Ka jingpule mynta ka dei ban thaw kam ym dei shuh ban wad kam

- Babu Kular Khongjirem

0

Ka juk ka la kylla pyrdet bak-ly-bak mynta na kato ka juk ha ki por mynshwa. Mynshwa,shisien ba la leit pule, kata, la tikna beit ba ka kam ka la ap lypa. Sawphew ne sanphew snem lei mynshwa, shisien ba la pyndep ïa ka Class-VI shaneng, kata, wat na ïing ruh ki la wan khot hi. Ym donkam interbiw thoh (written interview) ne interbiw markhmat (personal interview) hynrei shisien ba la ïa kohnguh ka kam lah ïoh lypa ha kti bad ka tulop ruh khlem jingpynthut ne jingleh kyllaiñ eiei. Yn nai ïakren ïa kito lei kiba la pas Matrik ne Class-X ba ki la wan khroh wan kjor da ka kam sahep ba heh bha naduh na ïing na sem. Mynshwa ka dei shisha ka jingpule ban ïohkam bad ka long shisha kumta.
Haba ynda ïaphai pat sha kane ka juk mynta ha ki kyrdan MA/MSc/MCom, bad kiwei kiwei, lah jlep shoiñ ka wad kam. Wat lada pas da ki kyrdan Engineer ha ka laiñ bapher bapher ruh lap ba dier sa ka rta ïoh kam bad ka thait ka shong ïing bad lut ei tang ka por, ka bor bad pisa tang haba leit wad ban thep kam.
Lada pas tang ïa ka SSLC ne HSSLC leilei ki dang kheiñ kyrdan khynnah. Wat lada pas ïa ka Degree Level kum ka BA/BSc/B.Com ter ter ym pat long ban ïa kren ïa ka kam lada phim don ki nongkyrshan kiba skhem nadien (back up). Lada leh da ka buit tuh ban thied kam ruh, bun ki kam kamai thok kamai shukor suda. Bun kiba la liat ha kum kine ki thliew khamtam ki kam kompeni bapher bapher kiba la kylla dujok pynban ha ka jingim briew jong ngi ha kane ka pyrthei. Bun kiba shah teh bad kylla mraw ei mynta ba shah shet ha ka wad kam lamwir mynta.
Kane ka juk mynta ka la ih bha ba lah dei ban hikai bad lam lynti noh ïa ki khynnah pule sha ka thaw kam thaw jam ym dei shuh ka jingpule ban ïohkam ïohjam.
Ha kiwei kiwei ki ri kiba la shai bad riewspah, dei ki samla pule kiba thaw kam bad ka sa roi bad riew spah ka ri jong ki.
Ha ka Jylla Panjab bad Haryana, kiba rep hangto dei kiba la pyndep ïa ka jingpule ha ka rep ka riang (Agriculture). Ha Jylla Meghalaya jong ngi pat,shisien ba la shong skul ha ka kyrdan Class-IX/X, kata, la sngewlehraiñ bad sngewpoh ban bat wait ne mohkhiew ne ban kit khoh.
Lada ym lah ban wanrah biang ne saiñdur ïa ki khynnah pule ba kin kheiñkor bad ñiewkor biang ïa ka thaw kam bad ïai ap sah ha ki kam suk (kam Sorkar) ka pateng ban wan kan long kaba dum tliw tliw bad i sheptieng pynban ba kane ka kam suk kan pynkylla nongtuh, nonglute bad nongpynjot thiaw ïa ka imlang sahlang, ka jingteh mraw ïa ka ri bad ka jaitbynriew ba ieit jong ngi ha ki pateng kiban wan.

Leave A Reply

Your email address will not be published.