Ha ka por jong ka jingkiew ka jingbym thikna ha ka pyrthei, ka jingkiew ka jingdawa bording, bad ki jingeh kiba jur ha ka jinglong ka suiñbneng, ka jingdonkam kaba kongsan hakhmat ka pyrthei ka long ban tei ïa ki rukom pynmih bording kiba kham khuid, kiba kham shngaiñ, kiba jemdor, bad kiba lah ban shaniah, katba ki dang ïahap bad ki jingdonkam ha ka roi ka par bad ki jingangnud ha kaba ïadei bad ka ïoh ka kot jong ki ri kiba dang kiew.
Ka bording kaba khuid ka la nang kham long kaba kongsan ha ka jingpynbiang ïa ka bording, ka jingkiew jong ki karkhana, bad ka roi ka par kaba jrong samoi. Ka lah ban pynduna ïa ka jingshah ktah ha ki ïew umphniang ki bym thikna, ban pynïar ïa ka jinglah ban ïoh ïa ka bording, ban plie ki lad ïoh kam ïoh jam, ban pynkhlaiñ ïa ki karkhana hapoh ka ri, bad ban kyntiew ïa ka jingskhem jong ka ri. Hynrei ki lynti sha ka bording kaba khuid kim lah ban long kiba ryntih. Ki dei ban pyni ïa ki jinglong jingman jong ka ri, ki jingdon jingem, bad ki jingthmu ba kongsan jong ka roi ka par.
Dei hangne ba ka jingïatreilang hapdeng ki ri kiba dang kiew ka long kaba donkam. Ka jingïatreilang kaba kham khraw hapdeng ki dkhot jong ka BRICS ka lah ban ïarap ban pynsted ïa ka jingpyndonkam ïa ka bording kaba khuid katba ka dang kyntiew ïa ki thong jong baroh na ka bynta ka jingpynbiang ïa ka bording, ka jingpynneh pynsah, bad ka roi ka par kaba kynthup lang ïa baroh.
Ka jingshem jong ka India hi ka pyni ba ka bording kaba khuid kadei ban sdang na ki briew.
Ha kine ki shiphew snem ba ladep, hapoh ka PM Sahaj Bijli Har Ghar Yojna (SAUBHAGYA), la pynbiang ïa ka jingpynïasoh bording sha jan 28.6 million tylli ki longïing, kaba la kyntiew ïa ka jingpynbiang bording ïa baroh bad kyntiew ïa ki rukom im ha kylleng ki thaiñ nongkyndong bad ki thaiñ kiba dang duna ka jingïoh ïa ki lad jingshakri. Hapoh ka Pradhan Mantri Ujjwala Yojana (PMUY), la ai palat 105 million tylli ki jingpynïasoh LPG na ka bynta ki longkmie, kaba ïarap ban kyntiew ïa ka rukom shet jingshet kaba khuid, kyntiew ïa ka jingkoit jingkhiah ha ka longïing, bad ban pynduna ïa ka jinghap trei shitom.
Kine ki sienjam ki pynpaw ïa ka nongrim kaba kongsan: ïa ka jingpdiang ïa ka bording kaba khuid ym lah ban thew tang ha ki megawatt ba la buh ne ki bor ba la wanrah shuh shuh, hynrei wat ha ki lad ki lynti ba la wanrah, ki lad kamai jakpoh ba la pynkhlaiñ, bad ka jingkyntiew ïa ka rukom im kaba bha.
Kane ka rukom treikam kaba buh nyngkong ïa ki briew kadei ban ïahap bad ka jingheh bad ki jingdon jingem ba la kyrshan. Ka bording ba lah ban pynthymmai ka la kylla long ka bynta pdeng jong ka khana jong ka bording kaba khuid jong ka India, hynrei ka jingjop jong ka, ka shong ha ki rukom treikam kiba kyrshan ïa ka. Lah ban pyndonkam kloi ïa ka bording solar bad na ka lyer, hynrei ka lad ba pura jong ki kan urlong tang ynda ka jingpynpoi, ka jingsam, ka jingbuh bad ka jingpynïaid ïa ka grid ki ïaid ryngkat.
