Ka jingkongsan jong ki mar bam kam dei tang ha kaba pynjah ïa ka jingthngan. Ka don ka bynta kaba khraw ha ki jingleh kmen, ki jingïalang ha ka imlang sahlang, ki dustur kaba pyni ïa ka deiriti jong ngi bad ki jingïadei ha ka imlang shlang. Ha kaba ïadei bad ka ïoh ka kot, ki mar bam ki kyntiew ïa ka roi ka par, ki plie lad ïoh kam bad ki wanrah ïa ka roi ka par ha ki jaka nongkyndong bad ha ka rep ka riang. Ka don ka bynta kaba heh ha ka ïoh ka kot jong ka ri lyngba ka jingpyndonkam hapoh ka ri bad ka jingshalan shabar ri. Katba ka India ka dang ïaid sha ka thong Vikasit Bharat ha u snem uba 78 jong ka jingïoh jinglaitluid, ka jingkyntiew ha ka jingshngaiñ ha ki mar bam ka long kaba kongsan bha. Kane ka mut ka jingpynthikna ba ki mar bam kiba poi sha ki briew ki dei kiba lait na ki jaboh bad ruh ka jingpynduna ïa ka jingsepei ki mar bam ban pynthikna ba baroh ki ïoh ïa ki mar bam kiba tei ïa ka met.
Ka jingpynbeit ïa ka jingsepei ki mar bam, khamtam ki mar bam kiba lah ban pyut kum ki soh bad ki jhur ka long kaba donkam bha ban kyntiew ïa ka jingshngaiñ ha ki mar bam bad ruh ka jingïaineh. Ka ïarap ruh ban pynthikna ba ki nongrep ki ïoh ïa ki dor kiba biang.
Shuh shuh, katba ka kam khaii ha ki mar rep bad ki jingbam ka dang kiew, ka jingseisoh ki kam ban pynthikna ka jingshngaiñ ha ka bam ka long kaba kongsan bha. Ki ri kiba la kham kiew ki don ki kyndon kiba khlaiñ ha kaba ïadei bad ka jingshngaiñ jong ki mar bam bad ruh ki rukom treikam ban pynthikna ka jingshngaiñ jong ki mar bam ba wanrah nabar ri. Ki jingbakla ha ka jingshngaiñ ki mar bam ki lah ban don ka jingktah kaba khraw ïa ka ïoh ka kot, ba kynthup ïa ki jingma ïa ka koit ka khiah jong ki paidbah, ka jingduh ka jingshaniah jong ki briew bad ka jingthut ha ka jinglah pynbiang ïa ki mar bam bad ka jingïaid ryntih ki dor. Kumta, ka jingïada ïa ka jingshngaiñ jong ki mar bam ka dei kaba donkam bha ban ïada ïa ka koit ka khiah jong ki paidbah bad ruh ban kyrshan ïa ka jingkiew jong ka ïoh ka kot, ka jingkyntiew ïa ka jingkhaii hapdeng ki ri bad ka jingpynthikna ïa ka jingïoh ïa ki iew.
Ban pynbeit ïa ki jingeh ha ka jingshngaiñ ki mar bam bad katkum ki jingkut jingmut ka India ban kot sha ki thong Sustainable Development Goal jong ka ri, ka Mang Tyngka jong ka Sorkar Pdeng na ka bynta u 2024-25 ka la buh kyrpang ka pisa ban seng 50 tylli ki multi-product food irradiation unit ha ki kam MSME. Kane ka dei ka dak jong ka jingkut jingmut jong ngi na ka bynta ka jingshngaiñ ha ki mar bam namar ka irradiation teknoloji ka kham pynneh ïa ki mar bam bad ka kyntiew ruh ïa ka jingshngaiñ jong ki, ha kaba lah ban pynthikna ba ki poi sha ki briew katba ki dang bha bad ka pynduna ïa ka jingsepei ki mar bam.
