Ka jingkynnoh ba bam tuh ïa ka pisa 100 sngi ka dei tang ka buit ban pynthohbria: ong ki longkmie

Mawkyrwat, Rymphang 26: Halor ka jingshah kynnoh jong u bah Kyrmen Shangdiar uba bat kum u Rangbah Shnong jong ka shnong Mawrapat ba u don kti ban bam tuh ïa ka pisa na ki longkmie na ka jingbylla 100 sngi jong ka shnong Mawrapat kaba hap hapoh ka Hima Malaisohmat jong ka East Khasi Hill District, ki la don katto kane ngut ki briew jong ka shnong kaba ki la leit ban ujor ejahar hapoh ka Mawsynram Police Station.
Haba kren ha ki lad pathai khubor kaba ïa dei bad kane ka jingjia hapoh ka shnong Mawrapat, ki katto katne ki longkmie kiba dei ruh ki briew kiba ju phah sei ïa ka pisa bai bylla 100 sngi ha u bah Kyrmen Shangdiar, ba la tip kyrteng kum ka kong Nissidian Ronsang bad ka kong shimtimary shangdiar, ki la wan shakhmat ban pynshai paidbah, ba ka jingkynnoh jong ki katto katne ki briew jong ka shnong hapoh ki lad pathai khubor kaba la mih ha kine ki sngi ba la dep pyrshah ïa u bah Kyrmen Shangdiar u Rangbah Shnong ka Mawrapat ka dei tang ka jingkwah pynthohbria hynrei kam shem la don kaba kum kata ka jingbam tuh ïa ka pisa bai bylla jong ki.
Ki longkmie ki la kynnoh ruh ba kitei ki rangbah ki la ïalam ïa ki sha Mawsynram da kaba ong ba kin pynbeit ïa ki kam bank ba dei bad ki ATM ha katei ka por ki la phah saiñ jubor ïa kitei ki longkmie ha ki kot kaba ma ki ki la dep thoh, ki longkmie ki la ong ba ma ki ruh kim nang ban pule ne thoh namar kim dei kiba leit skul kumta ki la saiñ ïa kita ki kot, hynrei kaba sngewsih pat hadien katto katne sngi la ïohi ba ki dei pynban ki nongujor ejahar ïa u bah Kyrmen Shangdiar u Rangbah Shnong jong ka Mawrapat.
Kumta na ka liang jong ki longkmie ki la kyntait ïa jingkynnoh jong ki katto katne ngut ki rangbah jong ka shnong pyrshah ïa u bah Kyrmen Shangdiar ban ong ba ula bam tuh ïa ka pisa jong ki, bad ha katei ka ejahar ki longkmie ki la phah weng noh ïa ki kyrteng kaba kitei ki rangbah ki la phah saiñ jubor ha katei ka ejahar.
U bah Pranton Ïawrot uba dei u dkhot jong ka Executive Committee jong ka Shnong Mawrapat haba kren ha ki lad pathai khubor u la ong ba ka jingïarap sei pisa u bah Kyrmen Shangdiar u rangbah shnong ka Mawrapat ka dei naduh u snem 2020 ei ei haduh mynta ka jingïarap sei pisa jong ïa ki longkmie ka dei namar kim tip ban sei pisa lyngba ka ATM ne kum juh ruh napoh bank account hynrei kam shem don pat kum kata ba u la bam ïa katei ka pisa jong ki longkmie, hynrei baroh ki dei tang ka jingbishni bad kwah ban pynthohbria ïa u rangbah shnong bad kum juh ïa ka shnong baroh kawei.