Shillong, Naitung 01: Ka Tura Mother’s Union (TMU) ka la pynmih ïa ka jingpynshai ha kaba ïadei bad ka Memorandum of Understanding (MoU) ba la ïasoi bad ka tnat Pule Puthi ban ïatreilang, ban pynïaid bad ban pynbha ïa 20 tylli ki skul Lower Primary jong ka sorkar ha kylleng jong ka West Garo Hills bad ki thaiñ ba marjan kiba dei hapoh ka Project COME (Community Onward Movement for Education).
Ha kyrwoh ka Union ka la pynpaw ka jingsngewkhia ïa ki mat ba la pynpaw da ka All Meghalaya Primary School Teachers Association (AMPSTA), kaba ong ba ka jingïasoi MoU kam shym la pyntlot ïa ka bor ki nonghikai ne ba ka ïaid lait ïa ka jinglong kongsan ki School Management Committee (SMC). Hynrei ka bynta jong ka Union ka dei ka jingkyrshan bad ka long pdeng, da ka thong ban don ka jingïatreilang bad ki shnong ban pynbha ïa ki skul.
Na ka liang ka seng ki Kmie ne ka Mother’s Union ka la banjur ïa ka jingdonkam ban ïaidlang bad ka Right to Education Act, 2009, bad ka National Education Policy (NEP) 2020, kaba pynshlur ïa ki jingïashim bynta ki nongshong shnong ha ka ban pynbha ïa ka pule puthi ha ki skul.
Ka Union ka la pynshai ruh kumjuh ba kam shym la shah pynkupbor ban thung ïa ki nonghikai sorkar, ban shim rai halor ki rukom treikam, ne ban tuklar ïa ki jingpynwandur ïa ki jingpynbeit ïa ki subjek ne curriculum.
Halor ki clause kiba kongsan ha ka MoU, ka Union ka la batai ba ka jingthung ïa ki nongtrei bym hikai ne non-teaching staff bad ka jingai ïa ki No Objection Certificate (NOC) ki long ban pynsuk ïa ki rukom treikam, ym dei ki rukom treikam ba lah ban pynïaid.
Ka Mother’s Union ka la sdang ïa ka kam ïasyllok hapdeng ki shnong, ki paidbah ha baroh ki 20 tylli ki skul bad ka la plie lad na ka bynta ban khmih biang ïa ki jingïadonbynta ha kino kino ki skul lada ka don ka jingïamonlang ban wengnoh ïa kane ka jingïasoi MoU.
Ka la pynthikna ba kan ïaineh ban long kaba khuid, ka jingïakren hapdeng ki shnong, bad ka jingïatreilang bad baroh ki nongshong shnong ban pynbha ïa ka pule puthi ha ka jylla.