Ka irradiation ïa ki mar bam ka mut ka jingpynshah ïa ki ïa ka ionizing radiation ha ka rukom ba la peit bniah bha. Kane ka pynduna bha ïa ki jingpang kiba pur lyngba ki mar bam da kaba pynïap ïa ki khniang. Ka ïada ruh na ka jingpyut ki mar bam da kaba pynsuki ïa ka jingpyut bad ka jingpynïap ïa ki khniang kiba pynpyut, bad ka pynduna ïa ka jingsepei ki mar bam da kaba pynsuki ïa ka jingpyut bad jingphuh syntiew. Ka pynduna ruh ïa ka jingdonkam ïa ki dawai kiba pynneh ïa ki mar bam, bad kane ka wanrah ïa ka jingïaineh ha kin kam pynbiang mar bam. Ka irradiation ka donkam ban pynshah tang shisien ïa ki mar bam kaba pynïaid ryntih ïa ki kam, kyntiew ïa ka jingshngaiñ ki mar bam bad pynduna ïa ki jinglut jingsep ha ki kam pynbiang mar bam.
Katba ka jingpyndonkam ïa ka radiation ban pynneh ïa ki mar bam kam dei ka kam kaba thymmai – ki rukom tynrai kum ka jingpyntyrkhong ïa ki soh, jhur, doh, dohkha bad kiwei kiwei da kaba thad ha ka sngi ka dei kaba la don naduh ki por hyndai – ka jingpyndonkam ïa ka irradiation technology ka la kiew hadien ka Codex Alimentarius Commission, shi bynta ka Joint Food Standard Programme jong ka Food and Agricultural Organization (FAO) jong ka United Nations, ka la pynskhem ïa ki rukom treikam ha kylleng ka pyrthei.
Ka irradiation, kum ka kam shet jingshet ka dei kaba shngaiñ bad ka pynthikna ïa ka jingshngaiñ jong ki mar bam ha ki bynta bapher bapher. Ka dei kaba la pur sha baroh ki jaka, khamtam ha ki ri kiba kham khlaiñ ki kyndon kiba ïadei bad ka jingshngaiñ jong ki mar bam kum ka United States, European Union, Japan, Australia, bad Canada ha kaba la pyndonkam bha ïa ka ha ki iew jong kine ki ri bad ki kam shalan mar bam. Ka nuksa jong kane ka dei ka jingïakut ha u snem 2012 ha kaba la plie lad ïa ka jingshalan ïa ki sohpieng na India sha United States hadien ba la tehlakam ïa kane la 20 snem. Ïa kane la lah ban leh hadien ba ka India ka la mynjur ban irradiate ïa ki sohpieng shuwa ban shalan ïa ki khnang ban pynduna ïa ki khniang jingpang bad kumta ïada ïa ki kam rep ha ka US.
Ka India ruh ka la jam shakhmat ha kane ka kam ha kaba ka la sdang 34 tylli ki jaka leh irradiation ha kylleng ka ri. Ka Tnad Food Processing Industries ka la don ka bynta kaba hah ban pynbiang ïa kine ki jingdon jingem, ha kaba 16 tylli na kine ki ïoh jingkyrshan na ka Tnad. Katba ka jingïaid shaphrang ka dei kaba itynnad, ka jingpynïar ïa ki jaka pynbiang mar bam kan kyntiew shuh shuh ïa ka bor jong ngi ban pyndap ïa ki jingdonkam ha ki iew mar bam.
