba shna ha kane ka jylla, ki restuarant, ki hotel, ki guest house bad kumta ter ter. Namar haba ka leit ka wan ka la suk khlem pep kin don bun ki ban wan shangkai sha kane ka jylla da kaba wan lyngba kane ka kad liengsuiñ. Kin don ki ban kwah ban thied ïa ki tiar ki tar ba la shna na kane ka jylla ban long kum ki souvenir ne ki tiar sah jingkynmaw, ki don ki ban kwah sah miet noh hajan ka kadliengsuiñ bad ter ter.
Peit tang ka kad liengsuiñ ha Guwahati katno ka la ai kam ai jam ïa ki briew ba kin ïoh kamai jakpoh bad katno katei ka kad liengsuiñ ka la wanrah khajna ïa ka jylla Assam namar kiba bun ki nongleit nongwan na kane ka thaiñ ki dang shaniah beit ha katei ka kad liengsuiñ.
Haba peit ma ngi ki riew madan te kane ka Kad Liengsuiñ Shillong ruh kam i don jingeh ban lah ban hiar ki liengsuiñ kiba kham heh lada ym dei eh kito kiba heh duh ruh. Namar tang kiba pdeng ruh ka la biang bad ka la khring hi ïa ki nongleit nongwan.Kumta ka sorkar ka dei ban shim khia noh ïa kane ka kam kaba la sahteng la slem bah. Kumba kane ka sorkar ka la pyndep ïa kiba bun ki kam ba sahteng kum ka Hotel Crowborough kaba la pynkylla kyrteng mynta kum ka Viventa, ka Mariot Hotel bad kiwei kiwei ka dei ruh ban shim khia bha ïa kane ka kad liengsuiñ ruh khnang ba kan long ka jingmyntoi ïa ki paid nonshong shnong bad ïa ka jylla hi kumjuh.
Ym lah ban len ba ki bun kiba beiñ ba kane ka sorkar MDA ka dei ka sorkar kaba bamsap, ïa kata ym tip namar kiba beiñ ki shu kynnoh bamsap kim kdew pat hangno kata ka jingbamsap bad lada ki lap ki la dei ban kiew ïing lieh ïing saw khnang ba ka ïing bishar ba don burom kan bthah ban aiti tohkit sha ki tnad tohkit jongka sorkar pdeng ne ban thung da ka jingtohkit ba laitluid ban paw ki jingshisha. Hynrei kawei pat kaba kwah ban ong ba ym lah ban len kane ka sorkar MDA ka la leh hi ïa ki kam kiba la paw kiba ki sorkar mynshwa kim lah ban leh kum kitei ki ar tylli ki hotel, ka kam pynbeit pud wat la ym pat lah ban pyndep lut, ka kam pynkynriah ïa ki Harijan na Iew Mawlong kaba la poi artat sha kaba kut ka jingïapynbeit bad kumta ter ter . Khlem artatien ruh ba kane ka sorkar kan leh ïa kane ka kam ban pynheh ïa kane ka kadliengsuiñ kaba la sahteng da ki phew snem khnang ban ïoh hiar ki liengsuiñ ba kham heh.