Ka India ka la kiew bha ha kaba pynkhlaiñ ïa ki rukom treikam kiba kyrshan ïa ka jingpynïar ïa ka bording kaba khuid. Ka jingpynbiang bording ka la nang kiew stet, ryngkat bad ka jingkiew ki jingbei tyngka ha ka jingbuh bording bad ka bor jong ka grid ban pynkylla. Ki jingpynkylla ha ka jingsam bad ka jingpdiang ïa ki teknoloji kiba ïadei bad ka bording ki ïarap ruh ban thaw ïa ka kam bording kaba kham stet ban pynkylla bad kaba lah ban shaniah kaba lah ban pynïasoh lang ïa ki bhah kiba nang kiew jong ka tyllong bording ba lah ban pynthymmai.
Ka bor jong ka India kaba pyndonkam da ki tyllong ki bym dei ki mar fossil ka la tam ïa ka 288 GW mynta. Nalor ki projek ba heh kiba ïadei bad ka jingpyndonkam, ki rukom treikam Distributed Renewable Energy (DRE) ki nang pynïar shuh shuh ïa ka jinglah ban ïoh ïa ka bording kaba khuid ha kylleng ki jaka nongkyndong bad ki jaka ba dang duna ka jingïoh ïa ki lad jingshakri lyngba ki roofteop solar, ki solar pump, ki mini-grid. Kine ki rukom treikam ki kyrshan ïa ka jingpynlang um, ka jaka buh pyndait-thah, ki skul, ki jaka sumar, bad ki karkhana ha ka thaiñ, katba ki pynkhlaiñ ïa ka kamai kajih ha ki jaka nongkyndong bad ka jingskhem ka ïoh ka kot ha ka thaiñ.
Ka PM Surya Ghar: Muft Bijli Yojana jong ka India ka pyni ïa kane ka jingthmu ha ka jingheh. Kumba 4 million tylli ki longïing ki la dep ban ïoh jingmyntoi na kane ka prokram, kaba ïarap ïa ki nongpyndonkam ban long ki nongnoh synñiang sha ka rukom pynmih bording kaba kham pynïaid beit bad kaba ïashim bynta lang.
Hynrei ka jingbei tyngka kan long kawei na ki nongplie lad kaba kongsan tam ban pyniar ia ka bording kaba khuid. Bun ki ri kiba dang kiew ki don ka lad kaba khraw ha kaba ïadei bad ka bording ba lah ban pynthymmai, hynrei ban pynkylla ïa kane ka lad sha ki projek kiba lah ban pynheh bad ban pyndonkam ka donkam ïa ka jinglah ban ïoh ïa ka jingpynbiang pisa kaba jemdor bad kaba neh slem.
Ki jingbei tyngka ha ka bording ba lah ban pynthymmai, ki lad pynpoi bording, ka jingpyn kylla thymmai ia ka grid, ki rukom buh bording, bad ki teknoloji kiba seisoh bha ha kaba iadei bad ka bording kan long kaba donkam ha ki snem ban wan. Ki jaka treikam kum ka New Development Bank ki lah ban don ka bynta kaba kongsan ha kaba kyrshan ia ki ri kiba dang kiew lyngba ka jingbei tyngka, ka jingiatreilang ha ka liang ka teknoloji, bad ka jingkyntiew ia ka bor treikam.
Kaba kongsan kumjuh ka long ka jingdonkam ban tei ia ki lad pynbiang kiba khlainbad ki bapher bapher na ka bynta ki teknoloji pynmih bording kiba khuid. Ka jingpynkhlaiñ ïa ka jingïatreilang ha kylleng ki kam shna tiar, ka teknoloji, ka jingsaiñdur thymmai, bad ki rukom pynpoi mar kan long kaba donkam bha ban pynthikna ïa ki rukom pynmih bording kiba shngaiñ, kiba jemdor, bad kiba lah ban shaniah na ka bynta ki ri kiba dang kiew.
Katba ka India ka nang kiew shaphrang ha ka BRICS Chairship, ka don ka lad ban pynkhlaiñ ïa ka rukom treikam kaba peit shakhmat na ka bynta ka jingiatreilang kaba kyrshan ia ka jingjemdor, ka jingheh, ka jingshaniah, ka jinglah ban ioh ia ka teknoloji, ki rukom pynpoi mar kiba khlaiñ, bad ka roi ka par kaba ïaineh.
Ka jingeh kam dei tang ban wanrah shuh shuh ïa ka bording kaba khuid, hynrei ban tei ïa ki rukom pynmih bording kiba kynthup lang, kiba jemdor, kiba lah ban shaniah, bad kiba lah ban pynneh ïa ka jingkiew ka ïoh ka kot bad ka roi ka par kaba jrong samoi.
(U nongthoh u dei u Myntri Khynnah ba dei khmih ïa ka Tnad Bording.).