Hynrei, ka jingpynbun ïa ki jaka leh irradiation ka ïakynduh jingeh namar ka jinglut jingsep kaba buh na ka bynta kane ka kam. Ka jingsdang ïa ka jaka leh irradiation kaba don ka tyllong 1 MCi Cobalt 60 ka donkam ka jingbei tyngka kaba kumba T. 25 haduh 30 klur khlem da khein ïa ki jinglut jingsep bai jaka bad kiwei kiwei ki jingdon jingem. Ka jingpyntreikam ïa kine ki jaka ka don ki bynta kiba bun ba kynthup ïa ka jingpeit ïa ki jingtyrwa, ka jingai jingbit, ka jingpynbiang ïa ka jaka, ka jingtei ïa ka jaka treikam, ka jingpynbiang ïa ka tyllong, ka jingpeit ïa ka jingshngaiñ, ka jingpeit ïa ka kam, ka jingpyntreikam bad ka jingpynbha na ka por sha ka por kaba kynthup ruh ïa ka jingbujli ïa ki tyllong radiation. Ki kynhun kum ka Bhabha Atomic Research Centre bad ka Atomic Energy Regulatory Board ki peit ïa kane ka kam.
Watla ka jinglut jingsep ka long kaba bun na ka bynta kine ki jaka treikam, ki don shibun ki lad na ka bynta ki nongbei tyngka. Ka jingdawa ïa ki mar bam kiba shngaiñ bad kiba neh hapoh ka ri bad shabar ri ruh ka plie lad ïa ka jingïohnong haba bei tyngka ha kane ka kam. Ka jinglah ban kyntiew ïa ka jingshngaiñ jong ki mar bam bad ka jingneh jong ki ka mut ba ki jaka leh irradiation ki don ka bynta kaba khraw ha ka jingpynduna ka jingsepei ki mar bam bad ka jingpynïahap bad ki kyndon ban shalan shabar ri. Namar ka kam shalan mar bam jong ka India ka dei kaba la antad ban poi sha ka USD 535 billion shuwa u 2025-26 bad ka jingkiew ka bynta jong ka ri ha ka kam shalan mar bam, ki jaka leh irradiation ki dei shisha ki lad bei tyngka kiba lah ban ai jingmyntoi bha.
Ban kyrshan ïa ka jingpynbiang ïa ki jingdon jingem na ka bynta ka jingpynduna ïa ka jingsepei ki mar bam, ka Tnad Food Processing Industries ka ai ruh ka jingïarap pisa kaba haduh T. 10 klur ïa man ka projek ban seng ïa ki jaka leh irradiation. Kane ka jingïarap kaba ai lyngba ki grant ne ki subsidy, ka dei ban pynbiang ïa ki mar kiba lah ban pyut, ba kynthup ïa ki soh bad ki jhur, bad kyntiew ïa ka jingkhuid bad ka jingneh jong ki. Hadien ka jingpynbna ha ka Mang Tyngka 2024-25 jong ka Sorkar Pdeng, ka Tnad ka la khot ïa ki Expression of Interest na ki nongseng kam lajong ba kin sdang ïa ki jaka leh irradiation hapoh ka Integrated Cold Chain & Value Addition Infrastructure (skhim Cold Chain).
Namar ka bynta kaba khraw jong ka irradiation ban kyntiew ïa ka jingshngaiñ bad ka jingneh jong ki mar bam, ka long kaba donkam ban pynïar ïa ki jingdon jingem jong ngi ban pyndap ïa ki jingdonkam ha ki kam pynbiang mar bam jong ka India bad ruh ka jingshalan mar bam shabar ri. Ngi kyntu ïa ki nongbei tyngka bad ki nongseng kam lajong ba kin shim ïa kane ka lad kaba ka Tnad ka ai. Ka jingbei tyngka ha ka kam irradiation kan kyntiew ïa ka jingshngaiñ ki mar bam, pynduna ïa ka jingsepei bad kyntiew ïa ka jinglah pynbiang mar bam ha kylleng ka India, ha ryngkat ka jingpynthikna ba ki nongrep ki ïoh ïa ki dor kiba ïahap. Ïasnoh kti lang bad ngi ban pynkylla ïa ki kam jong ka India kiba ïadei bad ka bam – ka jingbei tyngka jong phi kan kyntiew ïa ka lawei jong ka kam rep kaba ïaineh bad kan nohsynniang sha ka ïoh ka kot kaba khlaiñ.
