Nongpoh, Risaw 27: Da ka jingangnud ban kyntiew ïaki kam thaiñ jaiñ bad ban pynïaid ïew ïaki sha ka pyrthei ka Weavers Service Center, Guwahati bala bei pisa da ka Ministry of Textile jong ka sorkar India mynta ka sngi kala sdang ban plie paidbah ïaka ïew pyni nam ïaki jaiñ ryndia bala thir bad thaiñ hi bala tip kum ka District Handloom Expo “Tana- Bana” ha madan NSCA Pahamsyiem.
Ha katei ka ïew pyni nam la wan ruh ban shim bynta da ki nongthaiñ jaiñ na kylleng ka jylla Meghalaya, Assam bad kumjuh ruh na ka jylla Sikkim ka ban sdang naduh mynta ka sngi ka 27 tarik bad pynkut pat haka 31 tarik Risaw ha kaba la sakhi ruh ba ha katei ka ïew pyni nam ïaki jait jaiñ ryndia bapher bapher kiba la shna bad pynwandur haka rukom kaba itynnad bad khring ïaki paidbah, nalor kiwei ki tiar thaiñ bad ki tiar shna kti.
Ïa katei ka ïew pyni nam la wan ban plie paidbah mynta ka sngi da u Bah Mayral Born Syiem MLA ka Nongpoh kum u kongsan haka jingdonlang ka Niva Kalita Dipika Ingdo, Zonal Officer Weaving Shillong, Babai Nath Technical Superintendent Wevers Service Center Guwahati, Kong D Lyngdoh Zonal Officer naka tnad Textile ka sorkar jylla, Bah Mathew Makdoh Working President NSCA, DK Srivastava Superintendent KVIC Shillong bad kiwei kiwei.
Haba kren ha kane ka sngi naka liang u Bah Mayral Born Syiem u la ai ka jingïaroh ïaka Weavers Service Center Guwahati kaba la shim ïaka sienjam ban pynlong kum katei ka jait prokram ban kyntiew ïaki nongthaiñ jaiñ haka jylla bad da ka jingsngew sarong lah ban ong ba ka Ri-Bhoi District ka dei kaba lamkhmat khamtam ka thaiñ nongtluh ba bun hi ki longiing ki dei kiba nang ban thaiñ ban wet kaba ioh nam ruh kum ka Eri Silk Village hapoh ka jylla.
U la ong namar ka jingbun ki nongkam trai ïaki jaiñ bala thaiñ bad pynmih da ki nongthaiñ napoh ka district, ka sorkar mynta lyngba ka tnad Textile kala ïakhun dohiap ban ioh noh ïaki GI Tag ban ithuh noh khamtam ban ioh ka jinglong trai ïaki jaiñ ryndia kiba mih naka jylla ba ym dei ban don ban shim kabu da kiwei kiba nabar jylla bad ban kamai jem lyngba ka jingtrei shitom jong kiwei da kaba bynrap ruh ba kum u MLA un sa ïakren bad ka sorkar ba dei ban pynioh noh kawei ka Weavers Service Center hapoh ka jylla naka bynta ka jingmyntoi jong ki nongthaiñ jaiñ.
Shuh shuh u la ong ruh ba ka long kaba donkam ban sngewthuh shai ba ka kam jngohkai pyrthei ka long kaba kongsan ban kyntiew ïaki mar bad ki jaiñ khamtam ki ryndia bala pynmih naka jylla ba ngi dei ban pdiang burom ïaki briew kiba na kylleng ka pyrthei bad kum u MLA mynta u dang ïaleh ban pynim biang ïaki jaka jngohkai pyrthei ba paw haka thaiñ Nongpoh ban dang kyntiew ruh ïaka lad iohkam iohjam ki khun samla ym ban ap tang haki kam sorkar, u la bynrap.
